ەسەپتى كەزەڭدە الەمدە ءدۇيىم جۇرتتى ەلەڭدەتكىزىپ, كوپتىڭ تالقىسىنا تۇسكەن بىرنەشە ءىرى ساياسي وقيعالار بولدى. تامىزدىڭ 18-ءى كۇنى بۇۇ-نىڭ بۇرىنعى باس حاتشىسى كوفي اننان 81-گە قاراعان شاعىندا دۇنيەدەن وزدى. تۇركيا پرەزيدەنتى رەدجەپ تايپ ەردوعان بيلەۋشى ادىلدىك جانە دامۋ پارتياسىنىڭ توراعاسى بولىپ قايتا سايلاندى. سول كۇنى رەسەي ليدەرى ۆلاديمير پۋتين اۆستريانىڭ سىرتقى ىستەر ءمينيسترى كارين كنايسل حانىمنىڭ ۇيلەنۋ تويىنا قاتىسىپ, گەرمانيا كانتسلەرى انگەلا مەركەلمەن رەسمي كەزدەسۋ وتكىزدى. جەكسەنبىدە اۋعانستان باسشىسى اشراف گاني «تاليبان» قوزعالىسىمەن سوعىستى ءۇش ايعا دەيىن توقتاتا تۇرۋ جونىندە مامىلەگە كەلدى.
ايلىق جالاقى ءوسىمى – 60 ەسە
ۆەنەسۋەلا بيلىگى قىركۇيەك ايىنان باستاپ ەلدەگى ەڭ تومەنگى ايلىق جالاقىنى 60 ەسەگە وسىرۋگە ۋادە بەرىپ وتىر.
ەلدىڭ پرەزيدەنتى نيكولاس مادۋرو جۇما كۇنى وسى جايىندا حابارلاي وتىرىپ, ەڭ تومەنگى جالاقىنىڭ «پەترو» كريپتوۆاليۋتاسىنا قوساقتالاتىنىن جەتكىزدى. جاڭا ايلىقتىڭ مولشەرى ءبىر «پەترونىڭ» جاڭا بوليۆار اقشاسىمەن 1,8 مىڭ, ەسكى بوليۆارمەن 180 ملن بولادى. بۇل ەڭ تومەنگى ايلىق جالاقىنىڭ بىردەن 60 ەسەگە ءوسىپ وتىرعانىن كورسەتەدى.
ۆەنەسۋەلادا 20 تامىزدان باستاپ جاڭا اقشا اينالىمعا ەنگىزىلدى. وندا ەسكى بوليۆاردىڭ سوڭىنداعى بەس ءنول تسيفرى الىنىپ قالدى. ەندى ەڭ ۇلكەن اقشا قاعازىنىڭ قۇنى 500 بوليۆار بولىپ تۇر. ازىرگە ەلدە بوليۆار مەن «پەترو» قاتار قولدانىستا جۇرەدى. تولىق قۇرىپ بىتكەنگە دەيىن ەسكى اقشا دا اينالىمدا قالا بەرەدى. جاڭا اقشا «پەتروعا» تاۋەلدى بولادى.
«ۇرىپ-سوققانىمىز ءۇشىن كەشىرىڭدەر»
رۋمىنيانىڭ ىشكى ىستەر ءمينيسترى ءوز قىزمەتكەرلەرىن تارتىپسىزدىك جاساۋشىلاردى ۇرىپ-سوققاندارى ءۇشىن جۇرتتان كەشىرىم سۇرادى.
مينيستر كارمەن دان مۇنى 10 تامىز كۇنى بۋحارەست كوشەلەرىندە ۇكىمەتكە قارسى ەرەۋىل جاساۋشىلاردى باسۋ كەزىندە پوليتسەيلەر تاراپىنان جاسالعان ارەكەتتەرگە بايلانىستى ايتتى. جاپپاي شەرۋدىڭ سوڭىندا 450 ادام زارداپ شەكسە, ولاردىڭ 70-ءى اۋرۋحانالارعا جاتقىزىلدى, سونىڭ ىشىندە 11 جاندارم بولدى.
«مەن قاقتىعىس بارىسىندا زارداپ شەككەن ازاماتتار مەن جاندارمداردان كەشىرىم سۇرايمىن» دەدى مينيستر جەكسەنبى كۇنى وتكەن ءباسپاسوز ءماسليحاتىندا.
ونىڭ ايتۋىنشا, وسى وقيعاعا بايلانىستى 20-دان استام قىلمىستىق ءىس قوزعالعان.
بەلارۋس ۇكىمەتى وزگەردى
بەلارۋس پرەزيدەنتى الەكساندر لۋكاشەنكو ەل ۇكىمەتىنىڭ باسشىلارىن تۇگەل ورىندارىنان الىپ, جاڭا پرەمەر تاعايىندادى.
ۇكىمەتتىڭ بۇرىنعى قۇرامىن تۇگەلگە جۋىق قىزمەتىنەن قۋعان مەملەكەت باسشىسى مۇنى ولاردىڭ الدارىنا قويعان مىندەتتەرىن ورىنداي الماۋىنان دەپ ءتۇسىندىردى. وسىعان وراي ول جاڭا ۇكىمەتتىڭ الدىنداعى ەڭ باستى مىندەت رەتىندە ءتارتىپتى العا تارتتى.
مينيسترلەر كابينەتىنىڭ تىزگىنىن ەندى بۇرىن دامۋ بانكىن باسقارعان سەرگەي رۋماس ۇستادى. ودان بولەك, پرەمەردىڭ ورىنباسارلارى دا تۇگەل وزگەردى.
