بۇگىندە تۇزەۋ مەكەمەسىنەن شىققانداردىڭ ءبىرازى كوپ ۇزاماي قايتا قىلمىسقا ۇرىنىپ, تەمىر تورعا قامالىپ جاتادى. جىل باسىنان بەرى استانادا قايتا قىلمىس جاساۋ وقيعاسى بويىنشا 23 فاكتى تىركەلگەن.
وسىنداي وقيعالاردىڭ الدىن الۋ ماقساتىندا استانا قالاسىندا ىشكى ىستەر ورگاندارىندا ەسەپتە تۇرعان تۇرعىندارمەن ارنايى كەزدەسۋلەر وتكىزىلىپ تۇرادى. كەزدەسۋگە جۇمىسپەن قامتۋ جانە الەۋمەتتىك ورتاعا بەيىمدەۋ ورتالىعىنىڭ ماماندارى شاقىرتىلىپ, ەسەپتە تۇرعان ازاماتتارعا تۇسىندىرمە جۇمىستارى جۇرگىزىلەدى.
كەشە الماتى اۋداندىق ىشكى ىستەر باسقارماسىندا وسىنداي تاعى ءبىر كەزدەسۋ بولىپ ءوتتى. كەزەكتى شاراعا ەسەپتە تۇرعان, بۇرىن سوتتالعان نەمەسە شارتتى تۇردە مەرزىمىنەن ەرتە بوساتىلعان 150-گە جۋىق ازامات شاقىرتىلىپتى. كەزدەسۋدە «بەيىمدەۋ تەحنولوگيالارى مەن تۇجىرىمدامالارى» قوعامدىق قورىنان كەلگەن وكىلدەر الەۋمەتتىك ماسەلەلەر بويىنشا جانە قۇقىقتىق كەڭەستەر بەرسە, استانا قالاسىنىڭ جۇمىسپەن قامتۋ ورتالىعى ماماندارى ەڭبەك نارىعىنداعى بوس جۇمىس ورىندارىمەن تانىستىردى.
– بۇگىندە الماتى اۋداندىق جەرگىلىكتى پوليتسيا قىزمەتىندە 458 ادام ەسەپتە تۇر. تۇزەۋ مەكەمەلەرىنەن شىققان ازاماتتار بىردەن قوعامعا ءسىڭىسىپ كەتە المايدى. سول سەبەپتى, بيىلعى جىلدان باستاپ مۇنداي ازاماتتارمەن پروفيلاكتيكالىق سۇحباتتار, كەزدەسۋلەر وتكىزۋدى قولعا الىپ وتىرمىز. بەيىمدەلۋ جولىندا قولدان كەلگەنشە كومەكتەر كورسەتىلەدى. ماسەلەن, وتكەن التى ايدىڭ ىشىندە 139 ەسەپتە تۇرعان ازامات الكوگول جانە ەسىرتكى تاۋەلدىلىگىنەن ارىلتۋ كۋرسىنان وتكىزىلدى. مۇنداي ازاماتتاردىڭ كوبىسى كەلەڭسىز جايتتارعا ءجيى تاپ بولىپ جاتادى. ونداي ساتتە كىمگە جۇگىنۋگە بولاتىنىن بىلمەيدى ءارى بۇرىن ءىستى بولعاندىقتان, ولاردى ەشكىم جۇمىسقا المايدى. سوسىن امالسىز ۇساق قىلمىسقا نەمەسە قۇقىق بۇزۋشىلىققا بارۋىنا تۋرا كەلەدى. وتكىزىپ جاتقان شارانىڭ باستى ماقساتى دا وسى – قوعامدىق بەيىمدەلۋگە كومەكتەسۋ, – دەيدى الماتى اۋداندىق ءىىب جەرگىلىكتى پوليتسيا قىزمەتى باسشىسىنىڭ ورىنباسارى, پوليتسيا پودپولكوۆنيگى ارمان ايتىبەكوۆ.
بۇركىت نۇراسىل
