ەرتەڭ ريو-دە-جانەيرودا ءحححى جازعى وليمپيادا ويىندارىنىڭ جالاۋى كوتەرىلەدى. تورتكۇل دۇنيە ءتورت جىل بويى تاعاتسىزدانا كۇتكەن بايراقتى جارىستا 207 ەلدەن 10 مىڭنان اسا اتلەت سىنعا تۇسەدى. ءدۇبىرلى دودادا قازاقستان نامىسىن 104 سپورتشى قورعايتىن بولادى.
ريو-دە-جانەيرو الاڭدارىنداعى جارىستار 5-21 تامىز ارالىعىندا وتەدى.
التىن ءۇشىن ايقاس
ريو ويىندارى – تاۋەلسىز قازاقستاننىڭ دەربەس مەملەكەت رەتىندە قاتىسىپ وتىرعان التىنشى وليمپياداسى. وسىعان دەيىنگى قاتىسقان بارلىق ويىنداردان قازاقستاندىق سپورتشىلار جۇلدەسىز قايتقان ەمەس. ەڭ باستىسى, ءار جارىستان ەنشىمىزگە التىن مەدال بۇيىردى. دەمەك, قازاقستان سايىپقىراندارى برازيلياعا دا التىن ءۇشىن ايقاسقا اتتانارى ايقىن.
برازيلياعا قازاقستان قۇراماسى الدىن الا جوسپارلانعان قۇرامدا قاتىسا الماي وتىر. ونىڭ ءارتۇرلى سەبەپتەرى دە جوق ەمەس. اتاپ ايتقاندا, بىرنەشە سپورتشىمىز جاراقات الۋلارىنا بايلانىستى ءدۇبىرلى جارىسقا قاتىسا المايتىن بولدى. وسى رەتتە, ەڭ وكىنىشتىسى, ارينە, ءتورت بىردەي وليمپيادا ويىندارى چەمپيوندارىنىڭ ريو-دە-جانەيرو ويىندارىنان شەتتەتىلگەنى بولدى. دوپينگ داۋىنا ىلىككەن يليا يلين, مايا مانەزا, ءزۇلفيا چينشانلو جانە سۆەتلانا پودوبەدوۆا ەندى تەك جانكۇيەرلەر قاتارىنان كورىنەدى. ريو-دە-جانەيرو ويىندارىنا قازاقستان كوماندالىق ويىن سپورتى تۇرلەرى بويىنشا ەشقانداي جارىسقا قاتىسپايدى. وليمپيادالىق ىرىكتەۋ تۋرنيرلەرىندە باق سىناعان فۋتبول, ۆولەيبول, سۋ دوبى, باسكەتبول, رەگبي قۇرامالارى ناتيجەلى كورسەتكىش كورسەتە المادى.
باستى ءۇمىتىمىز – بوكس قۇراماسىندا
ريو-دە-جانەيروعا اتتانعان سپورتشىلارىمىزدىڭ قاتارىندا جەڭىل اتلەتتەرىمىزدىڭ قاتارى كوپ. جەڭىل اتلەتيكانىڭ بىرنەشە تۇرىنەن سىنعا تۇسەتىن 26 سپورتشىمىزعا ءۇمىت ارتامىز. ولاردىڭ ىشىندە لوندون ويىندارىنىڭ چەمپيونى ولگا رىپاكوۆا بار. ءۇش قارعىپ سەكىرۋدەن سوڭعى جارىستاردا ءتاپ-ءتاۋىر ناتيجە كورسەتىپ جۇرگەن جەرلەسىمىزگە جانكۇيەرلەر دە سەنىممەن قارايتىنى ءسوزسىز.
باستى ءۇمىتىمىز بوكس قۇراماسىندا ەكەنىن جاسىرمايمىز. ءويتكەنى, بوكسشىلار عانا ءار وليمپيادا ويىندارىنان بىرنەشە جۇلدەمەن ورالىپ ءجۇر. برازيلياعا قازاقستان ۇلتتىق قۇراماسى ءبىرىنشى رەت تولىق قۇرامدا بارا جاتىر. ەرلەر باسەكەسىندە 10 بوكسشىمىز شارشى الاڭعا شىقسا, ايەلدەر باسەكەسىندە ەكى بۇرىمدى قىزدارىمىز باق سىنايتىن بولىپ وتىر. بوكستى ايتقاندا الدىمەن التىن مەدال جايىندا ءسوز قوزعايتىنىمىز دا انىق. بۇل جولى دا, قۇدايعا شۇكىر, جەڭىس تۇعىرىنىڭ ەڭ بيىك ساتىسىنا كوتەرىلەتىن جىگىتتەرىمىز جوق ەمەس. اتاپ ايتار بولساق, الەمدىك رەيتينگتە كوش باستاپ جۇرگەن ءبىرجان جاقىپ (49 كەلى), دانيار ەلەۋسىنوۆ (69 كەلى), ادىلبەك نيازىمبەتوۆ (81 كەلى) جانە ەڭ اۋىر سالماقتا ايقاساتىن يۆان دىچكو سىندى جىگىتتەرىمىزدىڭ قايسىسى بولسا دا التىن جۇلدەگەر اتانۋعا جاراپ تۇر. باسقا سالماقتاعى بوكسشىلارىمىزدىڭ دا جۇلدەگە قول سوزۋعا مۇمكىندىگى بار. تۇپتەپ ايتقاندا, قازاقستان بوكسشىلارىنا ارتىلاتىن جاۋاپكەرشىلىك تە, سەنىم دە سالماقتى بولماق.
كۇرەسكە كەلسەك, گرەك-ريم بالۋانى نۇرماحان تىناليەۆ پەن المات كەبىسباەۆ, ايەلدەر كۇرەسىندە بەلدەسەتىن گيۋزەل مانيۋروۆا جۇلدەگەرلەر قاتارىنان كورىنىپ قالادى دەگەن ۇمىتتەمىز. ءبىر ايتارلىعى, بۇگىندە استانادا تۇراتىن گيۋزەل مانيۋروۆا – وسىعان دەيىنگى ەكى وليمپيادا ويىندارىندا كۇمىس مەدال العان مىقتى بالۋاننىڭ بىرەگەيى. 2004 جىلى رەسەي اتىنان, 2012 جىلى قازاقستان اتىنان جارىسقا تۇسكەن بولاتىن. مۇمكىن ءۇشىنشى وليمپىندە التىنعا قولى جەتەر مە ەكەن؟!
ەل نامىسىن قورعايتىن ەلوردالىقتار
برازيلياعا اتتانعان قازاقستان قۇراماسى ساپىندا 18 استانالىق سپورتشى بار. ەلوردا سپورتشىلارى توعىز سپورت تۇرىنەن سىنعا تۇسەتىن بولادى.
ەل نامىسىن قورعايتىن ەلوردالىق سپورتشىلاردىڭ بايراقتى باسەكەگە تىڭعىلىقتى دايىندىق جۇرگىزۋىنە استانا قالاسىنىڭ دەنە شىنىقتىرۋ جانە سپورت باسقارماسى تاراپىنان جان-جاقتى جاعداي جاسالدى. بۇگىندە بارلىق سپورتشىلار ريوعا اتتانىپ كەتتى.
سونىمەن, وليمپيادا ءجۇلدەسى ءۇشىن سايىسقا تۇسەتىن استانالىقتارعا ساتتىلىك تىلەي وتىرىپ, ولاردىڭ ەسىمدەرىن قۇرمەتپەن اتاپ ءوتۋدى ءجون كوردىك. ريو-دە-جانەيرو شارشى الاڭىندا بوكسشىلار دانيار ەلەۋسىنوۆ پەن ۆاسيلي لەۆيت, تەننيس كورتىندا ياروسلاۆا شۆەدوۆا مەن گالينا ۆوسكوبوەۆا, گرەك-ريم كۇرەسى كىلەمىندە المات كەبىسباەۆ پەن دوسجان قارتيكوۆ, ايەلدەر كۇرەسىندە گيۋزەل مانيۋروۆا مەن جۇلدىز ەشيموۆا, قازىرگى بەسسايىستا ەلەنا پوتاپەنكو مەن پاۆەل يلياششەنكو, بايداركا جانە كانوە جارىسىندا يننا كلينوۆا, زويا انانچەنكو جانە ولەگ توكارنيتسكي, جۇزۋدە ەكاتەرينا رۋدەنكو, جەڭىل اتلەتيكادا فلوريدا مەنيانوۆا, ۇستەل تەننيسىندە كيريلل گەراسيمەنكو ەل نامىسىن قورعايتىن بولادى.
عالىم قوجابەكوۆ
