ادامنىڭ مىنەز-قۇلىعىن بۇزاتىن نارسەنى كورمەۋ
اۋزى بەرىك ادام بوس ۋاقىتىن ءناپىل عيباداتتارمەن, عىلىممەن, كىتاپ وقۋمەن, سونىڭ ىشىندە قۇران وقۋمەن, زىكىر, سالاۋات ايتۋمەن وتكىزگەنى ابزال. ەستە ۇستايتىن ءبىر جايت, اللا تاعالا ەشقاشان دا پەندەسىنىڭ ورازاسى مەن قۇلشىلىعىنا مۇقتاج ەمەس. قايتا پەندەلەر وزدەرىن جامان قىلىقتاردان ارىلتىپ, ەكى دۇنيەدە دە جاقسىلىققا كەنەلۋدە اللا تاعالاعا قۇلشىلىق جاساۋعا كوبىرەك مۇقتاج. جۇزدەرىڭىزدە نۇر, جۇرەكتەرىڭىزدە يمان كوبەيە بەرسىن!
تۋعان-تۋىس پەن مۇقتاج جاندارعا ساداقا بەرۋ
رامازان ايى – اللا تاعالانىڭ مەيىرىمىنە بولەنىپ, جانناتقا جەتۋدىڭ جولدارىن جەڭىلدەتۋگە بەرىلگەن كەرەمەت مۇمكىندىك. وسى قاسيەتتى ايدا اعايىن-تۋىستاردىڭ اماندىعىن ءبىلىپ, ارازداسقان جاندارمەن تاتۋلاسۋ ساۋاپقا جاتادى. ءبىر-بىرىمەن رەنجىسكەن ادامدار كەشىرىم جاساپ, مىندەتتى تۇردە تاتۋلاسۋى كەرەك. كىم ءبىرىنشى بولىپ تاتۋلاسسا, سول ۇلكەن ساۋاپ الادى.
اللانىڭ ەلشىسى (س.ا.ۋ.): «مالدارىڭدى زەكەت بەرۋ ارقىلى قورعاڭدار, اۋرۋلارىڭدى ساداقا بەرۋ ارقىلى ەمدەڭدەر, تىلەيتىن دۇعالارىڭمەن باستارىڭا كەلەتىن پالەدەن قورعانىڭدار» دەگەن. زەكەت تە, ساداقا دا باي مەن كەدەيدىڭ اراسىن جاقىنداستىرۋمەن قوسا ءمارت ادامدى شىنايى جومارتتىق يەسى اللا تاعالاعا جاقىنداتادى. حاق جارشىسى مۇحاممەد (س.ا.ۋ.): «جومارت – اللاعا, جانناتقا جانە حالىققا جاقىن, جاھاننامنان الىس. ساراڭ – اللادان, ءجانناتتان جانە حالىقتان الىس, جاھاننامعا جاقىن» دەپ جومارتتىقتىڭ سىيى ءجاننات ەكەنىن ايتقان. راقىم ايىندا بەرگەن ساداقالارىڭىز, زەكەتتەرىڭىز قابىل بولسىن!
اللاعا قۇلشىلىقتى كوبەيتۋ
رامازان ايىنىڭ سوڭعى ون كۇنىندە مەشىتتە بولىپ, قۇلشىلىققا بەرىلۋ – سۇننەت. پايعامبارىمىز (س.ا.س.) رامازاننىڭ سوڭعى ون كۇنىندە كوپ عيبادات جاساعان. بۇل كۇندەرى اللا تاعالانى ءجيى ەسكە الىپ, قۇران وقىپ, ونى تىڭداپ, ماعىناسىنا وي جۇگىرتىپ, وعان امال قىلعان ابزال. پايدالى دارىستەردى تىڭداۋ ءۇشىن اۋزى بەرىك ادام بوس ۋاقىتىن مەشىتتە وتكىزگەنى ءجون. تاراۋىق نامازى – رامازان ايىندا وقىلاتىن ساۋابى مول عيبادات. تاراۋىق رۋحىمىزعا ازىق بەرىپ, پەندەنى بۇ دۇنيەنىڭ قاربالاس تىرلىگىنەن الىستاتىپ, اللاعا جاقىنداتادى. پايعامبارىمىز (س.ا.س.): «كىمدە-كىم رامازان ايىندا تاراۋىقتى شىن كوڭىلمەن ساۋابىن اللادان كۇتىپ وقىسا, ونىڭ وتكەن كۇنالارى كەشىرىلەدى» دەگەن. اللا تاعالا وقىعان نامازىمىزدى, ورازامىزدى, كۇللى يگى امالدارىمىزدى قابىل العاي, دوستارىم!
قاۋىپتى كەسەلدەردەن ارىلۋعا پايدالانۋ
ەرىك-جىگەردى جيناقتاپ, اسقان ۇستامدىلىق تانىتىپ, تەمەكىنى كۇندىز شەكپەگەندەي, تۇندە دە شەكپەڭىز. سول كەزدە دەنساۋلىعىڭىزدى ساقتايسىز ءارى تەمەكى ساتىپ الۋعا جۇمسالاتىن اقشاڭىزدى دا ۇنەمدەيسىز.
ورازانىڭ دەنساۋلىققا پايداسىنىڭ ءبىرى – تاۋەلدىلىكتى جەڭۋگە كومەكتەسەدى. مىسالى, اۋىز بەكىتۋ نيكوتين, كوفەين سياقتى زياندى زاتتارعا تاۋەلدىلىكتەن ارىلۋعا جاردەمدەسەدى. ارينە, بۇل جەردە ەڭ الدىمەن ادامنىڭ ءوزىنىڭ شىنايى قالاۋى بولۋى شارت. رامازان ايىندا كۇندىز اۋىز بەكىتىپ, تۇندە عيبادات ەتۋ ارقىلى زياندى ادەتتەردەن ارىلۋعا ارەكەت جاساسا, اللا تاعالانىڭ سول ادامعا جەڭىلدىك بەرەتىنى حاق.
قادىر ءتۇنىن قۇران وقىپ, دۇعامەن وتكىزۋ
قادىر ءتۇنى اراب تىلىنەن اۋدارعاندا «قاسيەتتى ءتۇن» دەگەن ماعىنانى بىلدىرەدى. بۇل ءتۇن رامازان ايىنىڭ سوڭعى ون كۇنىنىڭ بىرىندە بولادى. قۇران كارىمدە: «بۇل تۇندە كەلەسى جىل ىستەرىنىڭ تاعدىرى جازىلادى» دەلىنگەن. اللا تاعالانىڭ كالەمى قۇران كارىمدە قۇراننىڭ قادىر ءتۇنى تۇسىرگەنى تۋرالى ايتىلادى. اللا تاعالا بۇل ءتۇندى بەرەكەلى ەتىپ, باسقا تۇندەردەن ەرەكشەلەگەن. وسى ءتۇندى مىڭ ايدان دا قايىرلى ەتتى. ەسەپتەسەك, مىڭ اي دەگەنىمىز – 83 جىل 4 اي ەكەن. دەمەك, قادىر تۇنىندەگى قۇلشىلىعىمىز 83 جىلدىق عيباداتتىڭ ساۋابىنا تەڭ بولماق. بۇل ءتۇنى پەرىشتەلەر جەرگە ءتۇسىپ, اللانىڭ كەشىرىمى ءناسىپ بولادى. حاديستە ايتىلعانداي, جەرگە تۇسەتىن پەرىشتەلەردىڭ سانى مايدا تاستاردان دا كوپ بولادى. پەرىشتەلەر مۇسىلماندارعا سول تۇندە تاڭ قىلاڭ بەرگەنشە سالەم بەرىپ تۇرادى. سالەم – حاق تاعالانىڭ جاقسىلىعى. ەندەشە, ورازاسىن ۇقىپپەن ۇستاعان ءار مۇسىلمان سول تۇندە شىنايى ىنتامەن قۇران وقىپ, ءناپىل جانە قازا نامازدارىن وقىپ, ءتۇندى دۇعامەن وتكىزگەنى ابزال. اللانىڭ ەلشىسى (س.ا.س.): «كىم قادىر ءتۇنىن يمانمەن جانە ساۋاپ تىلەپ, نامازدا تۇرۋمەن وتكىزسە, وتكەن كۇنالارى كەشىرىلەدى» دەيدى. اللادان تىلەگەن دۇعا-تىلەكتەرىڭىز قادىر تۇنىنە ءدوپ كەلسىن, قادىرلى جاماعات! بەيبىتشىلىك, اماندىق تۇنىندەگى حاق تاعالانىڭ جىبەرگەن سالەمىنەن قۇر قالمايىق!
ورازاڭ قابىل بولسىن, ۇستاعان جان!
دايىنداعان تولەن تىلەۋباي
