ەۋروپا تورىندە – «شاحمات پاتشالىعى»
ريگادا باستالعان ەۋروپا چەمپيوناتىنىڭ اشىلۋ سالتاناتىندا «balapan» تەلەارناسىنىڭ تاپسىرىسىمەن دارمەن سادۋاقاسوۆ شاحمات اكادەمياسى دايىنداعان «شاحمات پاتشالىعى» انيماتسيالىق مۋلتحيكاياسى تانىستىرىلدى.
اتالعان مۋلتحيكايا 32 ءبولىمنەن تۇرادى جانە قازاق, ورىس, اعىلشىن تىلدەرىندە ازىرلەنگەن. جوبانىڭ ماقساتى – ساپالى 3D انيماتسيا جاساۋ عانا ەمەس, سونىمەن قاتار, 4 جاستان اسقان بالالارعا شاحمات ەرەجەلەرى مەن نەگىزگى قاعيدالارىن ۇيرەتۋ جانە لوگيكالىق ويلاۋ جۇيەلەرىن قالىپتاستىرۋ.
اشىلۋ سالتاناتىنا فيدە پرەزيدەنتى كيرسان يليۋمجينوۆ, لاتۆيانىڭ قارجى ءمينيسترى, حالىقارالىق گروسسمەيستەر دانا رەزنيتسا, لاتۆيانىڭ ءبىلىم ءمينيسترى, ريگا قالاسىنىڭ ۆيتسە-مەرى, بەلگىلى جاتتىقتىرۋشىلار, تانىمال شاحماتشىلار جانە وزگە دە قۇرمەتتى قوناقتار قاتىستى.
ايتا كەتەرلىگى, 30-شى تامىزعا دەيىن جالعاساتىن ايگىلى شاحمات دوداسىنا 47 ەۋروپالىق شاحمات فەدەراتسياسىنان 1000-نان اسا بالالار قاتىسۋدا.