ءار اپتانىڭ سوڭىندا قالىپتاسقان ادەت بويىنشا ورتالىق كوممۋنيكاتسيالار قىزمەتىنىڭ الاڭىندا ەل ايماقتارىنىڭ الەۋمەتتىك-ەكونوميكالىق دامۋ كورسەتكىشتەرى جاريالانۋدا. كەشەگى بريفينگ قوناعى قىزىلوردا وبلىسىنىڭ اكىمى قىرىمبەك كوشەرباەۆ بولدى.
«وبلىس ەكونوميكاسى, نەگىزىنەن, مۇناي-گاز جانە ۋران وندىرىسىنە ارقا سۇيەۋدە. الايدا, قازبا بايلىقتارى سارقىلىپ, كەن ورىندارىن پايدالانۋ مەرزىمى اياقتالىپ كەلەدى. دەگەنمەن, مۇناي ءوندىرۋ كولەمى ازايعانىمەن, وڭدەۋ ونەركاسىبىندەگى ءونىم كولەمىن تومەندەتپەي ۇستاپ تۇرمىز» دەپ ءسوزىن باستاعان كۇرىشتى ولكەنىڭ باسشىسى ايماقتا ءوندىرىستىڭ وزگە سالالارىن دامىتۋ جوسپارلارىن ايتا كەتتى. وسى جوسپارلار ىسكە اساتىن بولسا, بولاشاقتا سىر ءوڭىرى ءىرى ءوندىرىستى ولكەگە اينالۋى مۇمكىن. ماسەلەن, بيىل «شالقيا» كەن ورنىندا قۋاتتىلىعى 4 ملن تونناعا دەيىن باراتىن تاۋ-كەن بايىتۋ كومبيناتىنىن قۇرىلىسى باستالماق. قىزىلوردا قالاسىندا ارنايى جانە كەشەندى قورىتپالاردى وندىرەتىن فەرروقورىتپا زاۋىتىن سالۋ دا وسى جىلدىڭ ەنشىسىندە. بۇل ءوندىرىس وشاقتارىنا مامانداردى دايارلاۋ قازىردىڭ وزىندە قولعا الىندى. اكىمنىڭ ايتۋىنشا, وبلىس مەكتەپتەرىن بيىل بىتىرگەن 130 تۇلەك رەسەيدىڭ جانە قازاقستاننىڭ تەحنيكالىق وقۋ ورىندارىنا جىبەرىلدى.
وڭىرگە قاتىستى وزگە اقجولتاي جاڭالىقتارعا كەلسەك, قىزىلوردا اۋەجايى وتكەن قازان ايىندا حالىقارالىق دارەجەسىن يەلەندى. سونىڭ ارقاسىندا كوپكە ۇزاماي قىزىلوردالىقتار بەيجىن, ستامبۋل, ماسكەۋ, دۋبايعا تىكەلەي ۇشۋعا مۇمكىندىك الادى.
ايماق مەديتسيناسى دا دامۋ ۇستىندە. وبلىستىق پەريناتالدىق ورتالىق پايدالانۋعا بەرىلدى. دونورلىق بۇيرەك الماستىرۋ جاعىنان قىزىلوردا ەلىمىزدەگى ءتورت ايماقتىڭ قاتارىنا كىردى.
ءبىلىم بەرۋ سالاسىنا توقتالساق, «بالاپان» باعدارلاماسى بيىل 89 پايىزعا ورىندالدى. كەلەسى جىلى وبلىس 3-6 جاس ارالىعىنداعى بالالاردى مەكتەپكە دەيىنگى بىلىممەن قامتۋدى تولىق ورىنداۋدى جوسپارلاپ وتىر.
وبلىس «اقبۇلاق» باعدارلاماسىن ورىنداۋ كورسەتكىشى بويىنشا ءبىرىنشى ورىندا كەلەدى. ونداعى ەلدىمەكەندەر
71 پايىزعا اۋىز سۋمەن قامتىلعان.
وڭىردەگى تۇيتكىلدى ماسەلەلەرگە كەلسەك, ول, ارينە, بايقوڭىر مەن ارال. بىلتىر وبلىس اۋماعىنا رەسەيدىڭ «پروتون» زىمىرانتاسىعىشى قۇلاپ, ايماق حالقىنا وتەماقى تولەنبەي كەلەدى. قىرىمبەك كوشەرباەۆتىڭ ايتۋىنشا, بۇل ماسەلە وسى ايدىڭ اياعىندا رەسەي وكىلدەرىنىڭ قاتىسۋىمەن وتەتىن جيىندا شەشىلمەك. بايقوڭىرداعى مەكتەپتەر دە رەسەي ستاندارتتارىمەن ءبىلىم بەرىپ كەلەدى. ايماق باسشىسىنا سەنسەك, كەلەسى جىلدىڭ 1 قىركۇيەگىنەن بايقوڭىرداعى 6 مەكتەپ قازاقستان ستاندارتتارىنا كوشىرىلەدى.
ارالدى قالپىنا كەلتىرۋ جۇمىستارى دا جۇرگىزىلۋدە. قىرىمبەك ەلەۋۇلى بۇل ءۇشىن ەلباسىنا راحمەت ايتۋىمىز كەرەكتىگىن جەتكىزدى. مەملەكەت باسشىسىنىڭ ارالاسۋىمەن ارالدىڭ سولتۇستىك بولىگى قالپىنا كەلىپ قالدى. كەلەسى جىلى بۇل جۇمىستاردىڭ ەكىنشى كەزەڭى باستالماق. قازىردىڭ وزىندە سۋدىڭ جاعاعا جەتۋىنە 17 شاقىرىمداي جەر عانا قالعان ەكەن.
امانعالي شميتۇلى
