ماڭگىلىك ەلدىڭ مۋزىكاسى

استانا قالاسى مەملەكەتتىك اكادەميالىق فيلارمونياسى ەل تاۋەلسىزدىگىنىڭ 25 جىلدىق مەرەيتويىن جىل باسىنان بەرى ءان-كۇيمەن اسپەتتەپ كەلەدى. اسىرەسە, كۇز تۇسكەلى «استانا» كونتسەرت زالىندا ەگەمەندىك تويىنا ارنالعان كەشتەردى ءجيى-ءجيى ۇيىمداستىرۋدا.

ازاتتىعىمىزدى اسقاقتاتقان كەزەكتى كونتسەرت «كوك بايراعىم – تىرەگىم» اتاۋىن الدى. وندا فيلارمونيانىڭ حالىق ءانى ءبولىمىنىڭ انشىلەرى, «قورقىت» ءداستۇرلى ساز توبى جانە «شالقىما» حالىق ءبيى ءانسامبلى ونەر كورسەتتى.

كونتسەرتتە تاريحىمىزدىڭ قويناۋىنان تامىر تارتاتىن مۋزىكا جاڭعىرىپ, حح جانە ءححى عاسىرلاردىڭ اراسىن جالعاعان تۋىندىلار شالقىدى. بوكەي ورداسىنان شىعىپ, بايتاق قازاق دالاسىنا كۇيشىلىگىمەن تانىلعان, ايگىلى مۋزىكاتانۋشى احمەت جۇبانوۆ «تورە كۇيلەرىنىڭ اتاسى» دەپ باعا بەرگەن داۋلەتكەرەي شىعايۇلىنىڭ كۇيلەرىنەن باستاپ, قازاقتىڭ كونە مۇراسىن بۇگىنگى مۋزىكامەن ۇشتاستىرا بىلگەن شولپان قورعانبەكوۆانىڭ شىعارمالارىمەن كەشتىڭ ءسانى كىردى.

كەشتە ۇستازدىقتى, انشىلىكتى, كومپوزيتورلىقتى ءبىر بويىنا جيناقتاعان عاريفوللا قۇرمانعاليەۆتىڭ, ۇلى اباي ءداستۇرىن جالعاپ, اقىندىق پەن ءان شىعارۋ ونەرىن ۇستاي بىلگەن باكىر تاجىباەۆتىڭ, كلاسسيكالىق مۋزىكاعا دا, ەستراداعا دا ولشەۋسىز ۇلەس قوسىپ, مۋزىكانىڭ سان جانرىندا ەڭبەكتەنگەن حالىق قاھارمانى نۇرعيسا تىلەنديەۆتىڭ, وسى ارقا ءوڭىرىنىڭ پەرزەنتى, كورنەكتى كومپوزيتور كەنجەبەك كۇمىسبەكوۆتىڭ, وزگە دە سازگەرلەردىڭ اندەرى اۋەلەدى.

بۇل شىعارمالاردى سەكەن سىزدىق, تەلمان نۇرتاي, دانيار مۇقان, كۇنسۇلۋ تۇرلىبەكوۆا, راحات بەگاسىلوۆ, جازگۇل داڭىلباەۆا, جاقسىگەلدى ماياساروۆ, نۇراي تاناباەۆ, پەريزات تۇراروۆا ت.ب. انشىلەر سالدى. «شالقىما» حالىق ءبيى ءانسامبلى ۇلتتىق بوياۋى قانىق «ءىنجۋ-مارجان», «شولپى», «ءبيشى قايىڭ», «شاشۋ» سىندى مىڭ بۇرالعان بيلەردى ۇسىندى.

«ءان ونەرى ارقىلى حالىقتىڭ تاريحىمەن تانىسۋعا بولادى. سەبەبى ۇلتتىق مۋزىكانىڭ تامىرى تەرەڭدە جاتادى. مۋزىكانىڭ ادامنىڭ رۋحاني الەمىنىڭ بايۋىنا جانە وزىندىك سانا-سەزىمىنىڭ قالىپتاسۋىنا تيگىزەتىن ىقپالى زور. ەلوردالىق فيلارمونيا ارتىستەرى قازىرگى جاستاردىڭ سانا-سەزىمى مەن جۇرەگىنە جول تابۋ, وسكەلەڭ ۇرپاققا كونەدەن جالعاناتىن ءداستۇرلى مادەنيەتتىڭ ماڭىزىن ءتۇسىندىرۋدى مىندەتىم دەپ بىلەدى. ويتكەنى اتا-بابا مادەنيەتى قانىمىزدا بار, سول ۇلى مۇرالاردىڭ بويىنداعى دانالىق جانە ار-نامىس قاسيەتتەردى جوعالتپاۋعا ءتيىستىمىز» دەيدى استانا قالاسى مەملەكەتتىك اكادەميالىق فيلارمونياسىنىڭ ديرەكتورى ساكەن ءابدىراحمانوۆ.

امانعالي قالجانوۆ