كاسىپكەرلىككە كەڭ ءورىس اشىپ وتىر
وتكەن جازدا ۇلتتىق كاسىپكەرلەر پالاتاسى مەن «قازاقستان حالىق بانكى» اق اراسىندا ىنتىماقتاستىق جونىندە مەموراندۋمعا قول قويىلدى. 6-13 تامىز ارالىعىندا, ءبىر اپتا ىشىندە ەلىمىزدىڭ ءىرى قالالارىندا 22 كەڭەس بەرۋ ورتالىعى اشىلىپ, كاسىپكەرلەرگە ءتۇرلى تەگىن قىزمەتتەر كورسەتىلە باستادى. ماسەلەن, سول ورتالىقتاردا «بيزنەستىڭ جول كارتاسى – 2020», «وڭدەۋشى ونەركاسىپ سالاسىنداعى شاعىن جانە ورتا بيزنەس سۋبەكتىلەرىن قولداۋ», «جۇمىسپەن قامتۋدىڭ جول كارتاسى – 2020», «اگروبيزنەس – 2020» سەكىلدى مەملەكەتتىك باعدارلامالار بويىنشا تۇسىندىرمە جۇمىستارى جۇرگىزىلىپ كەلەدى. جاقىندا استانا قالاسىنىڭ كاسىپكەرلەر پالاتاسى, «قازاقستان حالىق بانكى» اق جانە «دامۋ» كاسىپكەرلەردى قولداۋ قورىنىڭ ۇيىمداستىرۋىمەن «كاسىپكەر كۇنى» شاراسى وتكىزىلدى. وندا وسى ۇيىمداردىڭ ماماندارى كاسىپكەرلەرگە ۇسىنىپ وتىرعان جوبالارى جايىندا اڭگىمەلەدى.
قازاقستان حالىق بانكى شاعىن جانە ورتا بيزنەستى قولداۋعا ارنالعان نەسيەلەۋ باعدارلامالارىن ۇسىنىپ وتىر. «حالىق كاسىپكەر», «جەدەلدەتىلگەن حالىق كاسىپكەر», «حالىق بيزنەس ستارت», «بيزنەس medium», «بيزنەس كەلىسىمشارت», «بيزنەس دەپوزيت», «وۆەردرافت (كاسىپورىنداردى قىسقا مەرزىمدىك نەسيەلەۋ باعدارلاماسى)», «حالىق-اگرو» دەپ اتالاتىن بۇل نەسيەلەر تۋرالى بانك ماماندارى جان-جاقتى اقپارات بەرىپ, بۋكلەتتەردى تاراتتى.
– «حالىق بيزنەس ستارت» باعدارلاماسى ءوز ءىسىن ەندى عانا باستاعان كاسىپكەرلەرگە ارنالادى. ياعني, كاسىپكەر رەتىندە تىركەلگەنىنە ءبىر جىل بولا قويماعان زاڭدى تۇلعالارعا ۇسىنىلادى. بۇل توپقا جەكە كاسىپكەرلەر مەن جاۋاپكەرشىلىگى شەكتەۋلى سەرىكتەستىكتەر جاتادى. 1,5 ملن تەڭگەدەن 20 ملن تەڭگەگە دەيىن قارجىلاندىرۋ سوماسى 3 ايدان 60 ايعا دەيىن مەرزىمگە بەرىلەدى. كاسىپكەرلەر ونىڭ 30 پايىزىن دەپوزيتكە كەپىلگە سالادى, ال 70 پايىزىنا «دامۋ» قورى كەپىلدىك بەرەدى. مىسالى, كاسىپكەر 10 ملن تەڭگەنى قاجەت ەتسە, دەپوزيتىندا جاتقان 3 ملن تەڭگە نەسيە الۋعا ابدەن جەتكىلىكتى. بۇل جاعدايدا جىلجىمايتىن مۇلىكتى كەپىلگە سالۋدىڭ كەرەگى جوق. بيىل ىسكە قوسىلعان بۇل باعدارلاماعا كاسىپكەرلەر ۇلكەن قىزىعۋشىلىق تانىتۋدا. بىراق, «حالىق بيزنەس ستارت» ارقىلى نەسيە العىسى كەلەتىندەر الدىمەن «بيزنەس كەڭەسشى» باعدارلاماسى بويىنشا وقۋدان ءوتىپ, ساۋاتتى بيزنەس جوسپار ۇسىنۋلارى شارت, – دەيدى بانكتىڭ استانا وڭىرلىك فيليالىنىڭ شاعىن بيزنەسكە ساتۋ قىزمەتىن ۇسىنۋ ورتالىعىنىڭ باسشىسى انجەليكا قايىرجانوۆا.
«دامۋ» كاسىپكەرلەردى قولداۋ قورىنىڭ مەنەدجەرى سەرىك دوساليەۆتىڭ ايتۋىنشا, قور «بيزنەستىڭ جول كارتاسى – 2020» باعدارلاماسى شەڭبەرىندە كاسىپكەرلەردى كەشەندى قولداۋ ءىسىن جۇرگىزىپ كەلەدى. اتاپ ايتساق, سۋبسيديالاۋ جانە كەپىلدەندىرۋ باعدارلامالارى بويىنشا كومەك بەرىلەدى. سونداي-اق, «ىسكەرلىك بايلانىستار» جوباسى ارقىلى نازارباەۆ ۋنيۆەرسيتەتى مەن شەتەلدەردە وقۋعا قۇزىرەتتىلىكتى جوعارىلاتۋ قىزمەتىن كورسەتەدى. «سۋبسيديالاۋعا 14 پايىزدان اسپايتىن نەسيەلەر جاتادى. ونىڭ 7 پايىزىن نەسيە الۋشى, قالعانىن «دامۋ» قورى تولەيدى. نەسيە 3 جىلعا الىنادى, الايدا كاسىپكەرلەر ونى 10 جىلعا ۇزارتۋ مۇمكىندىگىنە يە» دەيدى ول. قوسىمشا اقپاراتتى damu.kz سايتىنان جانە قاجىمۇقان كوشەسى, 8ا مەكەنجايىندا ورنالاسقان كاسىپكەرلەرگە قىزمەت كورسەتۋ ورتالىعىنا كەلىپ الۋعا بولادى.
تولىق اقپارات الۋ ءۇشىن «قازاقستان حالىق بانكى» اق ءاوف شاعىن جانە ورتا بيزنەسكە ساتۋ ورتالىعىنىڭ +7 717 2 591 150 جانە +7 7172 591 183 بايلانىس تەلەفوندارىنا حابارلاسۋعا بولادى.
امانعالي شميتۇلى