استانا اكىمى جەڭىس قاسىمبەك تۇرعىنداردىڭ ينتەرنەت ساپاسى مەن جىلدامدىعىنا قاتىستى شاعىمدارىنا قاتىستى پىكىر ءبىلدىردى
«ەلوردا تۇرعىندارى تاراپىنان ينتەرنەتتىڭ ساپاسى مەن جىلدامدىعىنا قاتىستى شاعىمدار ءتۇسىپ جاتىر. قالامىزدا مۇنداي پروبلەمالار بارى جاسىرىن ەمەس. نەگىزىنەن, قۇرىلىسى ءجۇرىپ جاتقان جاڭا اۋداندار مەن ەلدى مەكەندەردە كەزدەسەدى. سول سياقتى ينتەرنەت قۇرىلىس قارقىنىنا ىلەسە المايتىن ساتتەر دە بولىپ تۇرادى. بۇل ماسەلەدە قۇرىلىس كومپانيالارى بايلانىس قۇرىلىسىن قوسا ەسكەرۋىن, ال بايلانىس وپەراتورلارى مەن وزگە دە جاۋاپتى ورگاندار قۇرىلىستىڭ جوسپارىنا قاتىسۋىن قاراستىرامىز. وسىنداي وزەكتى ماسەلەلەردى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسينمەن, «قازاقتەلەكوم» باسشىسى قۋانىشبەك ەسەكەەۆپەن, ۇيالى بايلانىس وپەراتورلارىنىڭ وكىلدەرىمەن جانە ت. ب. بىرلەسە تالقىلادىق.
قالادا ينتەرنەتتىڭ ساپاسىن جاقسارتۋ ءۇشىن بىرنەشە مەحانيزمدى قولدانامىز. ولار – وپتيكالىق بايلانىس جەلىلەرىن, انتەننا-دىڭگەك قۇرىلىسىن, FWA (Fixed Wireless Access) تەحنولوگياسى بويىنشا بازالىق ستانتسيالاردى ورناتۋ. بۇل جۇمىسقا ينۆەستورلاردى دا جۇمىلدىرامىز.
سونىمەن قاتار جارىقتاندىرۋ جانە ەلەكتر جەلىسىنىڭ تىرەكتەرى بويىنشا وپتيكالىق بايلانىس جەلىلەرىن جۇرگىزۋ ماسەلەسى پىسىقتالدى, بۇل ەلدى مەكەندەردەگى ينتەرنەت ساپاسىن ەداۋىر جاقسارتادى. «كوكتال-1», «اگروقالاشىق», «ينتەرناتسيونالنىي», «وڭتۇستىك-شىعىس», «پرومىشلەننىي», «تەلمان», «ميچۋرين», «قازقالاشىق», «كيرپيچنىي» ەلدى مەكەندەرىندە وپتيكالىق بايلانىس جەلىلەرىن سالۋ جۇمىسى ءجۇرىپ جاتىر, تاعى 3 ەلدى مەكەن بويىنشا ينۆەستورلار تارتامىز. بىراق مۇنىڭ ءوزى دە جەتكىلىكسىز. قالا كۇننەن-كۇنگە ءوسىپ جاتىر, ال ەلوردا تۇرعىندارى جىل سايىن 50-60 مىڭ ادامعا ارتىپ كەلەدى. قولدا بار ينفراقۇرىلىمعا ءمان بەرىپ قانا قويماي, بولاشاقتى ويلاپ, الدىن الا دامىتۋ قاجەت. سول سەبەپتى الدىمىزدا مۇنداي پروبلەمالار سانىن ازايتۋ ءارى قۇرىلىس كەزەڭىندە بايلانىس قۇرىلىمدارىن قوسا سالۋ مىندەتى تۇر» دەدى قالا اكىمى جەڭىس قاسىمبەك.
