استانا قالاسى اكىمدىگىنىڭ ءبىلىم باسقارماسىنا قاراستى ادىستەمەلىك ورتالىعىنىڭ ۇيىمداستىرۋىمەن قادىر مىرزا ءالى اتىنداعى BINOM School مەكتەپ-ليتسەيىندە اقىننىڭ تۋعان كۇنىنە وراي ونىڭ شىعارماشىلىعىنا ارنالعان «قادىر الەمى» تاقىرىبىندا فەستيۆال وتكىزىلدى.
اقىننىڭ قازاق پوەزياسىنا قوسقان ايرىقشا ۇلەسىن دارىپتەپ, كوپشىلىككە تەرەڭىنەن ناسيحاتتاۋ ماقساتىندا ونىڭ بۇكىل بولمىس-ءبىتىمىن, تۇلعالىق قادىر-قاسيەتىن جەتكىنشەكتەرگە جەتكىزۋ ماقساتىندا ۇستازدار قاۋىمى سەكتسيالارعا ءبولىنىپ, ءۇش باعىتتا بايگەگە ءتۇستى. ءبىرىنشى باعىت «ولەڭ – ونەر پەرنەسى» تاقىرىبىندا اقىننىڭ شىعارماشىلىعىن بەينەلەۋ ونەرى ارقىلى دارىپتەۋگە باعىتتالسا, «ءبىر جاقسىسى تىلگە ەرىك بەرگەن ەكەن» اتتى ەكىنشى باعىتتا اقىن ولەڭدەرىن وقۋ جانە وعان ارناۋلارىن وقۋعا مۇمكىندىك بەرىلدى. ال ءۇشىنشى «قازاق وسى – كۇي شىعارىپ, ءان سالىپ» باعىتى بويىنشا قادىر مىرزا ءالىنىڭ سوزىنە جازىلعان اندەردى ورىنداۋ باستى نازارعا الىندى.
شىعارماشىلىق فەستيۆالىندە ۇستازدار اراسىندا وزا شاۋىپ, بايگە العان جەڭىمپازداردى اقىن, عالىم سەرىكزات دۇيسەنعازى ءى, ءىى جانە ءىىى دارەجەلى ديپلومدارمەن ماراپاتتاپ, بەلسەندى قاتىسقان ۇستازدارعا ارنايى سەرتيفيكاتتاردى تاپسىردى. كەش سوڭى قادىر مىرزا ءالى اتىنداعى BINOM School مەكتەبىنىڭ ۇستازدارى ازىرلەگەن اقىننىڭ سوزىنە جازىلعان اۋەزدى اندەرمەن اياقتالدى.
ايجان سەرىكقىزى,
استانا قالاسى
اكىمدىگىنىڭ «رۋحانيات»
مەملەكەتتىك مەكەمەسى
ءباسپاسوز قىزمەتىنىڭ
جەتەكشىسى
