مەيىرىمدى, راقىمدى اللانىڭ اتىمەن
“شىن مانىندە, ءبىز اللاعا ءتانبىز ءاpi وعان قايتۋشىمىز…”
(باقارا سۇرەسى, 156-ايات)
يراننىڭ سولتۇستىك-باتىسىنداعى تاۋلى ايماقتا تىكۇشاق اپاتىنىڭ سالدارىنان يراننىڭ سىرتقى ىستەر ءمينيسترى حوسەين امير ابدوللاحيان جانە ولاردىڭ بىرنەشە سەرىكتەرىمەن بىرگە يران پرەزيدەنتى سەيىت يبراحيم رايسي دا شەيىت بولدى. شىعىس ازىربايجانعا «قىز قالاسى» شەكارالىق سۋ بوگەتىن اشۋ سالتاناتىنا قاتىسىپ قايتىپ كەلە جاتقان جولدا پرەزيدەنت پەن ونىڭ سەرىكتەرى مىنگەن تىكۇشاق شىعىس ءازىربايجان پروۆينتسياسىنداعى ۆەرزەگان مەن دجۋلفا اراسىنداعى اۋماقتا «ديزمار» ورمانىندا اپاتقا ۇشىرادى. اۋا-رايىنىڭ قولايسىزدىعى اپات بولعان جەردى انىقتاۋعا كەدەرگى تۋدىرعاندىقتان, قۇتقارۋ توپتارىنىڭ ايماققا جەتۋىن قيىنعا سوقتى.
اياتوللا رايسي بارلىق جاۋاپكەرشىلىك الاڭدارىندا وزىمەن بىرگە كىشىپەيىل قىزمەت پەن جيھاد رۋحىنىڭ حوش ءيىسىن الا كەلگەن يسلام رەۆوليۋتسياسىنىڭ ءبىرىنشى دەڭگەيدەگى شەنەۋنىكتەرىنىڭ ءبىرى بولدى. دانالىق جانە شىدامدىلىقپەن ۇشتاسقان ادىلدىك پەن قاراپايىمدىلىق, تاباندىلىق, كىشىپەيىلدىلىك جانە قاجىماس قايراتپەن حالىققا بارىنشا قىزمەت ەتۋ, مۇقتاج ادامداردىڭ ماسەلەلەرىن شەشۋدەگى قامقورلىق, ادامگەرشىلىك پەن حالىق اراسىندا قاراپايىم جانە شىنايى بولۋ, زاڭعا جانە بيلەۋشىگە ءىس جۇزىندە مويىنسۇنۋ, يمام مەن شەيىتتەردىڭ ارماندارىن جۇزەگە اسىرۋ جولىنداعى تالپىنىس – وسى جوعارى دارەجەلى قىزمەتشى ءارى يسلامدىق جۇيە باسقارۋشىسىنىڭ ەڭ كورنەكتى ەرەكشەلىكتەرى.
بۇل قايعىلى وقيعا قىزمەت ساپارى كەزىندە ورىن الدى. وسىناۋ اسىل دا جانقيار تۇلعانىڭ بۇكىل جاۋاپكەرشىلىك كەزەڭى, مەيلى پرەزيدەنتتىك قىسقا مەرزىمدە بولسىن, مەيلى وعان دەيىن بولسىن, حالىققا, ەلگە, يسلام دىنىنە ادال قىزمەت ەتۋ جولىنداعى تىنىمسىز ەڭبەكپەن ءوتتى. ول ءۇشىن اللانىڭ رازىلىعىن بىلدىرەتىن حالىقتىڭ يگىلىگى مەن رازىلىعى بارلىق نارسەدەن ارتىق بولدى جانە ىستەردى جاقسارتۋ مەن ىلگەرىلەتۋ جولىندا كۇندىز-ءتۇنى جۇمىس ىستەۋىنە ەشتەڭە كەدەرگى بولمادى.
ونىڭ ۇكىمەتىنىڭ ايقىن وڭ تۇستارىنىڭ ءبىرى – ەلدەگى ماڭىزدى ءارى داعدارىستى جاعدايلارداعى پرەزيدەنت پەن ونىڭ كابينەتى مۇشەلەرىنىڭ بەلسەندى قۇزىرى. پرەزيدەنت ءوز ۇكىمەتىنىڭ باسىنان-اق ماسەلەلەردى جاقىننان كورىپ, حالىقتىڭ اراسىندا بولىپ, ولارمەن تىكەلەي سويلەسۋ ءۇشىن ءوز كۇن تارتىبىنە ايماقتارعا ساپارلاردى ەنگىزگەن بولاتىن. ول ەلدەگى ماڭىزدى جاعدايلاردا, سونىڭ ىشىندە, سۋ تاسقىنى مەن جەر سىلكىنىسى سياقتى تابيعي اپاتتاردا كابينەت مۇشەلەرىمەن بىرگە داعدارىستى اۋىزدىقتاۋ ءۇشىن تىكەلەي اپات ورنىنا بارىپ, الدىڭعى قاتاردا جۇرەتىن. پرەزيدەنتتىڭ جيھادتىق رۋحى ءومىرىنىڭ سوڭىنا دەيىن حالىققا قىزمەت ەتۋ بولاتىن.
يبراحيم رايسي حالىق اراسىندا ءۇمىت تۋدىرىپ, ونى ارتتىرۋدى ءوز ۇكىمەتىنىڭ باستى جوباسى دەپ ساناپ: «قوعام مۇشەلەرىنىڭ سەنىمىن كۇننەن-كۇنگە ارتىرۋىمىز كەرەك. حالىقتىڭ ءۇمىتى مەن سەنىمىن ارتتىرۋ ءبىزدىڭ مىندەتىمىز»,-دەگەن ەدى. ءۇمىتتى ادام ادامدارعا ءۇمىت سىيلاي الادى, يسلام ۇكىمەتى مەن جۇيەسى ءۇشىن قىزمەت ەتەتىندەردىڭ بارلىعى ۇمىتپەن جۇمىس ىستەپ, ادامداردىڭ جۇرەكتەرىندە ءۇمىت وياتۋى كەرەك دەپ ەسەپتەدى.
بۇل رەۆوليۋتسياشىل باسشىنىڭ مودجاحەدتىك قىزمەتى مەن باسشىلىعىنىڭ بەرەكەتى ءالى دە جالعاسادى دەگەن ءۇمىت بار ەدى, بىراق وكىنىشكە وراي, بۇل تىلەك ورىندالمادى. وسى قايعىلى وقيعادان كەيىن يران حالقى شىنايى ءارى قۇندى قىزمەتشىسىنەن ايىرىلدى. اللا جار بولىپ, جولى ساۋاپقا تولى بولسىن!
