«استانا وپەرا» تەاترىنداعى ۆەنا كلاسسيكاسىنىڭ فەستيۆالىنە شاقىرىلعان شەتەل مۋزىكانتتارى مەن تەاتردىڭ شىعارماشىلىق ۇجىمى ءبىر اي بويى استانالىقتارعا كلاسسيكا جاۋhارلارىن ۇسىنادى. وسى فەستيۆال بارىسىندا موڭعوليالىق ديريجەر, كوپتەگەن حالىقارالىق بايقاۋدىڭ لاۋرەاتى مۋنحبايار ەردەنەبااتارمەن سۇحباتتاسۋدىڭ رەتى كەلدى.
– بۇل ءسىزدىڭ قازاقستانعا, استاناعا العاشقى ساپارىڭىز با؟ ءبىزدىڭ ەل جايلى اسەرىڭىز قانداي؟
– بۇل – استاناعا وسىمەن ەكىنشى رەت كەلۋىم. ەلورداعا ءبىرىنشى رەت كوكشەتاۋعا بارا جاتقاندا ءاتۇستى, اسىعىس سوققان ەدىم. سول ساپار بارىسىندا كوكشەتاۋداعى فيلارمونيالىق وركەسترمەن ونەر كورسەتىپ, «استانا وپەرا» تەاترىنىڭ ديريجەرى ابزال ءمۇحيتديننىڭ شەبەرلىك ساعاتىنا قاتىستىم.
– ماەسترو ابزال مۇحيتدينمەن قالاي تانىستىڭىز؟ وسى فەستيۆالگە ونىڭ شاقىرۋى بويىنشا قاتىسىپ جاتىرسىز با؟
– ءيا. ماەسترو ابزال مۇحيتدينمەن بىلتىر جازدا ول موڭعولياعا ساياحاتتاپ كەلگەندە تانىسقان ەدىك. سول كەزدە ەكەۋمىز تەز دوستاسىپ كەتتىك. سويلەسە كەلە, ءبىر-ءبىرىمىزدىڭ ديريجەر ەكەنىمىزدى بىلدىك. ابزال مۇحيتدين – ادام رەتىندە سەنىمدى, وتە جاقسى ادام, كەرەمەت پيانيست, كاسىبي مۋزىكانت, الەمدىك دەڭگەيدەگى ديريجەر.
– ءسىز قاي ەلدەردە ونەر كورسەتتىڭىز؟ قانداي حالىقارالىق فەستيۆالدەرگە قاتىستىڭىز؟
– كوپتەگەن فەستيۆالدەرگە قاتىسىپ ءجۇرمىن. «استانا وپەرادا» ءوتىپ جاتقان بۇل فەستيۆال ەرەكشە. بۇل وپەرا جانە بالەت تەاترى جاڭا بولعانمەن, ەۋروپا, ازيا ەلدەرىندە وتە تانىمال. مەن وسى تەاتردا ونەر كورسەتۋگە شاقىرىلعان موڭعوليادان كەلگەن العاشقى ديريجەر بولعانىما قۋانىشتىمىن. «استانا وپەرا» ساحناسىندا كلاسسيكالىق مۋزىكا كونتسەرتىمەن تۇڭعىش رەت ونەر كورسەتپەكشىمىن. بۇگىن باعدارلاماسى كەڭەيتىلگەن اۋقىمدى كونتسەرت بولماق. ءبىز ۆولفگانگ امادەي موتسارتتىڭ «فيگارونىڭ ۇيلەنۋى» وپەراسىنا ۋۆەرتيۋرا, ءتورت بولىمنەن تۇراتىن ءىرى شىعارما – №1 سيمفونيانى جانە ليۋدۆيگ ۆان بەتحوۆەننىڭ سكريپكاعا ارنالعان كونتسەرتىن ۇسىنامىز. كونتسەرتتە سكريپكانىڭ جەكە پارتياسىن الەمگە ايگىلى سكريپكاشى باعدات ءابىلحانوۆ ورىندايدى. ول وتە كاسىبي سكريپكاشى, سوندىقتان ونىمەن جۇمىس ىستەگەنىمە قۋانىشتىمىن.
– ءسىز ءوزىڭىزدىڭ باعدارلاماڭىز تۋرالى ايتتىڭىز, ال ۆەنالىق مۋزىكانىڭ ءسىز ءۇشىن ءمانى نەدە؟
– مەن ازيادان شىققان مۋزىكانتپىن, دىبىستار الەمىندە ءومىر سۇرەتىن مۋزىكانتپىن. موڭعوليا استاناسى – ۇلان-باتىردا ءبىلىم الدىم. موڭعول مەملەكەتتىك كونسەرۆاتورياسىندا رەسەي, گەرمانيا جانە فرانتسيادا وقۋ وقىعان كەرەمەت پەداگوگتار بولدى. سونداي-اق كلاسسيكالىق مۋزىكامەن قاتار, حالىق مۋزىكاسىمەن دە اينالىسامىن, مورينحۋر اتتى حالىق اسپابىندا ءداستۇرلى موڭعول مۋزىكاسىن ورىنداپ ءجۇرمىن. بۇل اسپاپتا جىلقىنىڭ قىلىنان جاسالعان ەكى ىشەك بار, ودان ورىلگەن ۇلتتىق اۋەندەر مەن دالا سازىن كوپشىلىك سۇيسىنە تىڭدايدى. «ونەردە جوق شەكارا» دەگەندەي, بالكىم, مەن كەلەشەكتە وسى جەرگە قايتا كەلىپ, «استانا وپەرا» سيمفونيالىق وركەسترىمەن بىرگە ونەر كورسەتەتىن شىعارمىن, سول كەزدە وسى مورينحۋر اسپابىندا قازاقستاندىق ارىپتەستەرىممەن بىرگە ويناۋشى ەدىم, ال ديريجەرىم ماەسترو ابزال مۇحيتدين بولسا دەپ ارماندايمىن. بۇل وتە ۇلكەن جوبا بولار ەدى.
