مۇرات قوجا, ءانشى, «كاسپي» توبىنىڭ مۇشەسى: ء«ار ءانشىنىڭ ءوز ەرەكشەلىگى بولۋى كەرەك»
– مۇرات, «كاسپيگە» دەيىن «نۇرلان مەن مۇرات» بوپ ءبىراز دۇرىلدەدىڭىزدەر. شىنىڭىزدى ايتىڭىزشى, جانىڭىزعا وسى ەكەۋىنىڭ قايسىسى جاقىن؟
كوركەم, وقىرمان
– ەكەۋىن ءبولىپ جارا المايمىن. نۇرلان ەكەۋمىزدىڭ جۇپتاسا ونەر كورسەتۋىمىزدىڭ ءوزى – قانشاما توككەن تەر, قانشاما ەڭبەك… سوندىقتان, «جوق, ول – مەنىڭ وتكەن ءومىرىم» دەپ جىلى جاۋىپ قويعىم كەلمەيدى. ءوز ورتامىزدا «نۇرلان مەن مۇراتتى» ءجيى ەسكە الامىز. كەزىندە ءبىزدىڭ ساحنالىق كوستيۋمدەرىمىزدىڭ ءوزى قانداي بولدى! ونىڭ ۇستىنە, ول ۋاقىتتا جاس ەدىك, بويداق كەزىمىز دەگەندەي… ول كەزەڭ مەن ءۇشىن ءتاتتى ەستەلىكتەرىمەن ىستىق… كەيىن بەلگىلى ءبىر جاعدايلارعا بايلانىستى نۇرلان ەكەۋمىز ەكى جاققا كەتتىك. مەن ناعىز ۇجىمدىق جۇمىسقا ىڭعايلى ادام ەكەنمىن. وسىنى ءتۇسىندىم. اقىرى, «كاسپي» توبىن قايتا قۇرىسىپ, جاڭا قۇرامعا قوسىلدىم. جالپى, توپ مۇشەلەرىنىڭ جاس شاماسى ارقالاي. الايدا, اركىمنىڭ ءوز تىڭدارمانى بار.
– داۋسىڭىزدىڭ ەرەكشە ەكەنى بايقالادى. بۇرىن قالاي بىلمەگەنبىز؟! جەكە ءانشى بولۋ ويىڭىزدا جوق پا؟
تولعاناي الىمباەۆا
– «نۇرلان مەن مۇرات» كەزىندە رەپەرتۋارىمىزدا داۋسىمىزدى كورسەتەتىندەي ءان بولعان جوق. تەك قانا ويناقى, كوڭىلدى, ىرعاقتى اندەردى ايتتىق. جاسىراتىنى جوق, كوپشىلىك مەنى سودان بەرى جەڭىل-جەلپى اندەردى ورىنداۋشى رەتىندە قابىلدايدى. ەندى ءوزىمنىڭ جەكە البومىمدى شىعارسام با دەيمىن. ونىڭ ىشىندە تەرمەلەر, ەسترادالىق باعىتتاعى اندەر بار.
– «كاسپي» توبىنداعى بەسەۋىڭىز – بەس ءتۇرلى وتباسىندا وسكەن, ءوز تالعامى, قىزىعۋشىلىعى بار, ءارتۇرلى ادامسىزدار. توپپەن جۇمىس ىستەۋ قيىن با؟
شىنار ەلۋباەۆا
– شىنى كەرەك, توپپەن جۇمىس ىستەۋدىڭ جاقسى دا, جامان دا جاقتارى بار. بەس ادامنىڭ داۋىسى بەس ءتۇرلى بولادى. ءاننىڭ سيپاتىن اشىپ بەرۋگە بۇل وتە ىڭعايلى. قيىن جاعى – بەس ادامنىڭ باسىن قۇراۋ… دەگەنمەن, ءبىر-بىرىمىزگە «قانداي جاعدايدا دا توپ ىنتىماعىنا جاۋاپكەرشىلىكپەن قاراۋعا تىرىسامىز» دەپ ۋادە بەرگەن ەدىك. كۇندە تاڭەرتەڭ ستۋدياعا كەلەمىز دە, ەكى-ءۇش ساعات شىعارماشىلىقپەن اينالىسامىز.
– مىنەزىڭىز قانداي؟ تىم تاككاپپار, اشۋشاڭ بولىپ كورىنەسىز. راسىمەن دە سولاي ما؟
ايمان, استانا
– سىرتتاي كوپ ادام مەنى ءدال ءسىز سياقتى «ادام مەنسىنبەيتىن جان» دەپ ويلايدى ەكەن. انىعىندا, ەشكىمگە كەۋدە كوتەرگەن ەمەسپىن. ەندى… سىرت بەينەم, كەلبەتىم, ساحناداعى ءجۇرىس-تۇرىسىم سونداي بولسا, قايتەيىن؟.. بارىنشا قاراپايىمدىلىق قاسيەتتى بويىمنان الشاقتاتقىم كەلمەيدى. جاسىرمايمىن, اشۋشاڭدىعىم بار. تەز اشۋلانىپ, تەز قايتام.
– كەيىنگى ۋاقىتتا بۇرىنعىداي جۇرتشىلىققا ءجيى كورىنبەي, سايابىرسىپ قالعان سياقتىسىزدار. شىعارماشىلىق جۇمىستارىڭىزدا نە جاڭالىق?
جانسايا, قاراعاندى
– ولاي ويلامايمىن. ءالى كۇنگە دەيىن تىرىسىپ, تالماي جۇمىس ىستەپ كەلەمىز. بۇيىرتسا, جاقىندا ۇلىقپان جولداسوۆتىڭ اۆتورلىق كەشىن وتكىزەمىز. كوكتەمدە «كاسپي» توبىنىڭ كونتسەرتىن جوسپارلاپ قويدىق.
– اينالايىن, مۇرات! سەنىڭ داۋىسىڭ كەرەمەت! وزىڭە ارقاشان تىلەكشى بولىپ وتىرام. ومىردە دە , ونەردە دە جولىڭ اشىق بولسىن!
مايرا, استانا
– كوپ راحمەت! وزدەرىڭىزگە دە اللانىڭ نۇرى جاۋسىن! ءبىزدىڭ جەتكەن جەتىستىكتەرىمىزدىڭ بارلىعى سىزدەردىڭ ارقالارىڭىزدا.
– ساحنالىق كيىمدەرىڭىز وزدەرىڭىزگە وتە جاراسىمدى. ارنايى تىكتىرەسىزدەر مە؟
دانا
– جىلى لەبىزىڭىزگە راحمەت! ءيا, كيىمدى ارنايى تىكتىرەمىز. ويتكەنى, ءار ءانشىنىڭ وزىندىك ەرەكشەلىگى بولۋى كەرەك دەپ بىلەمىز. بۇكىل حالىقتىڭ الدىنا شىعاتىن ونەرپازدىڭ كيىمى دە, ءسوزى دە, ءجۇرىس-تۇرىسى دا, ءتىپتى كۇلكىسى دە ادەمى بولىپ, ەرەكشەلەنىپ تۇرعانى ءجون. بۇل – ساحنانى, كورەرمەندى سىيلاي ءبىلۋدىڭ ءبىر ءتۇرى.
– «كاسپي» توبى قالاي قۇرىلىپ ەدى؟
ساۋلە
– «كاسپي» توبى ءانشى-سازگەر, گيتاراشى ۇلىقپان جولداسوۆتىڭ باستاماسىمەن قۇرىلدى. توپ ەڭ العاش رەت ساحناعا 2007 جىلعى قاراشادا «تاماشا» ويىن-ساۋىق وتاۋىنىڭ كەزەكتى كونتسەرتىندە شىقتى.
– قايىرىمدىلىق ماقساتىنداعى ءىس-شارالارعا قاتىسىپ تۇراسىزدار ما؟
كۇليا
–جىلىنا بىرنەشە رەت جەتىمدەر, قارتتار ۇيلەرىنە بارىپ كونتسەرت قويامىز. قايىرىمدىلىق كونتسەرتتەرىنە قاتىسىپ تۇرامىز. «وزىڭنەن ارتىلسا عانا ساداقا بەر» دەمەي مە؟ سوندىقتان, اۋەلى ءوز جاعدايىمىزدى جاقسارتىپ الايىق. سودان سوڭ باسقاعا كومەكتەسە جاتارمىز.
– ءانشى مۇرات قانداي اكە ەكەنىن بىلگىم كەلەدى؟
تورعىن, مۇعالىم
– بالالارىما ءجىتى كوڭىل بولۋگە تىرىسامىن. ساباقتارىن ۇزدىك وقيدى. شامام كەلگەنشە جاقسى تاربيە بەرگىم كەلەدى. «جاقسى بولىپ وسىڭدەر» دەگەن ءسوزدى ءجيى ايتىپ وتىرامىن. زور جەتىستىكتەرگە جەتسە, سوعان ماقتانىپ جۇرسەم دەيمىن.
ەركەجان ساتىمبەك