بۇگىنگى تاڭدا استانا قالاسىنداعى مەكتەپتەردە سايت جۇمىستارى جاندانا باستادى. ءار مەكتەپ ءوز سايتىن مازمۇندى ءارى قىزىقتى ەتىپ شىعارۋعا مۇددەلىك تانىتۋدا. ءبىز وسى ورايدا, قالالىق ءبىلىم باسقارماسىنا حابارلاسىپ, ءبىراز ءمان-جايدى بىلگەن ەدىك. ساۋالىمىزعا باسقارمانىڭ ادىسكەرى انار قوجاحمەت جاۋاپ بەردى:
– قالا مەكتەپتەرىندەگى سايتتاردىڭ جۇمىسى قالاي ءجۇرىپ جاتىر؟
– ءبىلىم باسقارماسىنىڭ ادىسكەرلەرى مەكتەپ سايتتارى بويىنشا جۇمىس جاسايتىن «Bench Mark Consulting» جشس كومپانياسىمەن بىرلەسىپ بىرقاتار جۇمىستار اتقاردىق. اتاپ ايتساق, 2014 جىلعا ارنالعان مەكتەپ سايتتارىن دامىتۋ جانە ءبىلىم بەرۋ پورتالىنىڭ جۇمىسى تۋرالى ءىس-شارالار جوسپارى جاسالدى. مەكتەپ ديرەكتورى مەن اتا-انالار اراسىندا بىرىڭعاي ءبىلىم بەرۋ پورتالى جانە ونىڭ مۇمكىندىكتەرى تۋرالى اقپاراتتىق-ءتۇسىندىرۋ جۇمىستارى جۇرگىزىلدى.
بۇگىنگى تاڭدا بارلىق مەكتەپتىڭ سايتتارى جاڭارتىلىپ وتىرادى. سونداي-اق, ينتەراكتيۆتى قىزمەتتەر كورسەتىلەدى. مىسالى, قوناق كىتاپشاسى, كەرى بايلانىس سىندى سىلتەمەلەر بار. وعان قوسا, ءار سايتتان بەينەروليك كورۋگە بولادى.
– قاي مەكتەپتىڭ سايتى ەرەكشە؟
– سايتتاردىڭ قۇرىلىمى مەن مازمۇنىنا قاراپ, مەكتەپتىڭ جۇمىسى تۋرالى بىلۋگە بولادى. مەكتەپ سايتتارىندا جان-جاقتى اقپاراتتار ۇسىنىلعان. ولاردىڭ بەزەندىرىلۋى دە مازمۇنعا ساي. ءبىلىم جانە تاربيەگە قاتىستى مۇعالىمدەردىڭ مەتوديكالىق جۇمىستارى ورنالاستىرىلعان. مىسالى, 1, 2, 3, 4, 5, 9, 10, 15, 18, 22, 30, 35, 37, 38, 40, 49, 50, 51, 52, 56, 57, 58, 63, 64, 67, 68-مەكتەپتەردىڭ سايتتارىندا ناقتى اقپاراتتىق قۇرىلىمدار بار. ءار ءبولىمنىڭ اتاۋلارى مازمۇنىنا ساي. وندا تەك ساباققا قاتىستى مالىمەتتەر عانا ەمەس, وقۋشىلاردىڭ عىلىمي-زەرتتەۋ, شىعارماشىلىق جۇمىستارى, سونداي-اق, باسپا گازەتتەردىڭ ەلەكتروندى نۇسقاسى ورنالاستىرىلعان. ماسەلەن, «پسيحولوگ بۇرىشى» بولىمىندە وقۋشىلارعا قاجەتتى كەڭەستەر بەرىلەدى. ال, جالپىعا ورتاق فورۋمعا «پسيحولوگقا سۇراق قوي» تاقىرىبى ۇسىنىلعان.
№18 ورتا مەكتەپتىڭ سايتىندا مەكتەپ ديرەكتورىنىڭ ماقالاسى مەن «جارشى» مەكتەپ گازەتى ورنالاستىرىلعان. ال, №19 ورتا مەكتەپتە اتا-انالارعا ارنالعان تەست سۇراقتارى بار. ياعني, مەكتەپ سايتىن پايدالانىپ, مەكتەپ پەن اتا-انا اراسىنداعى بايلانىستى ەلەكتروندى تۇردە ورناتۋعا بولادى. №3 مەكتەپ گيمنازياسى مەن №5 گيمنازيا سايتتارىنىڭ ديزاينى ەرەكشە ءارى قىزىقتى ەتىپ جاسالىنعان. №68 ورتا مەكتەپتىڭ سايتىندا وقۋشىلارعا ءار پاننەن تەست ۇيىمداستىرىلعان. №40 ورتا مەكتەپتە ءوز مۇراجايىنىڭ جۇمىسى كورسەتىلگەن.
– اقپارات كەڭىستىگىندە قالاداعى مەكتەپ سايتتارىن قالاي تابۋعا بولادى؟
– بارلىق مەكتەپتىڭ سايتتارى astana-bilim.kz ءبىلىم بەرۋ پورتالىنا كوشىرىلدى. سوندىقتان, سايتتاردى ىزدەۋدە ءبىراز ءوزگەرىستەر بار. ەندى مەكتەپتەردىڭ سايتتارىن astana-bilim.kz – «ءبىلىم بەرۋ مەكەمەلەرى – جالپى ءبىلىم بەرەتىن مەكتەپتەر» دەگەن بولىمدەر ارقىلى نەمەسە مەكتەپ سايتىن تولىق جازۋ ارقىلى تابۋعا بولادى. مىسالى http://3.astana-bilim.kz/.
ەركەجان ساتىمبەك
