مەيىرىمدىلەر مەكەنى
قر ۇلتتىق مۋزەيىندە «استانا – رۋحى مىقتى ادامدار قالاسى» باعدارلاماسىنىڭ اياسىندا ەلوردانىڭ 20 جىلدىعىنا ارنالعان «مەيىرىم» ءى بالالار شىعارماشىلىعىنىڭ ينكليۋزيۆتى مۋزەيلىك فەستيۆالى ءوتتى.
فەستيۆال قارساڭىندا ارنايى ءبىلىم بەرۋدى قاجەت ەتەتىن بالالار مەن جاسوسپىرىمدەر اراسىندا بايقاۋ جاريالاندى. وعان بارلىعى 400-گە جۋىق بالا ءوتىنىش بەردى. ونىڭ ىشىندە 100-دەن اسا بالدىرعان بەينەلەۋ ونەرى بويىنشا (سۋرەت, قولدان بۇيىمدار جاساۋ جانە ت.ب.), 200-دەن اسا بالا ورىنداۋشىلىق ونەر بويىنشا (ۆوكال, بي ونەرى, اسپاپتاردا ويناۋ, كوركەمسوز وقۋ) قاتىستى. ال 120 بالا گالا-كونتسەرتكە ءوتتى.
«مۋزەي وتكەن جىلدان بەرى مۇمكىندىگى شەكتەۋلى جاندارعا كەدەرگىسىز ورتا قالىپتاستىرۋ, مۋزەيلىك ءبىلىم بەرۋ ارقىلى قازاقستان مەن باسقا دا ەلدەردىڭ مادەني قۇندىلىقتارىن كورسەتۋ, وي-ءورىسىن كەڭەيتۋ, شىعارماشىلىق مۇمكىندىكتەرىن دامىتىپ, قيالدارىن ۇشتاۋ ماقساتىندا ولارعا الەۋمەتتىك باعىتتالعان «مەيىرىم» جوباسىن جۇزەگە اسىرىپ كەلەدى, – دەدى شارانىڭ اشىلۋ سالتاناتىندا ءسوز العان قر ۇلتتىق مۋزەيى ديرەكتورىنىڭ ورىنباسارى اباي ساتىبالدين.
فەستيۆالدى ۇيىمداستىرۋشىلاردىڭ ءبىرى – «نۇر وتان» پارتياسى استانا قالالىق فيليالى اتىنان اتالمىش فيليال توراعاسىنىڭ ورىنباسارى ۆلاديسلاۆ سەرگەەۆ بۇل شارانىڭ ماڭىزىن اتاپ ءوتتى.
اتالعان فەستيۆال اياسىندا مۋزەي شەبەرلەرىنىڭ شەبەرلىك ساعاتتارى دا وتكىزىلدى. اتاپ ايتساق, ۇلتتىق مۋزەيدىڭ باس ساقتاۋشىسى, كيىز باسۋ ونەرىنىڭ شەبەرى رىسكۇل بەكتاليەۆا, زەرگەر-شەبەرى, سۋرەتشى-رەستاۆراتورلار سانات اياتبەكوۆ پەن ستانيسلاۆ باچين, قازاقستان ديزاينەرلەر وداعىنىڭ مۇشەسى, وسى ءمادەني وشاقتىڭ بەينەلەۋ ونەرى ستۋدياسىنىڭ وقىتۋشىسى مۇحتار بايبوسىن, ۇلتتىق مۋزەيدىڭ كىشى عىلىمي قىزمەتكەرى زۋحرا بايانوۆا ءتۇرلى دارىستەر بەردى.
فەستيۆال بارىسىندا بىرنەشە اتالىم بويىنشا ونەرپاز بالالار ىرىكتەلىپ, ولارعا ديپلومدار, ەستەلىك سىيلىقتار جانە «AILAND» وتباسىلىق دەمالىس ورتالىعىنىڭ مۇحيتارالىنا سەرتيفيكاتتار تاپسىرىلدى.
«ۆوكال» اتالىمىندا دانيل پلاتيتسين ءبىرىنشى ورىندى, ەكىنشى ورىندى ۆالەريا حان مەن ىڭكار ەرتايقىزى, ال ءۇشىنشى ورىندى نازەركە دانايبەك, ەكاتەرينا پوليتىكو جانە قايرات دارىن, ەرسايىن وسپانوۆ, نارقىز ءىلياسوۆادان قۇرالعان ۇشتىك يەلەندى.
«مانەرلەپ وقۋ», «اسپاپتىق ورىنداۋ», «حورەوگرافيا», «بەينەلەۋ ونەرى» اتالىمدارىنداعى جۇلدەلەر دە يەلەرىن تاپتى.