كوزدى اشىپ-جۇمعانشا كۇللى الەمدى ءبىر تارىنىڭ قاۋىزىنا سىيعىزىپ جىبەرگەن كوروناۆيرۋس ىندەتى جۇرتشىلىقتىڭ دارىگەر ماماندىعىنا دەگەن كوزقاراسىن تۇبەگەيلى وزگەرتىپ جىبەردى.
اسا قاتەرلى ىندەتپەن كۇرەستىڭ العى شەبىندە جۇرگەن اق حالاتتى ابزال جانداردى بۇگىنگى كۇننىڭ باتىرلارى دەسەك, اسىرىپ ايتقانىم بولماس. اسىرەسە دەرتكە داۋا, ەمگە شيپا ىزدەگەن قامكوڭىل جاندار ءۇشىن اياۋلى دارىگەردىڭ جىلى شىراي تانىتىپ, مەيىرىممەن قارسى الۋىنىڭ ءوزى-اق جارتى اۋرۋدىڭ بەتىن بىردەن قايتارۋ ءۇشىن جەتىپ جاتىر. ۇلى فيلوسوف ءارى دارىگەر يبن سينانىڭ مىناداي ءسوزى بار ەكەن: «دارىگەردىڭ ءۇش قارۋى بار: ءبىرىنشىسى – پىشاق, ەكىنشىسى – ءشوپ, ءۇشىنشىسى – ءسوز». ءبىزدىڭ حالقىمىزدا دا «دارىگەردىڭ ءوزى ەمدەمەيدى, ءسوزى ەمدەيدى» دەگەن اتالى ءسوز بەكەرگە ايتىلماسا كەرەك-ءتى.
مۇنىڭ ءبارىن قاۋزاپ وتىرعان سەبەبىم, مەن 50 جاستان اسقان سوڭ دەنساۋلىعىما بايلانىستى دارىگەرلەرگە ءجيى قارالامىن. قازىر جاسىم جەتپىستىڭ جەتەۋىنە اياق باستى. وسى جاسقا امان-ەسەن جەتۋىمنىڭ ءوزى ءبىرىنشى – اللا, ەكىنشى – وتباسىم, ءۇشىنشى – وسى دارىگەرلەرىم دەسەم ارتىق ايتقاندىعىم ەمەس. ءوزىم تىركەلگەن نۇر-سۇلتان قالالىق 13-ەمحانادا زۋحرا مۇراتقىزى سۇلتانعاليەۆا ەسىمدى اياۋلى دارىگەر ەڭبەك ەتەدى. مەن بۇل دارىگەرگە ۇزاق قارالدىم. جانە ونىڭ كاسىبي قابىلەتىنە, بيىك پاراساتتىلىعىنا ءدان ريزا بولىپ, اق باتامدى بەرىپ ءجۇرمىن. «جاقسىنىڭ جاقسىلىعىن ايت, نۇرى تاسىسىن» دەگەندەي, ءوزىمنىڭ ۇزاق جىلعى سۇيىكتى گازەتىم «استانا اقشامى» ارقىلى سول اياۋلى جانعا شىنايى العىسىمدى بىلدىرگىم كەلەدى.
مەندە سوزىلمالى جۇرەك سىرقاتى بار ەدى. ۇكىمەت تاراپىنان جۇرەك جانە قان قىسىمنىڭ 4-5 ءتۇرلى ءدارىسى تەگىن بەرىلەدى. زۋحرا دارىگەرگە تەكسەرىلىپ, قان ساراپتاماسىن تاپسىرىپ جۇرگەنىمە دە 4-5 جىلدان استى. بيىل 20 قازاندا تاعى دا سول دارىگەردىڭ قابىلداۋىندا بولدىم. ەسىكتەن ەنتىگە كىرىپ كەلگەنىمدە بىردەن: «اتا, ءسىز قاتتى ەنتىگىپ تۇرسىز عوي, دەرەۋ قان تامىرلارىڭىزدى تەكسەرۋ كەرەك» دەدى. مەن زەرتحانادان بەرگەن تالداۋ ناتيجەلەرىن ۇسىنىپ, «ءبارى جاقسى دەپ تۇر عوي» دەسەم دە, «جوق, تەز ارادا قان تامىرىڭىزدى تەكسەرتىڭىز» دەدى. ەگەر سول دارىگەرىم ايتىپ, ماجبۇرلەمەگەندە, مەن كوپ ۇزاماي جارىق دۇنيەمەن قوشتاسىپ تا كەتەر مە ەدىم. بارىپ تەكسەرگەندە, جۇرەككە باراتىن ەكى تامىرىم بىتەلىپ قالىپتى. وتا جاساتىپ, جانىم قالدى. سوسىن دا بۇگىن قولىما قالام الىپ, سول زۋحرا قىزىما «ەڭبەگىڭ جانسىن قارعام, بالا-شاعاڭنىڭ قىزىعىن كور» دەگەن اتالىق العىسىمدى ايتىپ وتىرمىن.
دارىگەر مەنى قان تامىرىن تەكسەرۋ ءۇشىن قالالىق №2 اۋرۋحاناعا جىبەردى. بۇل اۋرۋحاناعا مەنىڭ ءبىرىنشى رەت جاتۋىم. 2 كۇن وتكەندە مەنىڭ تامىرىمدى تەكسەرىپ ماعان كۇردەلى وتا جاساماقشى بولدى. بارلىق ءتيىستى تالداۋ-ساراپتامالارىن الىپ, تەكسەردى. كارديولوگيا بولىمشەسىنىڭ باستىعى مەنىڭ ەگدە جاسىما بايلانىستى «وتا كۇردەلى بولادى» دەپ بىردەن ەسكەرتتى. وتا بولىمشەسىنىڭ باستىعى ا.ۆ.سمولەنسكي, قان قىسىمى بولىمشەسىنىڭ باستىعى ت.ب.دجانپايزوۆ سول بولىمشەنىڭ مەنى قارايتىن دارىگەر ر.ت.سۋبانباەۆا ءبارى اقىلداسا كەلە, اقىرى 3-4 ايعا ستەنت قوياتىن بولىپ كەلىستى. مەنىڭ نەگىزى ايتايىن دەگەنىم سول, وتا جاسايتىن دارىگەرلەر مەن مەيىربيكەلەرىنىڭ بىلىكتىلىگى مەن استى-ۇستىڭە ءتۇسىپ اتالاپ تۇراتىن كىشىپەيىلدىگىنە ءدان ريزا بولدىم. وسى ورايدا ولارعا دا العىسىمدى جاۋدىرىپ, اتالىق اق باتامدى بەرەمىن. تاۋەلسىز ەلدىڭ سەندەردەي بىلىكتى ماماندارى كوپ بولسىن, وركەندەرىڭ ءوسسىن! كەلەشەك ۇرپاعىمىزدىڭ سالاۋاتتى, ەل بولاشاعىنىڭ ەڭسەلى بولۋىندا انتىنا ادال, ءوز ىستەرىنە شىنايى بەرىلگەن ابزال جاندارعا ارتىلار جاۋاپكەرشىلىك جۇگى دە ءاردايىم زور دەپ سانايمىن. قازىرگىدەي ىندەت پەن نارىق قوس وكپەدەن قاتار قىسقان كۇردەلى كەزەڭدە ادامدار ءبىر اۋىز جىلى سوزگە ءزارۋ.
ەندەشە, ءبىر-بىرىمىزدەن جىلى ءسوزىمىزدى ايامايىقشى, اق حالاتتى اياۋلى جاندارىمىزدى ايالايىقشى دەگىم كەلەدى.
داۋلەت امانجولوۆ,
ەڭبەك ارداگەرى
نۇر-سۇلتان قالاسى
