ەگەر بىزگە وسى ومىردەگى ەڭ ءتاتتى, ەڭ بالعىن, ەڭ تازا جاراتىلىس يەلەرى كىمدەر دەپ سۇراق قويسا, بارلىعىمىز ءبىر اۋىزدان «ارينە, ول كىرشىكسىز سابيلەر عوي» دەپ شۋ ەتە قالامىز. سۇراققا ادەمىلەپ جاۋاپ بەرەمىز دە, اڭگىمەنىڭ باسىن قايىرىپ قويا سالامىز. الگى «ءبىز» دەگەننىڭ ىشىندە مەن دە بارمىن, ءسىز دە بارسىز. البەتتە, كوشەدە بىرەۋ سىزدەن «بالالار ءۇيى» قاي جەردە دەپ سۇراي قالسا, جاۋابىڭىز دايىن با؟..
ويلانامىز. توسىلامىز. الايدا, سول سۇراقتىڭ جاۋابىن بىلۋگە, ەستۋگە كوپ كىدىرمەيمىز. ول راس. كۇيبەڭ تىرلىك, قاربالاس ءومىر, ۋاقىتىمىز بولمايدى, مويىن بۇرۋعا مۇرشا جوق… دەگەندەي جاتتاندى الاۋلايىمىزعا سالىپ الامىز دا, قولىمىزدى ءبىر سىلتەپ كەتە بەرەمىز, كەتە بەرەمىز… بىراق, بالالار ۇيىندەگى بالعىن بۇلدىرشىندەر وعان ەش رەنجىمەيدى دە, اسا ءبىر تۇسىنىستىكپەن قارايدى… كەرىسىنشە, ولار ءبىزدى قوناققا شاقىرادى. قوناقتاردى كۇتۋ ءۇشىن جاندارىن سالىپ دايىندالادى, تالپىنادى, كۇتەدى, ساعىنادى, ىزدەيدى… سابيلىك لۇپىلدەگەن جۇرەكتەرىمەن اتالمىش «ريزاشىلىق» مەرەكەسىندە دە بار ونەرلەرىن ورتاعا سالدى. سىرتتان كەلگەن بارلىق كىسىلەرمەن ءان ايتىپ, بي بيلەپ, ويىن ويناپ, سىيلىقتار ءبولىستى. «ادىرنا» حالىقتىق وركەسترى قۇرمانعازىنىڭ رۋحتى كۇيلەرىمەن قوناقتاردى قارسى الىپ, «اسىل ارمان» بي توبىنىڭ تال شىبىقتاي بۇرالعان بۇلدىرشىندەرى «ريزاشىلىق» كەشىنىڭ كوركى مەن ءسانى بولدى. ءبۇلدىرشىن ءبيشى قىزدارىمىز ون ءبىر جاسار جۇلدىز جاقاەۆا مەن ون ەكى جاسار جىبەك بورانباەۆالار ءۇشىن بۇل مەرەكە دوستىقتىڭ, تاتۋلىقتىڭ سيمۆولى ىسپەتتەس. سابيلەرمەن از-كەم سىرلاسقانىمىزدا بايقاعانىم: ولار ءبىر-بىرىنە وتە قامقور. باۋىرمالدىلىقتارى, وتباسىلىق ورتادا تاربيەلەنىپ جاتقاندىقتارى ولاردىڭ تولاعاي تابىستارىنان, تالپىنىستارىنان ءبىلىنىپ-اق تۇر. اتاپ ايتساق, تۇركيادا وتكەن «Dance Olympia» حالىقارالىق بايقاۋىنا العاش رەت قاتىسىپ, 2-ورىندى يەلەنگەن, قالالىق «دەلفي ويىندارىنان» 3 التىن, 2 كۇمىس, 1 قولا مەدالدارى بار بالالار ءۇيى «بارىس» سپورت كلۋبىمەن دە ماقتانا الادى. كورمەدە تۇرعان تاماشا قولونەرلىك بۇيىمدارعا سۇيسىنبەي, تامسانباي وتە المايسىز. عاجاپ, تاماشا, ەڭ باستىسى, بالانىڭ جۇيرىك قيالىنان تۋعان, قولدان جاسالعان قولونەر بۇيىمدارى مەن كارتينالارى كوز قۋانتادى. راس, ونداي جىلتىراعان, كورنەكىلىكتەردىڭ سان ءتۇرى دۇكەندە دە تولىپ تۇر. الايدا, بۇل تۋىندىلاردا بالانىڭ قولى تيگەن تازالىق بار. كورمەنى تانىستىرىپ جۇرگەن توعىزىنشى سىنىپ وقۋشىلارى زەمفيرا مۋليۋكوۆا مەن ۆيالەتتا لەتۆيەنكا ەسىمدى جاس سۋرەتشى قىزدارىمىزدىڭ ويىنشا, قولدارىنان شىققان وسى بۇيىمدارى, ولاردىڭ ەرتەڭ جوعارى وقۋ ورنىنا تۇسۋىنە سەپتىگىن تيگىزبەك. كورمەنى تاماشالاعان ءبىراز قوناقتار ءبىر پاراسىن ساتىپ العىلارى-اق كەلدى. الايدا, وعان رۇقسات ەتىلمەپتى. بالالار ءۇيىنىڭ باسشىسى گۇلميرا ەلەۋسىزقىزى ەگەر بۇل جوبانى قولعا الىپ جاتسا, ەرتەڭگى كۇنى بالالار يگىلىگى ءۇشىن جاراتىلماس پا ەدى. قوناقتار سىيلىقتارىن ۇسىنىپ, كوڭىلدى مەرەكەنىڭ سەبەپكەرلەرى بولعانىنا قۋانا تارقاستى. ءبارى ريزا ءبىر-بىرىنە. تەك قانا ارتتا كوڭىلدىڭ جابۋىن سىعالاعان مۇڭ قالدى… ول – ءبىزدى قيماستىقپەن شىعارىپ سالعان ويىن بالاسىنىڭ مولدىرەگەن كوزدەرىندەگى قالىڭ قارا مۇڭ…
PS: كۇن سايىن جەر بەتىندە 365 مىڭ ءسابي دۇنيە ەسىگىن اشادى ەكەن. ونىڭ 57%-ى ازياعا, 26%-ى افريكاعا, 9%-ى لاتىن امەريكاسىنا, 5%-ى ەۋروپاعا, 3%-ى سولتۇستىك امەريكاعا, 1%-عا جەتەر-جەتپەسى اۆستراليا مەن مۇحيت ورتاسىنداعى ەلدەرگە تيەسىلى. ال, قازاق ەلىن بۇگىندە 5 ميلليون ءبۇلدىرشىن ءسابي كۇلكىسىنە بولەپ وتىر. ونىڭ 169-ى «ريزاشىلىق» مەيرامىن تويلاعان استانا بالالار ۇيىندە ءوسىپ-ونۋدە.
نۇرگۇل احانقىزى
