تاياۋدا جازۋشىلار وداعى استانا قالالىق فيليالى ۇيىمداستىرۋىمەن ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە اقىن, حالىقارالىق «الاش» ادەبي سىيلىعىنىڭ, س.ەسەنين اتىنداعى رەسەي جازۋشىلار وداعىنىڭ التىن مەدال جانە «پاراسات» وردەنىنىڭ يەگەرى ءحانبيبى ەسەنقاراقىزىنىڭ 10 تومدىعىنىڭ تانىستىرىلىمى ءوتتى.
«فوليانت» باسپاسىنان جارىق كورگەن 10 تومدىققا اقىننىڭ ءار جىلدارى جازعان جىرلارى مەن تاريحي-زەرتتەۋ ماقالالارى, جەكە مۇراعاتىنداعى سۋرەتتەرى توپتاستىرىلعان.
شاراعا بەلگىلى ساتيريك كوپەن امىربەك, قوعام قايراتكەرى ورازكۇل اسانعازى, بەلگىلى اقىن, «اق جول» قدپ توراعاسىنىڭ ورىنباسارى قازىبەك يسا, تاعى باسقا تۇلعالار, اقىننىڭ زامانداستارى قاتىستى.
اقىن داۋلەتكەرەي كاپۇلى كەشتى ەركىن فورماتتا جۇرگىزدى.
جيىن بارىسىندا زيالى قاۋىم وكىلدەرى اقىننىڭ شىعارماشىلىعى جايلى ءوز پىكىرلەرىن ايتىپ, لەبىز بىلدىرسە, ستۋدەنت جاستار اقىن شىعارماشىلىعىنان ولەڭدەر وقىدى. سونىمەن قاتار كەش يەسىنىڭ سوزىنە جازىلعان اندەر ورىندالدى.
ۋنيۆەرسيتەت رەكتورىنىڭ اتىنان قۇتتىقتاعان اكادەميك ديحان قامزابەكۇلى اقىن اپامىزدىڭ كەۋدەسىنە «كۇلتەگىن» مەدالىن تاعىپ, قۇرمەت كورسەتتى. جيىن سوڭىندا اقىن ۋنيۆەرسيتەت كىتاپحاناسىنا ءوزىنىڭ ون تومدىعىن سىيلادى. ءسويتىپ تۇرىپ, قارسى الدىندا وزىنەن كوز الماي وتىرعان جاستارعا قاراپ:
– ءبارىڭنىڭ دە مىنا كىتاپتاردى اشىپ, وقىپ كورگىلەرىڭ كەلەتىنىن سەزىپ وتىرمىن. بىراق مەنىڭ كىتاپحانالارىڭا ون تومدىقتىڭ بىرەۋىن عانا سىيلاۋعا مۇمكىندىگىم بار. ارينە, مۇنداي ۇلكەن وقۋ ورنى ءۇشىن ءبىر كىتاپ دەگەن ازدىق ەتەدى. كەزەكپەن, اۋىسىپ وقىرسىڭدار. سول كىتاپتاردىڭ ىشىندەگى دۇنيەلەردى وقىپ شىققاننان كەيىن مەنى ساعىناتىن بولاسىڭدار, – دەدى.
