فۋتبولدان قازاقستان چەمپيوناتىنىڭ پرەمەر-ليگاسىندا كەزەكتى تۋردىڭ ويىندارى ءوتتى.
تۋرنير كەستەسىن باستاپ كەلە جاتقان «استانا» بۇل جولى بيىل مىقتىلار قاتارىنا قايتا قوسىلعان «اقجايىق» كومانداسىن قابىلدادى. باتىس قازاقستان فۋتبولشىلارى ەلورداعا جەڭىلۋگە كەلمەگەندەرىن بىردەن اڭعارتتى. الاڭ يەلەرى قانشا شابۋىل ۇيىمداستىرعانىمەن, قوناقتار قاقپاسىنىڭ قۇلپى بۇزىلماي قويدى. ويىننىڭ 15-ءىنشى مينۋتىندا كوماندا كاپيتانى تاڭات نوسەرباەۆ ەسەپ اشاتىنداي مۇمكىندىككە يە بولعان ەدى. الايدا, ونىڭ سوققان دوبى قاقپادان ءسال بيىك كەتتى. سەرىكجان مۋجيكوۆ ەكى ويىنشىنى الداپ ءوتىپ, الا دوپتى «اقجايىق» قاقپاسىنا قاراي اۋەلەتىپ تۇسىرگەن ەدى. بۇل دوپتى پاتريك تۆۋماسي ادەمى قابىلداپ الىپ, قاقپاعا باعىتتاعانىمەن, قوناقتار قاقپاشىسى رومان باگاۋتدينوۆ قىراعىلىق تانىتا ءبىلدى. شومكو مەن دەسپوتوۆيچ تە گول سوعاتىنداي جاعداي جاسادى. بىراق, بارلىق قاۋىپسىزدىكتىڭ بەتىن قاقپاشى قايتارىپ وتىردى.
ويىننىڭ ءبىرىنشى تايمى اياقتالار ۋاقىت تا جاقىنداپ قالعان ەدى. وسى تۇستا, ياعني, ماتچتىڭ 45-ءىنشى مينۋتىندا «اقجايىق» قاقپاسىنا قاراي بۇرىشتاما دوپ بەلگىلەندى. سوڭعى كەزدەرى ايىپ دوپتارىن جاقسى ورىنداپ جۇرگەن سەرىكجان مۋجيكوۆ بۇرىشتاما سوعۋعا بەت الدى. ونىڭ اۋەلەتىپ باعىتتاعان دوبىن تاڭات نوسەرباەۆ جەرگە تۇسىرمەستەن قاقپاعا قاراي بۇرا تەپتى. الا دوپ ءاپ-ساتتە قاقپاعا تۋلاپ ءتۇستى. وسىلايشا ەسەپ اشىلدى. ال تورەشى بولسا, ءبىرىنشى تايمنىڭ اياقتالعانىن ءبىلدىرىپ ىسقىرىق شالدى.
ۇزىلىستەن كەيىن استانالىقتار شابۋىلدى ۇدەتە ءتۇستى. جارتىلاي قورعاۋشى نەمانيا ماكسيموۆيچ الاڭ ورتاسىنان العا قاراي پاس شىعاردى. ۇنەمى قوناقتاردىڭ ايىپ الاڭىندا دوپ اڭدىپ جۇرەتىن پاتريك تۆۋماسي بۇل جولى ءدال كەرەك جەردەن تابىلا ءبىلدى. گانالىق لەگيونەر اۋەلەپ كەلگەن دوپتى جاقسى يگەرىپ الدى دا, قاقپاعا ءدال باعىتتادى. ەسەپ وسىلايشا ەسەلەندى. بۇل ءتۆۋماسيدىڭ بيىلعى ماۋسىمداعى ءتورتىنشى گولى بولدى.
وتكەن جىلدان بەرى جاراقاتىنا بايلانىستى ويىنداردى تولىق وتكىزە الماي جۇرگەن تاڭات نوسەرباەۆ بيىلعى چەمپيوناتتى وتە جاقسى باستادى دەۋگە نەگىز بار. كوماندا كاپيتانى قارسىلاستار قاقپاسىن ءتورت رەت ءدال كوزدەدى. بۇل – كومانداداعى ەڭ ۇزدىك كورسەتكىش. وسىلايشا, «استانا» قۇرامىنداعى قوس شابۋىلشى تەك قانا كوماندانىڭ عانا ەمەس, جالپى چەمپيوناتتاعى مەرگەندەردىڭ قاتارىنان كورىنىپ وتىر.
وسىلايشا, «اقجايىق» كومانداسىن 2:0 ەسەبىمەن تىزە بۇكتىرگەن «استانا» تۋرنير كەستەسىندەگى ءبىرىنشى ورنىن ساقتاپ قالدى. ايتپاقشى, بۇل جەڭىس باس باپكەرى ستانيمير ستويلوۆتىڭ «استانا» كومانداسىمەن بىرگە 50-ءىنشى جەڭىسى بولىپ تىركەلدى.
بىرىنشىلىك باسەكەسىندە ازىرگە ەكىنشى ورىندا «ەرتىس», ءۇشىنشى ورىندا «وقجەتپەس» تۇراقتاپ تۇر.
تۋردىڭ باسقا ويىندارىندا مىناداي ناتيجەلەر تىركەلدى: «ورداباسى» – «شاحتەر» 2:0, «ەرتىس» – «تاراز» 2:1, «اقتوبە» – «اتىراۋ» 1:0, «جەتىسۋ» – «وقجەتپەس» 1:4,
«توبىل» – «قايرات» 1:2.
«استانا» كەلەسى ويىندى 15 مامىر كۇنى اتىراۋدا وتكىزەدى.
عالىم قوجابەكوۆ
