ايلاردىڭ سۇلتانى اتانعان رامازان – ساۋاپ, كەشىرىم, قۇلشىلىق ايى. بۇل ايدا العاش اۋىز بەكىتكەن جانداردىڭ كوكەيىندە كوپتەگەن ساۋالدار تۋىندايدى. ەندەشە, ورازامىز قابىل بولىپ, پايداسى ءتيۋى ءۇشىن ون كەرەك كەڭەستى ازىرلەدىك. ازىرگە ءتورت كەڭەستى نازارلارىڭىزعا ۇسىنامىز.
ءبىرىنشى كەڭەس
كوركەم مىنەز-قۇلىق ۇستانۋ
كۇپىرلىكتەن, دىنگە, دىلگە ءتىل تيگىزۋدەن, ورازا ەكەنىمىزدى مىندەت قىلىپ, اينالامىزداعى ادامدارمەن جامان قارىم-قاتىناس جاساۋدان ساقتانۋىمىز كەرەك. ورازا مىنەز-قۇلىعىمىزدى بۇزبايدى, كەرىسىنشە, ونى تۇزەيدى, ال كۇپىرلىك ادامدى دىننەن شىعارادى. اللانىڭ ۇلىق ەلشىسى (ساللالاھۋ الەيھي ءۋا ءساللام): «كىمدە-كىم وتىرىك ءسوز بەن وعان امال قىلۋدان تىيىلماسا, اللاعا ونىڭ ءىشىپ-جەۋدەن تىيىلۋىنىڭ قاجەتى جوق» دەپ ايتقان ء(ال بۇحاري).
ەكىنشى كەڭەس
جامان سوزدەن اۋلاق بولۋ
ايتپەسە تۇتقان ورازامىز زايا كەتەدى. اللانىڭ ەلشىسى (س.ا.ۋ.): «قايسىبىرىڭنىڭ ورازا تۇتاتىن كۇنى بولسا, وندا بۇزىقتىق ىستەمەسىن, ايعاي-شۋ شىعارماسىن, ال بىرەۋ ونى بالاعاتتاسا نەمەسە وعان سوقتىقسا: «مەن ورازا تۇتقان اداممىن!» دەسىن, – دەپ ايتقانىن ءاردايىم ەستە ۇستاۋ قاجەت ء(ال بۇحاري, مۋسليم).
ءۇشىنشى كەڭەس
اۋىزاشاردا شەكتەن تىس تاماقتانباۋ
اۋىزاشاردا تاماقتى شەكتەن تىس قارپىماۋ كەرەك. بۇل – ورازانىڭ پايداسىن كەمىتەدى, ءارى دەنساۋلىققا زيانىن تيگىزەدى.
پايعامبارىمىزدىڭ (س.ا.ۋ.) سۇننەتىنە ساي اۋىز اشقان ابزال. اللانىڭ ەلشىسى (س.ا.ۋ): «قايسىبىرىڭ اۋىز اشاتىن بولسا, كەپكەن قۇرمامەن اۋىز اشسىن, ويتكەنى وندا بەرەكە بار. ەگەر قۇرما تاپپاسا, سۋمەن اشسىن, ويتكەنى ول – تازا» ء(ات-تيرميزي) دەگەن. كۇن باتا سالىسىمەن تەز اۋىز اشۋعا اسىعۋ كەرەك. اللانىڭ ەلشىسى (س.ا.ۋ.): «ادامدار اۋىزاشاردى اسىقتىرعان سايىن يگىلىكتە بولادى» ء(ال بۇحاري, مۋسليم) دەگەن.
ءتورتىنشى كەڭەس
سارەسىن ءىشۋ كەرەك
ورازانى العاش ۇستاعاندار: «ءسارەسىگە تۇرماي-اق ورازا ۇستاسام بولا ما؟» دەگەن ساۋالدى ءجيى قويادى. سارەسى – تاڭ ءالى اتپاي تۇرىپ, ءتۇننىڭ سوڭعى مەزگىلىندە ىشىلەتىن اس. اللانىڭ ەلشىسى (س.ا.س.) ءبىر حاديسىندە سارەسىدە بەرەكەتتىڭ بار ەكەنىن, سارەسىگە تۇرعاندار ءۇشىن پەرىشتەلەردىڭ دۇعا ەتەتىنىن: «سارەسىدە بەرەكەت بار. ءبىر جۇتىم سۋ ىشسەڭ دە, ونى ۇزبە. ويتكەنى اللا تاعالا مەن پەرىشتەلەر سارەسىگە تۇرعاندارعا جاقسىلىق تىلەيدى» دەپ جەتكىزگەن.
سارەسى – ەڭ بەرەكەلى ۋاقىت. ول – دۇعا, ناماز وقىلىپ, قۇران قابىل بولاتىن ءسات. بۇعان قوسا سارەسى اسىن ءىشۋ كۇنى بويى ۇستايتىن ورازانىڭ قيىندىعىن جەڭىلدەتىپ, باسقا دا قۇلشىلىقتاردى ورىنداۋعا كۇش بەرەدى. سارەسىنىڭ ۋاقىتىن كەشىكتىرىپ, تاڭ نامازىنىڭ ۋاقىتىنىڭ كىرۋىنە از قالعاندا جەگەن ابزال.
ازىرلەگەن تولەن تىلەۋباي
