كادر دايىنداۋ يندۋستريالاندىرۋ قاجەتتىلىگىن ەسكەرۋى ءتيىس
ەلىمىزدە يندۋستريالاندىرۋدىڭ ەكىنشى بەسجىلدىعىنىڭ قاجەتتىلىگىنە ساي كادر دايىنداۋ قولعا الىنادى.
بۇل تۋرالى وتكەن اپتادا جامبىل وبلىسىندا جۇمىس ساپارىمەن بولعان پرەمەر-ءمينيستردىڭ ورىنباسارى گۇلشارا ابدىقالىقوۆا مالىمدەدى. م.ح.دۋلاتي اتىنداعى تاراز مەملەكەتتىك ۋنيۆەرسيتەتىندە تەحنيكالىق جانە كاسىبي ءبىلىم بەرۋ ماسەلەسىنە قاتىستى وتكىزىلگەن جينالىستا ول ءبىلىم جانە عىلىمي ۆيتسە-ءمينيسترى تاحير بالىقباەۆقا يننوۆاتسيالىق دامۋ مينيسترلىگى, ۇلتتىق كاسىپكەرلەر پالاتاسى, «كاسىپقور» حولدينگى, «قازفوسفات, «بىرلەسكەن حيميالىق كومپانيا» جانە تاعى دا باسقا مۇددەلى مەملەكەتتىك ورگاندارمەن اقىلداسا وتىرىپ, ايماقتىڭ وندىرىستىك سالاسىنىڭ باسىم باعىتتارىن كادرمەن قامتاماسىز ەتەتىن وقۋ ورنىن انىقتاۋعا تاپسىرما بەردى.
جالپى, گۇلشارا ناۋشاقىزىنىڭ ايتۋىنشا, الەمدىك تاجىريبەدە بولاشاق مامانداردى قانداي كاسىبي بىلىكتىلىككە ۇيرەتۋ كەرەك دەگەن ماسەلە ارىپتەس-جۇمىسبەرۋشىلەمەن كەڭەسۋ ناتيجەسىندە شەشىلەدى. سوندىقتان ءبىلىم بەرۋ سالاسىن ەڭبەك نارىعىنىڭ سۇرانىسىنا جاۋاپ بەرەتىندەي رەفورمالاۋ – مەملەكەتتىڭ تاياۋ جىلدارى جۇزەگە اسىرۋى ءتيىس باستى مىندەتتەرىنىڭ ءبىرى.
وكىنىشكە قاراي, كادر دايىنداۋدا ەكونوميكانىڭ ناقتى سەكتورىنا بەيىمدەۋ, جەرگىلىكتى ەڭبەك نارىعىن باعدارلاۋ بىلىم بەرۋ مينيسترلىگىنىڭ نازارىنان تىس قالىپ وتىر. بۇل جونىندە جينالىستا بۇلتارتپاس دالەل دە كەلتىرىلدى.
«ماسەلەن, ماڭعىستاۋ وبلىسىندا مۇناي-گاز سالاسىنا مامان دايىنداۋدى توقتاتا تۇرۋ تۋرالى ءبىلىم جانە عىلىم مينيسترلىگىنىڭ پىكىرىن ەسكەرمەستەن جاسالدى. سوندىقتان ءبىز ءبىلىم سالاسىنداعى قۇزىرەتتى ورگاننىڭ, جەرگىلىكتى اتقارۋشى ورگان جانە جۇمىس بەرۋشىلەردىڭ جۇمىسىن ءبىر جۇيەگە كەلتىرۋىمىز» كەرەك دەدى پرەمەر-ءمينيستردىڭ ورىنباسارى گۇلشارا ابدىقالىقوۆا.
