ەلورداداعى ەلباسى كىتاپحاناسىندا قر تۇڭعىش پرەزيدەنتى كۇنىنە ارنالعان «كوڭىلدىڭ اسىل پەرنەسى» اتتى حالىقارالىق شىعارماشىلىق كونكۋرستىڭ جەڭىمپازدارىن ماراپاتتاۋ ءراسىمى ءوتتى.
قر تۇڭعىش پرەزيدەنتى-ەلباسى كىتاپحاناسى, نۇرسۇلتان نازارباەۆ قورى, حالىقارالىق تۇركى اكادەمياسى, م.وتەمىسوۆ اتىنداعى وقۋشىلار سارايى, نۇر-سۇلتان قالاسى اكىمدىگى بىرلەسىپ وتكىزگەن بايقاۋدىڭ قورىتىندىسىن جاريا ەتۋگە مادەنيەت سالاسىنىڭ كورنەكتى وكىلدەرى مەن مەملەكەت قايراتكەرلەرى قاتىستى. كونكۋرسقا بيىل 167 ءوتىنىم كەلىپ تۇسكەن. ونىڭ ىشىندە يندونەزيا, وزبەكستان, قىرعىز رەسپۋبليكاسى, تاتارستان, قىتاي جانە رەسەي ونەرپازدارى بار. ماراپاتتاۋ ءراسىمىنىڭ الدىندا ءسوز سويلەگەن قر مادەنيەت جانە سپورت ۆيتسە-ءمينيسترى نۇرعيسا داۋەشەۆ بۇل شارانىڭ مادەنيەت دامۋىندا ۇلكەن ءرول اتقاراتىنىن اتادى.
«ەلباسىمىز «قازاقستاننىڭ بولاشاعى – ءبىلىمدى جاستاردىڭ قولىندا» دەپ ايتقان بولاتىن. سوندىقتان بۇگىنگى شارانى ۇيىمداستىرۋشىلارعا مادەنيەت جانە سپورت مينيسترلىگىنىڭ اتىنان ۇلكەن العىس بىلدىرەمىز. مەملەكەت باسشىسى قاسىم-
جومارت كەمەلۇلى ءوز جولداۋىندا ەلباسىمىزدىڭ سارالى ساياساتىن جالعاستىرۋ ارقىلى سپورت پەن شىعارماشىلىققا جاقىن جاستاردىڭ الەۋەتىن ارتتىرۋ تۋرالى تاپسىرما بەرگەن بولاتىن. سول ماقساتتا ەلدىڭ ءار بۇرىشىندا ءتۇرلى شارالار وتىكىزىلىپ, جۇمىستار اتقارىلىپ جاتىر. مۇنىڭ ءبارى ەلدىڭ بولاشاعى ءۇشىن جاسالىپ وتىر. ەلباسى نۇرسۇلتان نازارباەۆتىڭ ونەرگە, مادەنيەتكە دەگەن قولداۋىنىڭ ارقاسىندا تەاترلارىمىز, كونتسەرتتىك ۇيىمدارىمىز, مۋزەيلەرىمىز بۇگىنگى تاڭدا حالىقارالىق ونەر ۇجىمدارىمەن تەرەزەسى تەڭ ونەر كورسەتىپ ءجۇر. ەلباسىنىڭ كەيىنگى 30 جىلداعى تىكەلەي قولداۋىنىڭ ارقاسىندا ەلىمىزدە قانشاما تەاتر, قانشاما كونتسەرتتىك ۇيىمدار اشىلدى؟! سونىڭ ءبارى ونەرپاز جاستاردىڭ تالانتىن ۇشتاپ, تالابىن جانۋ ءۇشىن جاسالىپ جاتىر» دەدى ءمينيستردىڭ ورىنباسارى.
ايتا كەتۋ كەرەك, شەتەلدىك ونەرپازدار اراسىندا وتكەن «اسەم ءانىم سىرنايداي» نوميناتسياسىنىڭ جەڭىمپازدارى ونلاين بايلانىس ارقىلى ماراپاتتالدى. بايقاۋدىڭ باس جۇلدەسىن «نۇر-سۇلتان قالاسىنداعى №66 مەكتەپ-ليتسەي وقۋشىسى رامازان مانسۇر يەلەندى.
بايان اسىلبەكوۆا
