«استانا سۋ ارناسى» كاسىپورنى شاھاردى ۇزدىكسىز سۋمەن قامتاماسىز ەتۋ ءۇشىن جاڭا كوپجىلدىق ينۆەستيتسيالىق باعدارلامانى قولعا الدى. 2021-2025 جىلدار ارالىعىن قامتيتىن باعدارلامانى ءوز دەڭگەيىندە جۇزەگە اسىرۋ ءۇشىن 4 ميلليارد 700 ميلليون تەڭگە قاراجات قاراستىرىلعان. جىل سوڭىنا دەيىن كاسىپورىن بۇل باعىتتا جالپى كولەمى 882 ميلليون تەڭگەگە ءتۇرلى جۇمىستار جۇرگىزدى.
ينۆەستيتسيالىق جوبا, نەگىزىنەن, توزىعى جەتكەن ەنەرگەتيكالىق قۇرىلعىلاردى, سۋ سورعىلاردى اۋىستىرۋ, اۆتوماتتاندىرۋ جۇيەلەرىن ەنگىزۋ, سۋ جانە كاناليزاتسيا قۇبىرىن جاڭعىرتۋ سىندى كەشەندى شارالارعا باعىتتالدى.
– وتكەن جىلى ءبىز 2016 جىلى باستالعان اۋقىمدى ينۆەستيتسيالىق جوبانى اياقتادىق. بۇل جوبانى جۇزەگە اسىرۋعا 6,4 ميلليارد تەڭگە قاراجات جۇمسالدى. قاراجات كاسىپورىننىڭ جەكە قارجىسىنان قاراستىرىلعان. بىلتىر قالاداعى سۋمەن قامتاماسىز ەتۋ جۇيەلەرىن جەتىلدىرۋ ماقساتىنا 1 ميلليارد 470 ميلليون تەڭگە قارجى بولىنگەن بولاتىن.
بۇل قارجىعا كۇيشى دينا كوشەسى №2, №4 مەكەنجايلارىندا 400 مم ديامەترلى جالپى ۇزىندىعى 430 مەتر بولاتىن سۋ قۇبىرى تارتىلدى. تاۋەلسىزدىك داڭعىلى مەن قاجىمۇقان كوشەسىنىڭ قيىلىسىندا ۇزىندىعى 1,5 شاقىرىم بولاتىن سۋ قۇبىرى قايتا جاڭعىرتۋدان ءوتتى. سونىمەن قاتار ۋلترا دىبىستىق شىعىن ولشەۋىشتەر, جەر استىنداعى سۋ قۇبىرىن جانە ونىڭ تەسىلگەن تۇسىن انىقتايتان تەحنيكالىق جابدىقتار وندىرىستە قولدانىلا باستادى, – دەدى كاسىپورىن ديرەكتورىنىڭ ەكونوميكا جانە قارجى جونىندەگى ورىنباسارى ەلدار اسقاروۆ.
ونىڭ ايتۋىنشا, كاسىپورىن جىل باسىنان بەرى قالاداعى ق.مۇڭايتپاسوۆ كوشەسىنەن پەتروۆ كوشەسىنە دەيىنگى ارالىقتا سۋ قۇبىرىن جاڭارتۋ, يندۋستريالدى پاركتەگى سورعى ستانسانى جوندەۋ جانە تەحنيكالىق سۋ قۇبىرىنا قۇرىلىس-مونتاج جۇمىستارى جۇرگىزىلگەن. سونىمەن قاتار سورعى-سۇزگى ستانسالارىنداعى رەزەرۆۋارلار دا جوندەلگەن ەكەن.
