«استانا» كونتسەرت زالىندا كورنەكتى كومپوزيتور, قازكسر-نىڭ ەڭبەك سىڭىرگەن ونەر قايراتكەرى قاپان ءمۋسيننىڭ شىعارماشىلىعىنا ارنالعان كەش ءوتتى. كەشتى ەلوردانىڭ مەملەكەتتىك اكادەميالىق فيلارمونياسىنىڭ كامەرالىق حورى ۇيىمداستىردى. كونتسەرتمەيستەرلەر – قازاقستاننىڭ ەڭبەك سىڭىرگەن قايراتكەرى سارا اساباەۆا, مادەنيەت قايراتكەرى روزا شوتقاليەۆا.
كومپوزيتوردىڭ اناسى, حالىق باتىرى يساتاي تايمانۇلىنىڭ تىكەلەي ۇرپاعى, ەلىمىزدىڭ باتىس وڭىرىنە اقىندىعىمەن تانىلعان حاليما وتەعاليەۆا بالاسىن جاستايىنان ونەرگە باۋلىدى. الماتى مۋزىكالىق ۋچيليششەسىنەن كەيىن ماسكەۋ كونسەرۆاتورياسىندا وقىدى. ونى اياقتاۋعا ۇلى وتان سوعىسى كەدەرگى كەلتىرىپ, مايدانعا اتتاندى. سوعىس اياقتالعان سوڭ الماتى كونسەرۆاتورياسىندا ءبىلىمىن جالعاستىرىپ, ەۆگەني برۋسيلوۆسكيدەن ءدارىس الدى.
قاپان مۋسين – قازاق توپىراعىندا سيمفونيالىق شىعارمالاردى دامىتقان كومپوزيتورلاردىڭ ءبىرى. تۋىندىلارىنىڭ نەگىزگى ارقاۋى وتان, ەڭبەك ادامدارى بولدى. اناسىنىڭ ولەڭدەرىنە ءان-رومانستاردى جازدى. اتاقتى كومپوزيتور, قازكسر-ءنىڭ حالىق ءارتىسى لاتيف حاميدي ونىڭ شىعارماشىلىعىنا «قاپان ءمۋسيننىڭ مۇراسى حالقىمىزدىڭ مول مادەني بايلىعىنا قوسىلاتىن قىمبات قازىنا» دەپ باعا بەرگەن.
وسى كەشتە كومپوزيتوردىڭ «سايرا بۇلبۇل», «سۇيiكتi جارىم», «قازاقستان تويىنا», «الما باعىندا», «قىز سىرى», «پوچتالون ءانى», «ەگەر حات الماساڭ», «تاڭشولپان» وپەراسىنان اريا, «شالقى داريا», «وتكەن كۇز», «ەلەگيا», «جاستار ءۆالسى» سىندى تۋىندىلارىن قازاقستاننىڭ ەڭبەك سىڭىرگەن قايراتكەرلەرى قياقباي اسامباەۆ, ەرحات نۇرعاليەۆ, بيبىگۇل جانۇزاق, قايىرجان بەردىباي, مادەنيەت قايراتكەرى ەستاي مۇقاشەۆ, رەسپۋبليكالىق جانە حالىقارالىق بايقاۋلاردىڭ لاۋرەاتتارى التىنبەك ءابىلدا, دانيار ەسىمحانوۆ, ايزادا قاپانوۆا, شاھريزادا تىنىشتىق, گۇلنۇر جاقسىلىقوۆا شىرقادى.
