ادىلبەك جاقسىبەكوۆ, استانا قالاسىنىڭ اكىمى: استانالىقتاردىڭ ارىز-شاعىمدارى ايرىقشا نازارعا الىنادى
كەشە استانا اكىمدىگىندە قالا باسشىسى ادىلبەك جاقسىبەكوۆتىڭ توراعالىعىمەن اپپاراتتىق كەڭەس ءوتتى. كەڭەس بارىسىندا اكىم قالاداعى اعىمداعى جاعداي بويىنشا ەسەپتى تىڭداپ, پروبلەمالىق جانە الەۋەتتى ماسەلەلەرگە توقتالدى.
– مەملەكەت باسشىسى الدىمىزعا اۋقىمدى ءارى كۇردەلى مىندەتتەر قويدى. ولار ەكونوميكالىق وسىمگە, ەلوردانىڭ ينۆەستيتسيالىق كليماتىن جاقسارتۋعا سەرپىن بەرەدى. بۇل قۇرىلىس, كولىك جانە باسقا دا ماڭىزدى سالالارعا, سونىڭ ىشىندە ەنەرگيا تيىمدىلىگىن ارتتىرۋعا باعىتتالعان سالالارعا قاتىستى, – دەدى ءا.جاقسىبەكوۆ.
اتالعان ماسەلە «ەكسپو-2017» حالىقارالىق مامانداندىرىلعان كورمەسىن وتكىزۋ قارساڭىندا اسا وزەكتى. بۇگىندە استانانى ەل ورداسى, ەۋرازيانىڭ گەوگرافيالىق ورتالىعى رەتىندە عانا ەمەس, سونداي-اق, «جاسىل ەكونوميكانى» دامىتۋعا بەت العان تەحنولوگيالىق, عىلىمي, «اقىلدى» قالا رەتىندە دە تانىستىرۋ كەرەك.
جاڭا مىندەتتەردى جۇزەگە اسىرۋ ءۇشىن بارلىق قالالىق قۇرىلىمدار جۇمىلىپ جۇمىس ىستەۋ كەرەك.
– سىزدەردىڭ ارقايسىلارىڭىز استانانى دامىتۋدىڭ ورتاق, جاھاندىق ماقساتىن تۇسىنۋگە, تۇتاستاي جاعدايدى كورىپ, ءوزارا قالاي ارەكەت ەتۋ كەرەگىن ۇعىنۋعا تيىسسىزدەر. اپتا سايىن وتكىزىلەتىن وسىنداي جينالىستار سول ءۇشىن قاجەت, – دەدى ەلوردا اكىمى.
قالا باسشىسى كوممۋنالدىق قىزمەتتەردىڭ جۇمىسىن جاقسارتۋ جونىندەگى ماسەلەلەرگە باسا نازار اۋداردى. بۇل ەڭ الدىمەن قار تازالاۋعا, قالانى جىلۋ مەن ەلەكتر ەنەرگياسىمەن قامتۋعا قاتىستى.
اكىم استانا اكىمدىگىنىڭ رەسمي سايتىنداعى «ۆيرتۋالدى قابىلداۋ», «حالىقتىق باقىلاۋ» ايدارلارىنا جانە «051» قىزمەتىنە كەلىپ تۇسكەن وتىنىشتەر مەن شاعىمداردى جەكە باقىلاۋىنا الدى. قالا اكىمى ورىنباسارلارى مەن اۋدان اكىمدەرىنە ءبىرىنشى كەزەكتە ازاماتتاردان كەلىپ تۇسكەن ارىز-شاعىمداردى ءتيىستى شەشىمىن تاپقانشا نازاردا ۇستاۋدى تاپسىردى.
سونىمەن قاتار, قالا باسشىسى اۆتوتۇراقتار ماسەلەسىن دە كوتەردى. جاقىندا جول قوزعالىسى ەرەجەلەرىنىڭ جاڭا رەداكتسياسى قايتا جارىق كورگەن ەدى. وعان سايكەس كولىكتى جول بويىندا قالدىرۋعا
تىيىم سالىنعان. الايدا, قالا باسشىسى بۇگىندە قالادا اۆتوتۇراقتار مەن كولىك قوياتىن ارناۋلى ورىنداردىڭ جەتىسپەۋشىلىگىنە بايلانىستى كولىك يەلەرىن قولداپ, ءىىد قىزمەتكەرلەرىنە وسىنداي جاعدايلاردى نازارعا الۋدى تاپسىردى.
بۇدان باسقا, اكىم پرەزيدەنتتىڭ جاياۋ جۇرگىنشىلەرگە ارنالعان جەراستى جانە جەرۇستى وتكەلدەرىن سالۋ جونىندەگى تاپسىرماسىن ورىنداۋ قاجەتتىگىنە توقتالدى. بۇل دا جول قاۋىپسىزدىگىنە, كەپتەلىستەردىڭ ازايۋىنا وڭ اسەرىن تيگىزبەك.
سونىمەن قاتار, قالا باسشىسى زاڭسىز ساۋدا فاكتىلەرى بويىنشا رەيد جۇرگىزۋدى, ءتارتىپ بۇزۋشىلارعا قاتىستى ءتيىستى اكىمشىلىك شارالار قابىلداپ, بۇدان بىلاي مۇنداي جاعدايلارعا جول بەرمەۋدى تاپسىردى.
سونداي-اق, اپپاراتتىق كەڭەستە جاڭادان تاعايىندالعان استانا قالاسى اكىمى اپپاراتىنىڭ باسشىسى ەدىل مامىتبەكوۆ, استانا قالاسىنىڭ پروكۋرورى سابىرجان بەكبوسىنوۆ پەن استانا قالاسى بويىنشا مەملەكەتتىك كىرىس دەپارتامەنتىنىڭ باسشىسى ابىلقايىر سقاقوۆ تانىستىرىلدى.