مەملەكەت باسشىسى ەنەرگەتيكا ءمينيسترى قانات بوزىمباەۆتى قابىلدادى

كەزدەسۋ بارىسىندا ق.بوزىمباەۆ ەلباسىنا مۇناي-گاز, مۇناي-گاز حيمياسى جانە ەنەرگەتيكا سالالارىنداعى دامۋدىڭ نەگىزگى كورسەتكىشتەرى تۋرالى باياندادى, سونداي-اق الداعى كەزەڭگە ارنالعان جۇمىس جوسپارى جونىندە مالىمدەدى.

سونىمەن قاتار, مۇناي وڭدەۋ جانە ەنەرگەتيكا ونەركاسىبىندەگى ءىرى ينۆەستيتسيالىق جوبالاردىڭ ىسكە اسىرىلۋ بارىسى, ونىڭ ىشىندە جىل سوڭىنا دەيىن قاشاعان كەن ورنىن قولدانىسقا ەنگىزۋ جوسپارى, تەڭىزدىڭ وندىرىستىك قۋاتتىلىعىن ارتتىرۋ جانە قاراشىعاناق كەن ورنىنداعى سۇيىق كومىرسۋتەگى ءوندىرىسىن ۇلعايتۋ ماسەلەسى تالقىلاندى.

مەملەكەت باسشىسى جوعارعى دەڭگەيدەگى باسەكەگە قابىلەتتىلىكتى قامتاماسىز ەتۋ جانە ەكونوميكاداعى ەنەرگيا تاسىمالداۋ ءۇشىن ءوسىپ وتىرعان قاجەتتىلىكتەردى قاناعاتتاندىرۋ ماقساتىندا وتىن-ەنەرگەتيكا كەشەنىن ودان ءارى دامىتۋ كەرەكتىگىنە نازار اۋداردى. بۇدان بولەك, قازاقستان پرەزيدەنتى ەلدىڭ عىلىمي-تەحنولوگيالىق الەۋەتىن ارتتىرۋ ءۇشىن شارالار قابىلداۋ جانە تومەن كومىرتەكتى دامۋ مەن «جاسىل ەكونوميكاعا» ءوتۋىن قامتاماسىز ەتۋ جونىندە جاعداي تۋعىزۋدىڭ ماڭىزدىلىعىن اتاپ ءوتتى.

ەنەرگەتيكا ءمينيسترى بيىل مۇناي ءوندىرۋ كولەمىنىڭ ازداپ قىسقارۋى الەمدەگى نەگىزگى ەنەرگەتيكالىق رەسۋرستارعا باعانىڭ تومەندەۋىمەن بايلانىستى بولىپ وتىرعانىن اتاپ ءوتتى.

– ءبىرىنشى جارتىجىلدىقتىڭ قورىتىندىسى بويىنشا 38,8 ملن توننا مۇناي ءوندىرىلدى. ول وتكەن جىلعى وسى كەزەڭدەگى وندىرۋ كولەمىمەن سالىستىرعاندا 97% قۇرايدى. بيىل جىل سوڭىنا دەيىن ءوندىرۋ كولەمىن 75 ملن تونناعا دەيىن ارتتىرۋ جوسپارلانىپ وتىر. سونىمەن قاتار 6,9 ملن توننا مۇناي وڭدەلدى, ول بىلتىرعى جىلدىڭ كورسەتكىشىمەن سالىستىرعاندا شامامەن 5% ارتىق, – دەدى ق.بوزىمباەۆ.

ەلباسى كەزدەسۋ قورىتىندىسى بويىنشا بىرقاتار ناقتى تاپسىرما بەردى.