ۇلتتىق مۋزەيدە «سۋرەتتەر سىر شەرتەدى» اتتى مۋزەيلىك ساباق ءوتتى. ءىس-شاراعا قاتىسقان №2 ونەر مەكتەبىنىڭ وقۋشىلارى سۋرەت سالىپ, ارنايى دايىندالعان ءتۇرلى تاپسىرمانى ورىندادى.
ساباقتىڭ ماقساتى – وقۋشىلارعا بەينەلەۋ ونەرى تۋرالى ماعلۇمات بەرە وتىرىپ, وتاندىق قىلقالام شەبەرلەرىنىڭ جۇمىسىن ناسيحاتتاۋ. ونىڭ بارىسىندا ۇلتتىق مۋزەيدىڭ ونەرتانۋ ءبولىمىنىڭ كىشى عىلىمي قىزمەتكەرى مارجان مۇساتاي وقۋشىلارعا بەينەلەۋ ونەرىنىڭ قالىپتاسۋ تاريحى مەن قىلقالام شەبەرلەرى, ولاردىڭ جۇمىسى جايلى باياندادى. بالالار ايگىلى كەسكىندەمەشى, گرافيك-سۋرەتشى, قازاق بەينەلەۋ ونەرىنىڭ نەگىزىن سالۋشىلاردىڭ ءبىرى – ءابىلحان قاستەەۆتىڭ ءومىر جولىمەن, حاس شەبەردىڭ مۋزەي قورىندا ساقتالىپ تۇرعان تۋىندىلارىمەن تانىستى.
سونداي-اق ۇلتتىق مۋزەيدە قازاقستان سۋرەتشىلەر وداعىنىڭ 90 جىلدىعىنا وراي مەرەيتويلىق حالىقارالىق كورمەگە قويىلعان شەتەلدىك سۋرەتشىلەردىڭ تۋىندىلارىن مۋزەي قورىنا تاپسىرۋ ءراسىمى ءوتتى. بارلىعى 15 سۋرەتشىنىڭ 18 كارتيناسى تاپسىرىلدى.
جالپى قازاقستان سۋرەتشىلەر وداعىنىڭ 90 جىلدىعىنا ارنالعان حالىقارالىق كورمە وتاندىق سۋرەتشىلەرمەن قاتار قىرعىزستان, وزبەكستان, ازەربايجان, تاجىكستان, تۇرىكمەنستان, گرۋزيا, ليتۆا, ۋكراينا, بەلارۋس, مولدوۆا, بۋرياتيا, كانادا ەلدەرىنىڭ 226 قىلقالام شەبەرىن بىرىكتىرىپ, 270-تەن استام تۋىندى ۇسىنىلدى.
