وسىدان ءدال 20 جىل بۇرىن. 1997 جىلعى 10 جەلتوقسان. بۇل – وتانىمىزدىڭ جۇرەگىنە, تاۋەلسىزدىگىمىزدىڭ تىرەگىنە اينالعان استانا قالاسىنىڭ تاريحىنداعى ەرەكشە كۇننىڭ ءبىرى. ءدال وسى كۇنى قالانىڭ ورتالىق الاڭىندا سالتاناتتى جيىن ءوتتى. سالتانات بارىسىندا ەلباسىمىز نۇرسۇلتان نازارباەۆ «بۇگىننەن باستاپ اقمولا قازاقستاننىڭ جاڭا استاناسى» دەپ جاريالادى. وسىلايشا, مەملەكەت باسشىسىنىڭ ەلدىڭ باس قالاسىن استاناعا كوشىرۋ تۋرالى باستاماسى رەسمي جاعدايدا جۇزەگە استى.
وسى كۇننەن باستاپ قالا تۇرعىندارى ءۇشىن عانا ەمەس, بارشا قازاقستاندىقتار ءۇشىن تاريحتىڭ جاڭا بەتى اشىلدى. سارىارقانىڭ سارى ايازى شىتىناپ تۇرسا دا, قالانىڭ ورتالىق الاڭىنا جينالعان ەل-جۇرتتىڭ جۇزىنەن قۋانىشتىڭ لەبى سەزىلىپ تۇردى. الاڭ ورتاسىندا ورناتىلعان اقشاڭقان مىنبەردىڭ اينالاسىنا قالا جۇرتشىلىعى اعىلىپ كەلىپ جاتتى… سول كەزدە «اقمولا اقيقاتى» اتالاتىن گازەتىمىزدىڭ تاپسىرماسىمەن ءبىز دە ەرتەلەتىپ الاڭدا بولعان ەدىك.
پرەزيدەنتتىڭ سول كەزدەگى ورداسىنان, ياعني, بۇگىنگى ەلوردا اكىمدىگى عيماراتىنان نۇرسۇلتان ءابىشۇلى نازارباەۆ باستاعان پارلامەنت جانە ۇكىمەت باسشىلارى, جاڭا ەلوردانىڭ تۇڭعىش اكىمى ادىلبەك جاقسىبەكوۆ مىنبەرگە كوتەرىلدى. اياز بۋىپ تۇرعانىمەن, جاندارى مارقايىپ تۇرعان جۇرت دۋ-دۋ شاپالاققا باستى. جۇزىنەن اقجولتاي قۋانىش, اسقاق ايبىن سەزىلگەن ەلباسى قالىڭ قاۋىمعا قايتا-قايتا قول بۇلعاپ, قولداۋشى جۇرتىنا ريزاشىلىق كوڭىل-كۇيىن ءبىلدىردى. وسى ءبىر ساتتە رەسپۋبليكالىق ۇلاننىڭ وركەسترى اسقاق اۋەندى باستاپ جىبەردى. ەر تۇلعالى جاۋىنگەرلەر كوك بايراقتى جەلبىرەتىپ, ەلتاڭبا مەن پرەزيدەنت شتاندارتىن كوتەرىپ شىقتى. ەلدىكتىڭ وسى ءۇش سيمۆولىن ۇستاعان ايبىندى ساربازدار الاڭنىڭ ءدال ورتاسىنا جەتىپ توقتاعان ساتتە ءانۇرانىمىز جاڭا ەلوردامىزدىڭ اسپانىندا اسقاقتاپ سالا بەردى. جۇرەك تۇسىنا قولىن قويىپ تولقىعان جۇرت مارقايىپ تۇردى.
نۇرسۇلتان نازارباەۆ وسى ءبىر تاريحي ءساتتىڭ ۇستىندە ەلجىرەپ سويلەدى. وسى ساتتەن باستاپ تاۋەلسىز قازاقستاننىڭ استاناسى رەسمي تۇردە وسى قالا بولاتىنىن جاريا ەتتى. بۇل كۇندى تاعاتسىز كۇتكەن ءبىز بولساق, ايازدىڭ قارىعانىن ەلەمەي-اق قول سوعىپ جاتىرمىز.
وسى سالتانات بارىسىندا ەستە قالعان ءبىر كورىنىس – اقمولالىق اقساقالداردىڭ ەلباسىمىز نۇرسۇلتان ءابىشۇلىنا جاڭا استانانىڭ سيمۆولدىق كىلتىن تابىس ەتكەنى بولدى. سوعىس پەن ەڭبەكتىڭ بەينەتى مەن زەينەتىن قاتار كورگەن مۇقات مەيىرمانوۆ پەن نۇرعوجا ورازوۆ باستاعان ءبىر توپ قاريا ەلورداعا اينالعان قالانىڭ قازىعىن قاققان ەلباسىعا اقجولتاي باتاسىن بەردى. اق تىلەككە بولەنگەن پرەزيدەنت بولسا ارداقتى اقساقالدارعا ىستىق ىقىلاسىن ءبىلدىردى.
قۇدايعا شۇكىر, كەزىندە بىرەۋگە جالعان بولعان, بىرەۋگە ارمان بولعان استانا بۇگىنگى تاڭدا تورتكۇل دۇنيە تانىلعان اسەم قالاعا اينالدى. ەلباسىمىزدىڭ اسقاق ماقساتى ورىندالدى. سوندىقتان دا ءبىز بۇگىن قازاقستاننىڭ دامۋىنا سەرپىن بەرگەن جاڭا ەلوردامىزدىڭ اۆتورىنا ريزاشىلىق سەزىممەن «استانا – ەلباسىنىڭ ەرلىگى» دەپ ايتامىز. ەل ءۇشىن دە, ەلباسى ءۇشىن دە, ەلوردا ءۇشىن دە مارقايىپ جۇرەتىن بولدىق.
عالىم قوجابەكوۆ
