ءا.مامبەتوۆ اتىنداعى مەملەكەتتىك دراما جانە كومەديا تەاترى وسى جىلدىڭ العاشقى پرەمەراسىن ۇسىندى. كورنەكتى جازۋشى, دراماتۋرگ ورالحان بوكەيدىڭ اڭگىمەلەرى جەلىسىمەن ساحنالانعان «اۋىل حيكايالارى-2» دراماسى – وسىنىڭ الدىندا اتالمىش ونەر وشاعىندا قويىلعان «اۋىل حيكايالارى» سپەكتاكلىنىڭ جالعاسى. قويۋشى رەجيسسەرلەرى – ءالي بيداحمەت پەن نۇرجىگىت ءمۇسىلىموۆ.
ورالحاننىڭ «دوس سىرى» اتتى اڭگىمەسىندە التاي دەگەن قويشى جىگىتتىڭ ماحاببات حيكاياسىن شەرتەتىنى بار. سپەكتاكل سول كورىنىستەن باستالادى. بىراق رەجيسسەرلەر كوركەم شىعارمانى دالمە-ءدال كوشىرە سالماي, بىرنەشە اڭگىمەنى ارالاستىردى. اتاپ ايتقاندا, «كۇلپاشتىڭ
ۇرشىعى», «قۇمار قول بۇلعاپتى», «بەس تيىن», «ىزدەگەنىن تاپتى ما؟», «200 گرامم ەنەرگيا», «ءوزى سۇيگەن», جوعارىدا اتالعان «دوس سىرى» اڭگىمەلەرىنەن جىپ-جىلى قويىلىم دۇنيەگە كەلدى. سول ارقىلى كورەرمەندەر قالامگەردىڭ كەيىپكەرلەرىمەن قايتا قاۋىشتى. ارمانشىل التاي, ونىڭ العاشقى ماحابباتى ەركەجان مەن جارى كۇمىسايىم, ءوز ىسىڭە ادال پوچتا باستىعى زاكەڭ, اڭشى قۇمار كوركەم شىعارمادان تەاتر ساحناسىنا كوشىرىلدى. اراسىندا اڭگىمەلەردىڭ اۆتورى, ياعني ورالحان بوكەيدىڭ دە بەينەسىن كوردىك. ونى اكتەر ماعجان تۇراربەك سومدادى.
وسىنىڭ الدىنداعى «اۋىل حيكاياسى» دراماسى ورالحان بوكەيدىڭ «اپامنىڭ استاۋى», «قوش, ماحابباتىم» جانە «ماڭدايدان باعىڭ شايقالسا» اڭگىمەلەرىنەن قۇراستىرىلعان ەدى. ەكى سپەكتاكلدىڭ دە قويۋشى رەجيسسەرلەرىنىڭ ءبىرى ءالي بيداحمەتتىڭ ايتۋىنشا, ءبىرىنشى قويىلىمعا سىيماي قالعان اڭگىمەلەردى ەكىنشى سپەكتاكلگە ەنگىزۋگە مۇمكىندىك تۋدى.
«اۋىل حيكايالارى» دراماسىن جالعاستىرۋعا كورەرمەندەر تۇرتكى بولدى. ويتكەنى ءبىرىنشى قويىلىمدى ولار وتە جاقسى قابىلداپ, دراما كوڭىلدەرىنەن شىقتى. وسى سپەكتاكل قويىلعان سايىن زالىمىز تولىپ وتىراتىن. سوسىن سپەكتاكلدى جالعاستىرىپ, جىلدىڭ باسىن سونىمەن باستايىق دەپ شەشتىك. تاعى ءبىر سەبەپ: ەكسپەريمەنت جاساپ كورگىمىز كەلدى. تەاتر قويىلىمدارىندا «1», «2» دەگەندى كورمەيمىز عوي, بۇل كينوعا ءتان دۇنيە. بىزگە سونى ساحناعا كوشىرۋ, حالىقتىڭ قالاي قابىلدايتىنى قىزىق بولدى. سوسىن قالا تۇرعىندارىن اۋىل ومىرىنە ساپار شەككىزسەك, ءسويتىپ اۋىلعا, بالالىق شاققا ساعىنىشىن باسساق دەگەن دە ماقسات قويدىق» دەيدى ءالي بيداحمەت.
مۋزىكا – كەز كەلگەن سپەكتاكلدىڭ اجىراماس بولشەگى. «اۋىل حيكايالارى-2» دراماسىنا وتكەن عاسىردىڭ الپىسىنشى جىلدارىنان باستاپ, بەرتىنگە دەيىنگى اندەر ەنگىزىلدى. اتاپ ايتقاندا, سىدىق مۇحامەدجانوۆتىڭ «قىرمانعا كەل, قالقاتاي», ءشامشى قالداياقوۆتىڭ «باقىت قۇشاعىندا», ۇلىقپان جولداسوۆتىڭ «تابيعاتىم-ماحابباتىم» اندەرى اكتەرلەردىڭ ورىنداۋىندا بەرىلدى. سپەكتاكلدە نەگىزىنەن اۋىل حالقىنىڭ تازا, كىرشىكسىز كوڭىلى, ەش ارامدىعى جوق, اڭقاۋ, اڭعال كەيپى مەنمۇندالاپ تۇردى. كەيىپكەرلەردى مامبەتوۆ تەاترىنىڭ تاجىريبەلى اكتەرلەرى – مادەنيەت قايراتكەرى ايبول شاكىرجانوۆ, مادەنيەت سالاسىنىڭ ۇزدىكتەرى گۇلميرا جاكيلينا, اجار شاكىرجانوۆا جانە جاستار اسەرلى سومداپ شىقتى. سونىڭ ىشىندە بىزگە ەرنۇر بالماش (سەرگەي), اقجول امانتاي (قۇمار), اينۇر جۇماباەۆا (ەركەجان), نۇرايىم تەزەكباەۆا (جاس كۇمىسايىم) سىندى اكتەرلەردىڭ كەيىپكەرلەردى بەرۋى ۇنادى. قويىلىمدا كەزدەسۋ مەن قوشتاسۋ, قۋانىش پەن مۇڭ, ماحاببات پەن قيماستىق سەزىمدەرى استاستى.
ءالي بيداحمەت پەن نۇرجىگىت ءمۇسىلىموۆ الدىنداعى «اۋىل حيكايالارى» دراماسىن ۇستازدارى, قازاقستاننىڭ ەڭبەك سىڭىرگەن قايراتكەرى سايلاۋ قاميەۆپەن بىرگە ساحنالادى. سول كەزدە ۇستازدارىنىڭ ماتەريال تاڭداۋدا, باعىت-باعدار بەرۋدە ۇلكەن كومەگى ءتيدى. سودان الىنعان تاجىريبە ارقىلى جالعاسىن قويۋعا بەل بۋدى. ەندى «اۋىل حيكايالارى-3» بولا ما دەگەن زاڭدى سۇراق تۋىندايدى. ءالي بيداحمەتتىڭ ايتۋىنشا, ول تاعى كورەرمەنگە بايلانىستى. «اۋىل حيكايالارى-2» سپەكتاكلىن جاقسى قابىلداسا, ءارى قاراي دا جالعاسىپ كەتۋى مۇمكىن.
