بۇگىندە قازاق جۋرناليستيكاسىندا «مەكتەپ كورگەن» دەرلىك زامانداستارىمىز سيرەك. كەيىنگى جاستاردىڭ دەنىندە «تاجىريبە» دەگەن ىرگەتاس قالانباعان. ال ەلوردالىق «استانا اقشامى» گازەتى – مەن ءۇشىن وتكەن ۇلكەن مەكتەپ!
2001 جىلى ۇلتتىڭ تۋىن دا, ءسوزىن دە ۇستاعان قىراعى قىراندار مەكەنى – تورعاي دالاسىنان كەلىپ, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جۋرناليستيكا بولىمىنە وقۋعا ءتۇستىم. سول جىلى جەرگىلىكتى «استانا اقشامى» گازەتىندە وزىمنەن ءبىر كۋرس جوعارى وقيتىن ارمان اسقاروۆ پەن ساياگۇل جارىلقاسىننىڭ شاعىن اقپاراتتارى مەن مولتەك ويلارى ءجيى جاريالانىپ تۇراتىن. كافەدرا وقىتۋشىلارى ەكىنشى كۋرستىڭ سول ەكى «بەتكەۇستارىن» اجەپتاۋىر ماقتان تۇتىپ ءجۇردى. سودان مەن دە ءوزىمنىڭ «جۋرناليست بولىپ تۋعانىمدى» دالەلدەۋ ءۇشىن ءبىرىنشى كۋرستا ەلورداداعى ەكى-اق قازاقشا باسىلىم – قالالىق «استانا اقشامى» مەن وبلىستىق «ارقا اجارىنا» ەركىن تاقىرىپتاعى ماقالالار مەن اقپاراتتاردى ءنومىر سايىن جازا بەردىم. ءتىپتى, ارمان مەن ساياگۇلدەن اسىپ ءتۇسۋ ماقساتىندا وعان ساۋالناما, بليتس-سۇحبات دەگەندەي جانرلاردى قوسىپ قويدىم.
«اقشامدىق» ەرەنعايىپ قۋاتايۇلى, تولەن تىلەۋباي, قىمبات توقتامۇرات, كەيدە باس رەداكتور ماعجان سادىحانۇلىنىڭ ءوزى دە ەركىن تاقىرىپتا جازۋعا ءبىراز تاپسىرما بەرىپ تۇردى. سۇراعاندارىن ايتقان ۋاقىتىندا اكەپ تاستاي بەردىم. ءسويتىپ ءبىر جىل سىناعان سوڭ, ياعني 2-ءىنشى كۋرستا وقىپ جۇرگەنىمدە ماعجان سادىحانۇلى مەنى گازەتكە جارتى ايلىققا جۇمىسقا قابىلدادى…
سونىمەن نە كەرەك, بۇل گازەتتە ماعجان سادىحانۇلىنىڭ رەداكتور كەزىندە كەتىپ قالىپ, ونىڭ ورنىنا نۇرتورە ءجۇسىپ كەلگەندە, ودان كەتىپ, امانتاي ءشارىپ باسقارعاندا, سودان كەيىنگى تىزگىندى ەربولات قامەن ۇستاعاندا, قىسقاسى, ءتورت رەداكتوردىڭ تۇسىندا ءتورت مارتە كەلىپ, ءتىلشى, ءبولىم مەڭگەرۋشىسى قىزمەتتەرىن اتقاردىم. ءار جىلدارداعى تىگىندىسىندە وزىندىك قولتاڭبام بار.
جالپى, «استانا اقشامى» گازەتى – مەنىڭ جۋرناليستيكا بيىگىنە كوز تىگەردە اڭداپ باسقان العاشقى ساتىم. ۋنيۆەرسيتەتتە اقسەلەۋ سەيدىمبەكتىڭ شاكىرتى بولسام, قىزمەتتە وسى باسىلىمنىڭ ارقاسىندا نۇرتورە ءجۇسىپ, باۋىرجان وماروۆ, ماقسوت ءىزىمۇلى دەگەن «سەن تۇر, مەن اتايىن» سوزمەرگەندەردىڭ قولاستىندا شىڭدالدىم. قازىرگى قازاق جۋرناليستيكاسىندا اتى-سويى بار كوپتەگەن ارىپتەستەرمەن تانىستىم. «اقشامدا» قالانعان ىرگەتاس مىقتى بولعاندىقتان, «اقشام بار» دەگەن كەز كەلگەن قالامگەرمەن يىق تەڭەستىرىپ, ۇزەڭگى قاعىستىرا ءجۇرىپ سويلەسە الامىن.
«استانا اقشامى» گازەتىنەن سوڭ رەسپۋبليكالىق «ەل», «نۇر استانا», «قازاقستان», «انا ءتىلى», «ۇلت times», «قازاقيا», «ساقشى», «پوليتسيا.kz» باسىلىمدارىندا, قازاق راديوسىندا, «تاڭ» تەلەارناسىندا, Skifnews.kz پورتالىندا تىلشىلىكتەن باس رەداكتورلىققا دەيىنگى بارلىق ساتىدان ءوتىپ, جۋرناليستيكانىڭ بارلىق سالاسىن ەركىن مەڭگەرىپ الدىم دەسەم دە, «قىزدىڭ بەتىن كىم اشسا, سول ىستىق» قوي. دەمەك, ەلوردالىق باسىلىمنىڭ مەرەيتويى قارساڭىندا كەۋدە كەرىپ تۇرىپ ايتا الاتىن ءبىر اۋىز ءسوز: بۇل – مەنىڭ مەكتەبىم!
ەركەعالي بەيسەنوۆ,
Skifnews.kz اقپارات
پورتالىنىڭ باس
رەداكتورى
