اۋا رايىنىڭ سالقىنداعانىنا قاراماستان, سەنبى-جەكسەنبى كۇندەرى جارمەڭكەگە شىققان ەلوردا تۇرعىندارىنا اقتوبە مەن قوستاناي وبلىسىنىڭ شارۋا قوجالىقتارى كوكتەم مەن جازدا تەر توككىزگەن ەڭبەكتىڭ جەمىسىن ۇسىندى.
اقتوبە وبلىسىنىڭ 12 اۋدانىنان جانە اقتوبە قالاسىنان 20-دان استام شارۋالار مەن قايتا وڭدەۋ كاسىپورىندارى ازىق-تۇلىك ونىمدەرىن ساۋداعا شىعارسا, جارمەڭكەدە قوستاناي وبلىسىنىڭ 14 اۋدانىنان جانە 3 قالاسىنان 50-دەن استام كاسىپورىن ءوز ونىمدەرىن ۇسىندى.
شارۋالار ەلورداعا 400 توننا تاۋار اكەلدى. ماسەلەن, اقتوبەلىكتەر ەلوردالىقتار ءۇشىن 220 توننادان استام ءونىمدى جەتكىزدى. ونىڭ ىشىندە 80 توننا ەت, 61 توننا كارتوپ پەن كوكونىس, 30 توننا ءسۇت, 17 مىڭ جۇمىرتقا, 6 توننا بالىق, 1 توننا بال, 10 توننا شۇجىق, 8 توننا ۇن مەن ماكارون ونىمدەرى بار. استاناداعى جارمەڭكەدە اقتوبە وبلىسىنىڭ 12 اۋدانىنان جانە اقتوبە قالاسىنان 20-دان استام شارۋالار مەن قايتا وڭدەۋ كاسىپورىندارى ونىمدەرىن ۇسىندى.
جاقسىسى سول, ونىمدەر نارىق باعاسىنان 15-20 پايىزعا تومەن باعادا ساتىلدى. جارمەڭكەدە ءسۇت جانە ەت كاسىپورىندارى بار, ولاردىڭ برەندتەرى بۇكىل ەلگە جانە ودان تىس جەرلەرگە تانىمال.
– مىنا ساڭىراۋقۇلاقتاردى (شامپينون) 1000 تەڭگەدەن الدىم, ءتىپتى ارزان, پەچەنە (توپلەنوە مولوكو) بىزدە 1500 تەڭگە بولسا, مۇندا جارتى باعاسىنا تۇر – 750 تەڭگەدەن, سىر مەن سارى مايدىڭ كەلىسى بىزدە – 5500, مىنا جەردەن 3000-نان الدىم. گرەك جاڭعاعى بىزدە 2500-دەن جوعارى, مۇندا 900-1000 تەڭگەدەن, جارمەڭكەگە كەلگەنىمە قاتتى قۋانىپ تۇرمىن, – دەيدى ەلوردالىق زەينەتكەر ايجان بىرالقىزى بىزبەن اڭگىمەسىندە.
شىنىندا دا, قازىر قىمباتشىلىق القىمنان قىسىپ تۇر. بار تاپقانىڭدى تاماق الۋعا جۇمسايسىڭ. استانانىڭ قاق ورتاسىندا وسىنداي قولجەتىمدى باعامەن اۋىل شارۋاشىلىعى ونىمدەرى جارمەڭكەسىنىڭ ۇيىمداستىرىلعانى كوپتەگەن ەلوردالىق تۇرعىن ءۇشىن ءتيىمدى ءارى ەل تاعامىنىڭ ءدامىن تاتىپ, ءبىر جاعىنان قىسقا قور جيناپ الۋعا ابدەن بولادى. ونىمدەردىڭ ساپاسىنا كۇمان كەلتىرمەدىك, سەبەبى وبلىستاردىڭ سانيتارلىق-ەپيدەميولوگيالىق دەپارتامەنتىنىڭ قىزمەتكەرلەرى تاعامداردىڭ ارنايى سەرتيفيكاتپەن ساتىلىپ جاتقانىن سەنىممەن ايتتى. ەلوردالىقتاردىڭ ءار دەمالىسىن كۇزگى كەرەمەت كوڭىلدى, ءدامدى ايماققا اينالدىرعان جارمەڭكە قازان ايىنىڭ سوڭىنا دەيىن جالعاسىن تاپپاق.
