گولدان گولدىڭ نەسى ارتىق؟

چەمپيوناتتىڭ 25 ماۋسىمنىڭ كەشىندە باستالىپ, 27-ءنىڭ تۇنىندە تياناقتالعان ەسەپتى مەرزىمى العاشقى ەكى ىرىكتەۋ توبىنان پلەي-وفف كەزەڭىنە شىققان 4 كوماندانى اتاپ بەردى. الدىمەن بۇرىنعى ەكى ماتچتا قۇيىنپەرەن كورىنگەن رەسەي قۇراماسىنىڭ «تۇمسىعى تاسقا ءتيدى». بىراق ۋرۋگۆايدان 0:3 ەسەبىمەن قيراي جەڭىلگەنىمەن, توپتا ەكىنشى ورىن الدى. ال يسپانيا – ماروككو, يران – پورتۋگاليا, دانيا – فرانتسيا ارالارىنداعى كەزدەسۋلەر تەڭ ناتيجە اكەلدى. وسى ۇشىراسۋلاردىڭ قورىتىندىسىندا 1/8 كەزەڭدە فرانتسيا  – ارگەنتينا, ۋرۋگۆاي – پورتۋگاليا, رەسەي – يسپانيا, دانيا – حورۆاتيا كەزدەسەتىندەرى بەلگىلى بولدى. بۇگىن جانە ەرتەڭ قالعان تورتتىك انىقتالادى. 

البەتتە, گولدان گولدىڭ ايىرماشىلىعى بار. ونىڭ قۇنى كەيدە ونداعان ەسەلەپ ارتىپ كەتىپ جاتادى. 27 ماۋسىم كۇنى تۇندە نيگەريا – ارگەنتينا اراسىندا وتكەن ماتچتىڭ سوڭىنا تامان ماركوس روحو سوققان گولدىڭ سالماعى ءتىپتى زور بولدى. ول كۇللى ارگەنتينا ەلىنىڭ قىل ۇشىندا تۇرعان تىلەگىن وڭعارتىپ بەردى. وسىنىڭ ارقاسىندا ەلدىڭ ۇلتتىق قۇراماسى پلەي-وفف ايماعىنا ءوتىپ, چەمپيوناتتى جالعاستىرۋعا مۇمكىندىك الدى. سول گولعا وراي ءبىز دە الدىن الا جاساعان كەستەمىزدەن شىعىپ, وسى ماتچ جونىندە ماقالا جازۋعا وتىردىق.

شەشۋشى ماتچتىڭ الدىندا باس جاتتىقتىرۋشى حورحە سام­پاولي ستارتتىق قۇرامدى ءبىر سىلكىپ الدى. وسى دۇرمەكتە  فرانكو ارماني قاقپادان ورىن السا, شابۋىلدىڭ وتكىر شەبىنە گونسالو يگۋاين شىعارىلدى. ال احمەد مۋسا مەن كەلەچي يحەاناچونى  العى شەپكە قويعان نيگەريا  بۇرىنعى 3-5-2 سىزباسىن ساقتاپ قالدى.

تەڭ ويناسا بولدى, ءتورت قۇبىلاسى تۇگەلدەنە بەرەتىن قارسىلاسىنا قاراعاندا, جايى كۇيىپ تۇرعان ارگەنتينا ءوزى ءۇشىن تەك قانا جەڭىس كەرەك بولعاندىقتان, العاشقى مينۋتتان بار كۇشىمەن العا ۇمتىلدى. بۇل تۇستا نيگەريانىڭ قورعانىسى ءبىرشاما جۇيەسىز كورىندى. بىراق, تۇتاستاي العاندا, قاقپانىڭ قورعاپ قالۋعا باعىتتالعان مىندەتتەرىن ابىرويمەن ورىنداپ تۇردى. مۇنىڭ ارتىنان افريكالىقتار وزدەرى بىرنەشە شابۋىل ۇيىمداستىرىپ كوردى. سودان كەيىن العاشقى ەكى تۋردا ۇيىقتاپ جۇرگەن ليونەل مەسسيدىڭ دە كەزەگى كەلدى. وسى تۇستا ەرەكشە بەلسەندى قيمىلداي باستاعان ول 14-مينۋتتا ەۆەر بانەگادا پاس الىپ, ءبىر قورعاۋ­شىنى الداپ ءوتتى دە, دوپتى باعاننىڭ الىس بۇرىشىنا سولق ەتكىزدى. گول! بىراق بۇدان ارى كوماندا شابۋىل شەبىنىڭ قارقىنى بىرتىندەپ تومەندەي بەردى.

كەزدەسۋدىڭ مۇنداي ەسەپپەن اياقتالۋى ارگەنتينانى قاناعاتتاندىرۋى مۇمكىن ەدى, ەگەر قاتار جۇپتاعى يسلانديا حورۆاتيادان ۇتىلا قالسا, لەونىڭ جاساعى ەكىنشى ورىنعا سەنىممەن قادام باساتىن. الايدا ءدال قازىر ودان 2 ۇپاي الدا تۇرعان نيگەريانى جەڭىلىس جولدان شىعارىپ تاستايتىن. ونىڭ تىلەگىن ءتىپتى تەڭ ويىننىڭ ءوزى ورىنداپ بەرە الۋشى ەدى. سوندىقتان «قارا قۇرلىق» وكىلدەرى جاپپاي قاۋىرت شابۋىلعا شىعۋعا تاۋەكەل ەتپەدى. بۇل شابۋىلدىڭ وتكىر بولۋىنا كەدەرگى كەلتىردى. مۇنىڭ ەسەسىنە, ارگەنتينالىقتار قايتا اتقا قوندى. تايمنىڭ ورتا تۇسىندا يگۋاين ايىپ الاڭىنداعى سوققى بەرەر نۇكتەدەن  تابىلدى. مەسسيدەن دوپ العان ول  قارسىلاستار قاقپاشىسى فرەنسيس ۋزوحودان ايلاسىن اسىرا المادى.

ەكىنشى تايمنىڭ باسىندا حاۆەر ماسكەرانو جوق جەردەن جاڭىلىس باسىپ, پەنالتي بەلگىلەنۋىنە سەبەپشى بولدى. ونى ۆيكتور موزەس ادەمى پايدالانىپ, تابلوداعى ەسەپتى تەڭەستىردى. بۇدان كەيىن ارگەنتينالىقتار ءۇشىن پلەي-وفف اۋىلى قاشىقتاي ءتۇستى. سول ابىرجىتسا كەرەك, ولاردىڭ ەندىگى جەردەگى شابۋىلدارىنان بەرەكە قاشتى. مۇنى بايقاعان سامپاولي جورىققا تىڭ كۇشتەر قوستى. بىراق نيگەريانىڭ قارسى شابۋىلدارى وتكىرىرەك كورىنىپ تۇردى. وسى ەرسىلى-قارسىلى شاپقىلاسۋلاردىڭ پالەندەي ناتيجە اكەلەتىنىنە سەنىم تۇگەسىلە تۇسكەن شامادا ماركوس روحو جارق ەتىپ كوزگە كورىنىپ, ميلليونداعان ارگەنتينالىق جۇرت ۇمىتتەرىنىڭ وتتارىن وياتىپ بەردى. اۋەلى مەركادو ايىپ الاڭىنا اۋەلەتىپ دوپ جەتكىزدى. سول جەردە ونى ەكى ويىنشىنىڭ اراسىندا قابىلداپ العان ماركوس قىسىلتاياڭ ساتتە كەرەمەت قاتتى سوققى جاساپ ۇلگەرىپ, قاقپانىڭ تورىنان ءبىر-اق شىعاردى. بۇدان كەيىن ارگەنتينالىقتار ۋاقىتتى سوزىپ, وسى ەسەپتى ساقتاپ قالۋعا بارىن سالدى. كەزدەسۋدىڭ سوڭعى مينۋتتارىندا ۋاقىتتى سوزۋعا كوبىرەك نازار اۋدارىپ كەتكەن مەسسيدىڭ ءوزى وسى ءۇشىن «سارى قاعاز» الىپ قالدى. بىراق وسى اۋپىرىممەن ولار جەڭىستى ەسەپتى اقىر سوڭىنا دەيىن اپاردى.

ناتيجەسىندە ءۇش ويىندا تۇگەل جەڭىسكە جەتكەن يسلانديا 9 ۇپايمەن ءبىرىنشى ورىندا قالدى. ارگەنتينا 4 ۇپايمەن ەكىنشى ورىنعا جايعاستى.

قىسقا-نۇسقا

* ماۋسىمنىڭ 27-سىنە دەيىن چەمپيوناتتا 40 ماتچ وينالدى.
*  بۇل ويىنداردا ەڭ كوپ كەز­دەس­كەن ەسەپ – 1:0 جانە 2:1. بۇلاردىڭ ءاربىرى 10 رەتتەن كەزدەستى.
* 40 ويىندا 105 گول سوعىلدى. ءار ماتچقا ورتا ەسەپپەن – 2,62 دوپتان.
* وسى ارالىقتا 3 فۋتبولشى الاڭنان  قۋىلىپ,  130 رەت ەس­كەرتۋ بەرىلدى.
* 40 ويىندى 1 792 146 ادام كوردى. بۇل – ءار كەزدەسۋدە ورتا ەسەپپەن 44 802 كورەرمەن بولدى دەگەن ءسوز.
* وسى كەزگە دەيىن قاقپاعا 22 پەنالتي بەلگىلەنىپ, ولاردىڭ 17-ءسى گولعا اينالدى. ءۇش دوپتى قاقپاشى قاعىپ الدى, ەكى فۋتبولشى قاقپادان بيىك جىبەردى.
* چەمپيوناتتا 2 حەت-تريك, 8 دۋبل جاسالدى, 6 اۆتوگول سوعىلدى.

تۋرنير تابلوسى

25 ماۋسىم
3-تۋر

سامارا.
ۋرۋگۆاي – رەسەي 3:0
گولدار: لۋيس سۋارەس (10), دەنيس چەرىشەۆ (23, اۆتوگول), ەديسون كاۆاني (90)

ۆولگوگراد.
ساۋد ارابياسى – ەگيپەت 2:1
گولدار: موحاممەد سالاح (22) – ساليم ءال-فارادج (45-+6, پەنالتي), سالەم ءال-داۋساري (90+5)
سالىنباعان پەنالتي: فاحاد ءال-مۋۆاللاد (ە, 41, قاقپاشى)

26 ماۋسىم
كالينينگراد.
يسپانيا – ماروككو 2:2
گولدار: يسكو (19), ياگو اسپاس (90+1) – حاليد بۋتايب (14), يۋسسەف ءان-نەسيري (81)

سارانسك. يران – پورتۋگاليا 1:1
گولدار: كاريم انساريفارد (90+3, پەنالتي) – ريكاردۋ كۋارەجما (45)
سالىنباعان پەنالتي: كريشتيانۋ رونالدۋ (پ, 53, قاقپاشى)

سوچي. اۆستراليا – پەرۋ 0:2
گولدار: اندرە كارريلو (18),
پاولو گەررەرو (50)

ماسكەۋ. «لۋجنيكي».
دانيا – فرانتسيا 0:0

27 ماۋسىم
سانكت-پەتەربۋرگ. نيگەريا – ارگەنتينا 1:2
گولدار: ۆيكتور موزەس (51, پەنالتي) – ليونەل مەسسي (14), ماركوس روحو (86)

دونداعى روستوۆ.
يسلانديا – حورۆاتيا 1:2
گولدار: گيلفي تور سيگۋردسسون (76, پەنالتي) – ميلان بادەل (53), يۆان پەريشيچ (90)

مەرگەندەر كوشى

كريشتيانۋ رونالدۋ
 رومەلۋ روكاكۋ (بەلگيا)
دينيس چەرىشەۆ (رەسەي)
ديەگو كوستا (يسپانيا)

 گارري كەين  (انگليا)
ارتيوم دزيۋبا (رەسەي)
ميلە ەديناك  (اۆستراليا)
لۋكا مودريچ  (حورۆاتيا)
فيليپپە كوۋتينو  (برازيليا)
احمەد مۋسا  (نيگەريا)
ەدەن ازار  (بەلگيا)
دجون ستوۋنس  (انگليا)
لۋيس سۋارەس  (ۋرۋگۆاي)
موحاممەد سالاح  (ەگيپەت)