قازاق كۇرەسىنەن وتكەن «الەم بارىسىندا» جاۋىرىنى جەرگە تيمەگەن ايبەك نۇعىماروۆ چەمپيون اتاعىن قورعاپ قالدى.
الەمدىك باسەكە الماتىداعى بالۋان شولاق اتىنداعى سپورت سارايىندا ءوتتى. وعان قازاقستاننان بولەك 29 ەلدەن باس-اياعى 33 بالۋان قاتىستى. ال قازاقستان نامىسىن 5 سپورتشى قورعادى. جارىس ەرەجەسىنە ساي ءبارىنىڭ سالماعى 90 كەلىدەن استى. ال جاڭازەلانديالىق چيكو رەرەموانا پەمبەرتون ەڭ اۋىر سپورتشى بولدى. ونىڭ تارازىداعى سالماعى 161 كەلىنى كورسەتتى.
فينالدا قازاقستاننىڭ ەكى بالۋانى – ايبەك نۇعىماروۆ پەن ەرسۇلتان مۇزافاروۆ كۇش سىناستى. اقتىق باسەكە 4 مينۋتقا سوزىلدى. العاشقى مينۋتتا ايبەك ەسكەرتۋ الىپ, ەرسۇلتاننىڭ ەنشىسىنە ءبىر ۇپاي جازىلعان ەدى. وسىنى ءتيىمدى پايدالانعان ول ەكىنشى مينۋتتا تاعى ءبىر ۇپاي الىپ, باسىمدىعىن ارتتىردى. الايدا قارسىلاسىن ۇزاققا جىبەرمەگەن ايبەك ءۇشىنشى مينۋتتىڭ ورتاسىنا تامان ەسەپتى تەڭەستىرۋگە ۇمتىلىپ, جارىس كوركىن قىزدىرا ءتۇستى. ال ءتورتىنشى مينۋتتا نۇعىماروۆ ايلاسىن اسىرىپ, تازا جەڭىسكە جەتتى. وسىلايشا ول «الەم بارىسىنىڭ» ەكى دۇركىن چەمپيونى اتاندى.
جارتىلاي فينالدا ەرسۇلتان مۇزافاروۆ رەسەيلىك سپورتشى رومان بوبيكوۆتى جەڭسە, ايبەك نۇعىماروۆ گرۋزيالىق گۋرام تۋشيشۆيليدەن باسىم ءتۇستى. ال ءۇشىنشى ورىننىڭ جەڭىمپازى تەز انىقتالدى. گرۋزيالىق بالۋان بوز كىلەمگە شىعۋدان باس تارتۋىنا بايلانىستى بۇل ورىن رەسەيلىك سپورتشىعا بەرىلدى.
بيىلعى جارىستىڭ جالپى جۇلدە قورى 20 ميلليون تەڭگەنى قۇرادى. ونىڭ ىشىندە 10 ميلليونى جەڭىمپازعا تيەسىلى. تيىسىنشە 6 ميلليون ەكىنشى, 3 ميلليون تەڭگە ءۇشىنشى ورىن يەگەرىنە تاپسىرىلدى. بۇعان قوسا, التىن, كۇمىس جانە قولا بەلبەۋلەر دە قاراستىرىلعان.
