مەملەكەت باسشىسى استانا اينالاسىنداعى جەر تەلىمدەرىن بەرۋگە موراتوري جاريالادى

قر پرەزيدەنتى نۇرسۇلتان نازارباەۆ استانا قالاسىن ودان ءارى دامىتۋ ماسەلەلەرىنە ارنالعان كەڭەس وتكىزدى. بۇل تۋرالى اقوردانىڭ ءباسپاسوز قىزمەتىنەن حابارلادى.

ەلباسى ەلوردا ماڭايىنداعى اۋدانداردا جەر ماسەلەلەرىنە قاتىستى ءتارتىپ جوقتىعىن, سونىڭ سالدارىنان جەر اۋماقتارىن ءوز بەتىمەن باسىپ الۋدىڭ كەزدەسىپ جاتاتىنىن اتاپ ءوتتى.

«استانا ماڭىنداعى جەرلەردى يگەرۋ جۇيەسىز جۇرگىزىلۋدە. ادام سانى قازىردىڭ وزىندە 2015 جىلعا بولجانعان مەجەدەن اسىپ بارادى. بۇگىندە وندا 156 مىڭ ادام تۇرىپ جاتىر, ال جەر تەلىمدەرىن الۋ كەزەگىندە 175 مىڭ ادام تۇر. ازاماتتارعا 10 سوتىق جەر تيەسىلى ەكەندىگىن پايدالانىپ, ادامدار ءوتىنىش بەرۋدە. بىراق ول جەرلەردى كوممۋنيكاتسيا جۇرگىزىلگەن جەرلەردەن عانا بەرۋگە بولادى. ەگەر جەرلەر دايىن بولماسا, وندا ول پايدالانۋعا بەرىلمەۋگە ءتيىس. بۇل تۇستا ءتارتىپ ورناتۋ قاجەت. سوندىقتان مەن استانا اينالاسىنداعى 30 شاقىرىمدىق ايماقتان جەر تەلىمدەرىن بەرۋگە موراتوري جاريالايمىن, – دەدى نۇرسۇلتان نازارباەۆ.

سونىمەن قاتار, نۇرسۇلتان نازارباەۆ جاقىندا «استاناباسجوسپار» عزوي» جشس-نى ارالاۋ بارىسىندا ەلوردانى دامىتۋ ماسەلەسى قارالعانىن اتاپ ءوتتى.

«قالا تۇرعىندارى كوبەيىپ, 900 مىڭعا جەتتى, ال ءبىز بۇل كورسەتكىشكە 2020-2030 جىلدارى جەتەمىز دەپ جوسپارلاعانبىز. وسىعان بايلانىستى قالا قۇرىلىسى حالىقتىڭ قارقىندى وسۋىنە ىلەسە الماي وتىر, سونىڭ سالدارىنان ءتۇرلى قيىنشىلىق تۋىنداۋدا. ارينە, ءبىز ەلىمىزدەگى بارلىق قالانىڭ دامۋى ءۇشىن جۇمىس جاسايمىز, بىراق ەلورداعا ەرەكشە نازار اۋدارىلۋعا ءتيىس. بيىلعى كوكتەمدە مەن كەڭەس وتكىزىپ, بىرقاتار تاپسىرمالار بەردىم. مەن ولاردىڭ ىسكە اسىرىلۋ بارىسىمەن تانىستىم, الايدا الدىمىزعا ءتيىستى شەشىمدەر قابىلداۋ قاجەت بولاتىن جاڭا مىندەتتەر قويىلىپ وتىر», – دەدى قازاقستان پرەزيدەنتى.

بۇعان قوسا, قازاقستان پرەزيدەنتى اقمولا وبلىسىنىڭ اكىمىنە ەلوردانىڭ ماڭىندا ورنالاسقان بارلىق ەلدى مەكەننىڭ باس جوسپارىنا تۇزەتۋ ەنگىزۋدى, ال باس پروكۋرورعا – استاناداعى قىلمىستىق احۋالعا تالداۋ جاساپ, قۇقىق بۇزۋشىلىقتىڭ الدىن الۋدى كۇشەيتۋدى تاپسىردى.

http://astana.gov.kz