وتباسى ينستيتۋتىن دارىپتەپ, ادامي قۇندىلىقتاردى نىعايتۋعا باعىتتالعان ءداستۇرلى «مەرەيلى وتباسى» بايقاۋىنىڭ قالالىق كەزەڭى ءوز مارەسىنە جەتتى.
سايىسقا قاتىسۋعا نۇر-سۇلتان قالاسى بويىنشا 70-كە جۋىق وتباسى ءوتىنىش بىلدىرگەن. ولاردىڭ اراسىندا ۇرپاق تاربيەسىنە جاۋاپتى مۇعالىمدەر دە, دەرتكە شيپا ىزدەگەن دارىگەرلەر دە, جولاۋشىلار ءۇشىن كۇنى-ءتۇنى قىزمەت ەتەتىن تەمىرجولشىلار دا, سەگىز قىرلى ونەرپازدار وتباسى دا بار. ءار اۋلەتتىڭ ءومىر جولى, تاربيە مەكتەبى ءارتۇرلى. سوندىقتان ولاردىڭ ىشىنەن ەڭ ۇزدىكتەرىن ىرىكتەپ الۋ ءادىل قازىلار القاسى ءۇشىن وڭايعا سوقپادى.
سوڭىندا قازىلاردىڭ شەشىمى بويىنشا, جارىستىڭ باس جۇلدەسىنە قويباقوۆتار وتباسى لايىق دەپ تانىلدى. قويباقوۆتار – ۇلى وتان سوعىسىنىڭ ارداگەرى مەن باتىر انادان تاراعان ۇلاعاتتى اۋلەت. اۋلەتتەگى اتا مەن اجە ون بالانى ءوسىرىپ, بۇگىندە ودان وتىز ەكى نەمەرە, وتىز ءبىر شوبەرە, بەس شوپشەك ءسۇيىپ وتىر. وتباسىنداعى ون بالانىڭ ۇشەۋى – عىلىم دوكتورى, ەكەۋى – عىلىم كانديداتى, ەكەۋى – زاڭ قىزمەتكەرلەرى, ال ۇشەۋى مەديتسينا ماماندارى ەكەن. جەڭىمپاز وتباسىنى نۇر-سۇلتان قالاسى اكىمىنىڭ ورىنباسارى ەرلان قاناليموۆ ماراپاتتادى.
مۇنىمەن قوسا, بايقاۋ قورىتىندىسى بويىنشا دۇيسەنعازى وتباسى ءى ورىندى, داۋەشوۆتەر جانە مالجانباەۆتار وتباسى ءىى ورىندى, وسپانقۇلوۆتار مەن قادىرباەۆتار اۋلەتى ءىىى ورىندى قانجىعاعا بايلادى. بۇدان بولەك, ەرەكشە قىرلارىمەن كوزگە تۇسكەن اۋلەتتەرگە ارنايى نوميناتسيا تابىستالدى. اتاپ ايتساق, ابدۋلليندەر اۋلەتى – «الەۋمەتتىك بەلسەندى وتباسى» اتالىمىنا, ايتقۇلوۆتار – «تالانتتى وتباسى» اتالىمىنا, سپاتاەۆتار اۋلەتى «سپورتشى وتباسى» اتالىمىنا يە بولدى.
انەل جارىلعاسىنقىزى,
قارجى اكادەمياسىنىڭ
ستۋدەنتى
