استانادا كورنەكتى اقىن, مەملەكەتتىك سىيلىقتىڭ لاۋرەاتى ۇلىقبەك ەسداۋلەتپەن «كيىز كىتاپتىڭ كيەسى» اتتى كەزدەسۋ كەشى ءوتتى. كەشتە ولەڭ ولكەسىندە اتى ەرتە تانىلىپ, اقيىق اقىن مۇقاعالي ماقاتاەۆتىڭ سوڭىنان ەرىپ ءجۇرىپ, قالىپتاسقان قالامگەردىڭ جىرلارى وقىلىپ, ولەڭدەرىنە جازىلعان اندەر شىرقالدى. كەزدەسۋگە جينالعاندار اقىنعا سۇراقتارىن قويىپ, تۇشىمدى جاۋاپتارىن الدى.
1974 جىلى «قانات قاقتى» اتتى ۇجىمدىق جيناققا سول كەزدەگى ءبىر توپ جاس اقىننىڭ جىرلارى توپتاستىرىلدى. سولاردىڭ ءبىرى – ۇلىقبەك ەسداۋلەت بولاتىن. ارتىنشا اقىننىڭ «كوزدەرىڭە عاشىقپىن» اتالاتىن جەكە جيناعى جارىق كوردى. ايتپاقشى, وسى كىتاپپەن اتتاس جۇرەك قىلىن شەرتەتىن ولەڭگە ەلەنا ابدىحالىقوۆا تاماشا ءان جازدى. ليريك اقىن رەتىندە تانىلعان اقىن وسە كەلە, جەتىلە كەلە ەلگە ازاماتتىق ۇستانامىن دا پاش ەتتى. مىسال ءۇشىن ايگىلى ءانشى روزا رىمباەۆا ورىندايتىن «زامان-اي» ءانىن الۋعا بولادى. ۇلىقبەك ەسداۋلەت پەن بەلگىلى كومپوزيتور تولەگەن مۇحامەدجانوۆتىڭ شىعارماشىلىق بىرلەستىگىنەن تۋعان بۇل تۋىندى اسىرەسە, سەمەي پوليگونىنىڭ دالامىزعا كەلتىرگەن زالالىن جاقسى اشىپ, «سەمەي-نەۆادا» انتيادرولىق قوزعالىسىنىڭ ءانۇرانىنا اينالدى. التىنبەك قورازباەۆتىڭ تىڭداعان ادامدى بەيجاي قالدىرمايتىن «قارا پيما» تولعاۋى دا ۇلىقبەك ەسداۋلەتتىڭ قالامىنان تۋعان.
ۇلىقبەك ەسداۋلەت – اقىندىعىنان بولەك قالامى قارىمدى جۋرناليست. جاقىندا ونىڭ «قارعالداق» اتتى جاڭا كىتابى شىقپاق. وسىنى سۇيىنشىلەگەن اقىن ادەبيەت پەن ءومىر تۋرالى وقىرماندارىمەن سىرلاستى.
امانعالي قالجانوۆ
