ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ كونتسەرت زالىندا اسا كورنەكتى كۇيشى-كومپوزيتور, ديريجەر, قاز كسر جانە كسرو حالىق ءارتىسى, مەملەكەتتىك سىيلىقتىڭ لاۋرەاتى, حالىق قاھارمانى نۇرعيسا تىلەنديەۆتىڭ شىعارماشىلىعىنا ارنالعان «كەلە جاتىر قۇس قايتىپ» كونتسەرتى ءوتتى.
كەشتىڭ وتۋىنە اتالمىش ونەر ۇجىمىنىڭ قازاق وركەسترى (كوركەمدىك جەتەكشىسى, باس ديريجەرى – قازاقستاننىڭ ەڭبەك سىڭىرگەن قايراتكەرى, پروفەسسور ايتقالي جايىموۆ, ديريجەرى – مادەنيەت قايراتكەرى نۇرلان بەكەنوۆ) ۇيىتقى بولدى. كونتسەرت شىمىلدىعى دا وسى وركەستردىڭ ورىنداۋىندا «التىن ءدان» پوەماسىمەن اشىلدى. ءارى قاراي «قىز جىبەك» فيلمىنە ارنايى جازىلعان «كوش كەرۋەن» تۋىندىسى مەن «اققۋ» كۇيى, «جەڭىس سالتاناتى» شىعارماسى, رۋحتى كوتەرەتىن «ماحامبەت», «اڭساۋ» كۇيلەرى شارىقتادى.
كەشكە ارنايى قوناق بولىپ كومپوزيتوردىڭ قىزى, مايتالمان مۋزىكانت نەگىزىن قالاعان نۇرعيسا تىلەنديەۆ اتىنداعى اكادەميالىق ەتنوگرافيالىق-فولكلورلىق «وتىرار سازى» وركەسترىنىڭ كوركەمدىك جەتەكشىسى, باس ديريجەرى, قازاقستاننىڭ ەڭبەك سىڭىرگەن قايراتكەرى ءدىنزۋحرا تىلەنديەۆا قاتىستى. ونىڭ ديريجەرلىگىمەن قازاق وركەسترى «اتا تولعاۋى» كۇيىن, باسقا دا شىعارمالاردى ورىندادى. وركەستردىڭ سۇيەمەلدەۋىمەن مادەنيەت سالاسىنىڭ ۇزدىگى بوتاگوز ءتاشىموۆا سىمقوبىزبەن «اباي تابيعاتى», رەسپۋبليكالىق بايقاۋلاردىڭ لاۋرەاتى دانيار بايجۇمانوۆ «القيسسا» كۇيلەرىن ورىندادى.
نۇرعيسا تىلەنديەۆ كوپتەگەن ولمەس تۋىندىلار جازىپ قالدىردى. ونىڭ اندەرىن بۇگىنگە دەيىن ەل ءسۇيىپ تىڭداپ, شىرقايدى. سونداي شىعارمالارىنىڭ قاتارىنداعى «اكە تۋرالى جىر» (مۇحتار شاحانوۆ), كومپوزيتوردىڭ جارى داريعاعا ارنالعان «كۋا بول» (تۇمانباي مولداعاليەۆ), «كەلە جاتىر قۇس قايتىپ» (تۇمانباي مولداعاليەۆ), «الاتاۋ» (نۇرسۇلتان الىمقۇلوۆ), «جۇرەگىم مەنىڭ» (تۇمانباي مولداعاليەۆ) اندەرى اۋەلەدى. سونداي-اق «اق قۇسىم» (باكىر تاجىباەۆ), «اجەمە» (مۇقاعالي ماقاتاەۆ), «ماحاببات تاڭى» (تۇمانباي مولداعاليەۆ) اندەرى ورىندالدى. بۇل تۋىندىلاردى بەلگىلى انشىلەر, قازاقستاننىڭ ەڭبەك سىڭىرگەن قايراتكەرلەرى ايگۇل قوسانوۆا, سۆەتلانا ايتباەۆا, «دارىن» مەملەكەتتىك جاستار سىيلىعىنىڭ لاۋرەاتى التىنبەك ءابىلدا, حالىقارالىق بايقاۋلاردىڭ لاۋرەاتتارى التىنبەك ارىستانبەك, تالعات اللابيرينوۆ شىرقادى. ال كەش شىمىلدىعى بارلىق انشىلەردىڭ ورىنداۋىندا «ءوز ەلىم» (قادىر مىرزا ءالى) انىمەن جابىلدى.
