ماماندىق تاڭداۋ ماڭىزدى

مىنا كۇنى تاس لاقتىرساڭ, جوعارى وقۋ ورنىن ءبىتىردى دەگەن قۇجاتى بار, بىراق قىزمەتى جوق زاڭگەر نە قارجىگەردىڭ باسىنا بارىپ تيەدى.
كوبىسى بۇل كۇيى ءۇشىن كەزىندە «تاڭداعان ماماندىعىڭ قوعامعا كەرەكسىز» دەپ ەسكەرتپەگەن سول قوعامنىڭ ءوزىن كىنالايدى. ونىسى ءجون دە شىعار.
وسىعان دەيىن قالامىزدا قانشا جۇمىسسىز بار, ونىڭ قانشاسى جۇمىسقا ورنالاستى, قانشاسى ورنالاسپادى, ورنالاسقىسى كەلمەيتىن سەبەبى نە؟ دەگەن ساۋالدار مەن قاپتاعان سانداردىڭ الەگىمەن جۇرەتىن جۇمىسپەن قامتۋ جانە الەۋمەتتىك باعدارلامالار باسقارماسى ەندى ناقتى ىسكە كوشىپ, وسى قاتەلىكتىڭ الدىن الۋعا كىرىسكەن سىڭايلى.

كەشە استانا قالاسى ءماسليحاتىنىڭ الەۋمەتتىك-مادەني ماسەلەلەر جونىندەگى تۇراقتى كوميسسياسى اتالعان باسقارماعا باردى.

باسقارما باستىعى الما التىباەۆانىڭ ەسەبىن تىڭدادى.

سوڭىنان «قازاققا كەرەگى قانداي ماماندىق؟» دەگەن ساۋال توڭىرەگىندە پىكىر تالاستىرىپ, تۇششىمدى ويلارىن ورتاعا سالدى.

ءدال بۇگىنگى كۇنى بىزگە كاسىپتىك ماماندار اۋاداي قاجەت. وسى ماسەلە ءالى كۇنگە دەيىن شەشىمىن تاپپاي كەلەدى.

قۇرىلىسى كۇننەن-كۇنگە قارىشتاپ كەلە جاتقان استانادا قۇرىلىسشى تاپشى دەگەنگە سەنەسىز بە؟ قۇرىلىسقا قاجەتتى دانەكەرلەۋشى, ەلەكتريك ماماندارى دا اسا قات. مۇنى جۇمىسپەن قامتۋ ورتالىعىنىڭ باسشىسى راستاپ وتىرعان سوڭ, امال جوق, سەنۋگە تۋرا كەلەدى. ويتكەنى, جۇمىس بەرۋشىلەردەن كەلىپ تۇسكەن ۇسىنىستى ورتالىق قاناعاتتاندىرا الماي وتىر.

جاستار مۇنداي ماماندىققا مۇرنىن ءشۇيىرىپ قارايدى, كاسىپتىك-ليتسەيلەردىڭ ماڭىنا اتتاپ باسپايدى دەپ, كىنانى وزگەگە اۋدارا سالاتىنبىز بۇرىن. «باقساق, باقا ەكەن». وتىرىس-تا ءبىلىم باسقارماسىنىڭ وكىلى استانا قالاسىنداعى كاسىپتىك-ليتسەيلەردىڭ تەحنيكالىق بازاسى, عيماراتىنىڭ جايى مۇلدە سىن كوتەرمەيتىنىن ايتىپ سالدى. ءتىپتى, № 5 ليتسەي جاتاقحانا جەرتولەسىندە ورنالاسقان بولىپ شىقتى. «وسىنى كورە تۇرا جاستارعا كاسىپتىك ماماندىقتى تاڭدا دەپ قالاي ايتپاقسىڭ؟» دەدى ول. ال, مەكتەپ باسشىلارى 2005 جىلدان بەرى «جاڭا عيمارات سالىنادى» دەگەن سوزگە سەنىپ, ءۇمىتىن ۇزبەي كەلىپتى. كوميسسيانىڭ توراعاسى اباي بايگەنجين وزدەرىنىڭ بۇل ماسەلەدەن حابارسىز ەكەنىن مويىنداپ, كوپ سوزباي مەكتەپتىڭ جاي-كۇيىمەن تانىساتىندىقتارىن جانە قالا باسشىلىعى ارقىلى بۇل ماسەلەنىڭ تەز ارادا شەشىمىن تابۋعا تىرىساتىندىقتارىن ايتىپ سەندىردى.

ال, بۇگىندە جۇمىسسىزداردىڭ جارتىسىنان كوبىن قۇرايتىن قۇقىق, قارجى سالاسىنىڭ ماماندارىن دايارلاۋدا نەنى ەسكەرگەن ءجون؟

بۇگىندە ەلورداداعى ىرگەلى جوعارى وقۋ ورىندارىنىڭ ءبىرى سانالاتىن س.سەيفۋللين اتىنداعى قازاق مەملەكەتتىك اگروتەحنيكالىق ۋنيۆەرسيتەتىندە وسى سالانىڭ ماماندارىن دايارلايتىن فاكۋلتەتتىڭ بارىن بىرەۋ بىلسە, بىرەۋ بىلمەس. شىنتۋايتىنا كەلگەندە اگرارلىق سالا ماماندارىن دايارلاۋمەن اينالىساتىن وقۋ ورداسىنىڭ قارجى, مەنەدجمەنت سالاسىنا التى الاسى, بەس بەرەسى جوق. سوندىقتان, مۇنداي ماماندار تەك سالالىق جوعارى وقۋ ورىندارىندا عانا دايارلانعان ءجون دەگەن ۇسىنىستار ايتىلدى. تاعى ءبىر ماڭىزدى نارسە – وقۋ ورىندارىندا اتالعان ماماندىققا ورىن بولەردە قوعامنىڭ قاجەتتىلىگىن ەسكەرگەن دە ءجون. وسىلايشا الدىن الا جوسپارلانعان جاعدايدا عانا جاس ماماندار جۇمىسسىزدىقتىڭ قامىتىن كيمەيتىن بولادى.

جالپى, بۇل وتىرىستىڭ وقۋ جىلى اياقتالار تۇستا ورايى كەلە قالعانى دا ءجون بولدى.
كوميسسيا الداعى ۋاقىتتا جاس تۇلەكتەردىڭ ماماندىقتى دۇرىس تاڭداۋى ءۇشىن ءوز تاراپتارىنان دا ىقپالدى شارۋالار اتقاراتىن بولىپ ۇيعاردى.

شىنار دوCان