قازاقستان رەسپۋبليكاسىنىڭ ۇلتتىق ارحيۆىندە مەملەكەت باسشىسى قاسىم-جومارت توقاەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن گۇلدەنۋىنىڭ نەگىزى» اتتى جولداۋى بويىنشا دوڭگەلەك ۇستەل ءوتتى. جيىنعا ەلىمىزدىڭ بەلگىلى عالىمدارى, قوعام قايراتكەرلەرى, قر بعم مەملەكەت تاريحى ينستيتۋتىنىڭ جانە ەسىل اۋدانى اكىمدىگىنىڭ وكىلدەرى قاتىستى.
دوڭگەلەك ۇستەلدى قازاقستان رەسپۋبليكاسىنىڭ ۇلتتىق ءارحيۆى ديرەكتورىنىڭ ورىنباسارى جانگەلدى ماحاشوۆ جۇرگىزىپ, عالىمدار مەملەكەت باسشىسى ق.توقاەۆتىڭ مەملەكەت جانە حالىق ديالوگىنا نەگىزدەلگەن قوعامدىق دامۋ جولىنداعى يدەيالارىن ناسيحاتتاۋدا ءوز پىكىر-كوزقاراستارىن ءبىلدىردى.
قر بعم مەملەكەت تاريحى ينستيتۋتىنىڭ ءبولىم باسشىسى, تاريح عىلىمدارىنىڭ دوكتورى, پروفەسسور عاني قاراساەۆ مەملەكەتتىڭ دامۋى, باسەكەگە قابىلەتتى بولۋى الدىمەن ونىڭ عىلىمىنا بايلانىستى ەكەنىن, عىلىمدى دامىتقاندا عانا بارلىق سالادا ءوسۋ مەن ورلەۋ بولاتىنىنا ناقتى مىسالدار كەلتىردى. «وسىنداي تالاپ تۇرعىسىنان العاندا قر پرەزيدەنتى ق.توقاەۆتىڭ جولداۋىنداعى عىلىمعا قويىلاتىن تالاپتاردىڭ نەگىزىنە: الەمدىك باسەكەگە ساي عالامدىق جاڭالىقتار اشۋدى ماقسات ەتىپ, عىلىم تابىستارىن تولىعىمەن جانە جىلدام وندىرىسكە ەنگىزە وتىرىپ, عىلىمي ينستيتۋتتار مەن جوعارى وقۋ ورىندارىنىڭ شەتەلدىڭ عىلىمي ورتاسىمەن تاجىريبە الماسۋىن مولايتۋ جانە ونىڭ ناتيجەلىلىگىنە قول جەتكىزۋ قاجەت. سونداي-اق عالىمداردىڭ الەمدىك جوعارى رەيتينگىلىك عىلىمي جۋرنالدارىنداعى باسىلىمدارىن مولايتۋ كەرەك, وسى ارقىلى قازاقستان عىلىمى بەلگىلى بولا تۇسەدى» دەدى. عالىم سونىمەن بىرگە ءار باعىتتارداعى عىلىمي جوبالاردى ۇيىمداستىرۋدى تۇراقتى جۇزەگە اسىرىپ, وعان بولىنەتىن قارجىنى مولايتۋدى, عالىمداردىڭ شىعارماشىلىق جۇمىستارىمەن اينالىسۋىنا جاعداي جاساۋدى ۇسىندى.
ەۋرازيالىق مەديتسينالىق قاۋىمداستىقتىڭ ۆيتسە-پرەزيدەنتى ساياسي كەڭەسىنىڭ بيۋرو مۇشەسى نادەجدا پەتۋحوۆا «ەل پرەزيدەنتىنىڭ جولداۋى بارلىق تۇرعىندار ءۇشىن ماڭىزدى وقيعا, ويتكەنى ءاربىر ازامات ءوزى ءۇشىن باستى باعىت تابادى» دەي كەلىپ, مەديتسينا سالاسىن دامىتۋداعى وڭ وزگەرىستەر, جاڭا تالاپتار, ەڭبەك ادامىنا دەگەن قۇرمەتتى قالىپتاستىرۋ ماسەلەسىنە توقتالدى. الەۋمەتتىك كومەك, جالپى مەملەكەت تاراپىنان جاسالىپ وتىرعان قامقورلىقتار تۋرالى ايتا كەلىپ, قوعامنىڭ العا جىلجۋىنا بارشانىڭ بىردەي مۇددەلى ەكەندىگىن ەسكە سالدى.
اكادەميك قازبەك قازكەنوۆ مەملەكەت الدىنداعى رەفورمالار مەن نەگىزگى مىندەتتەردىڭ وزەكتىلىگىنە ماڭىز بەردى. ودان كەيىن ءسوز العان قر بعم عك مەملەكەت تاريحى ينستيتۋتىنىڭ عالىمدارى سەيتقالي دۇيسەن جانە قانات ەڭسەنوۆتەر ءوز باياندامالارىندا پرەزيدەنت جولداۋىندا ەل مەن قوعامنىڭ ودان ءارى دامۋى ايقىن باياندالىپ, قازاقستاندىقتاردىڭ ءومىر ءسۇرۋ ساپاسىن جاقسارتۋعا باعىتتالعان ماڭىزدى ستراتەگيالىق ماقسات-مىندەتتەر بەلگىلەنگەنىن اتاپ كورسەتتى.
فاريدا كاريموۆا
