قازاقستان رەسپۋبليكاسىنىڭ ۇلتتىق مۋزەيىندە «ۋاقىت جانە استانا: بولاشاقتان كەيىن» اتتى زاماناۋي ونەر كورمەسى اشىلدى. 21 قاڭتارعا دەيىن جالعاساتىن كورمەگە 25 جاس اۆتوردىڭ ينستاللياتسيا, فوتو نەمەسە بەينەارت, پەرفورمانس, كەسكىندەمە جانرىنداعى تۋىندىلار قويىلدى.
«كورمەدە تاجىريبەلىك تۋىندىلاردى كورىپ وتىر-سىزدار. وعان سۋرەتشىلەر عانا قاتىسپاي, عالىمدار, الەۋمەتتانۋشىلار, فيلوسوفتار, ساۋلەتشىلەر, انتروپولوگتار, بيولوگتار اتسالىستى. مۇنداعى جۇمىستار استانا بولاشاقتا قالاي ورلەيتىنى, قالانىڭ دامۋىن تەجەيتىن قانداي ويلاردان ارىلۋىمىز كەرەكتىگى جونىندە سىر شەرتەدى. كوبىمىز ەلورداعا نەگىزىنەن سىرتتان كەلدىك. سوندىقتان ءالى دە استاناعا بوي ۇيرەتە الماي ءجۇرگەن ادامدار ارامىزدا ءجۇر. مىنا كورمە استانانى قالا تۇرعىندارىنا نەعۇرلىم جاقىنداتۋ, ەلىمىزدىڭ باس قالاسىن ادامدارعا جايلىراق ەتۋ ماقساتىندا ۇيىمداستىرىلدى. وسىندا تۋىندىلارى قويىلعان سۋرەتشىلەردىڭ جاسى قازاقستان تاۋەلسىزدىگىمەن شامالاس. ارينە, ولار تاۋەلسىزدىككە دەيىنگى كەزەڭ مەن بۇگىندى, بولاشاق ءومىردى قالاي ەلەستەتەتىنى ءبارىمىزدى قىزىقتىرادى» دەدى قر ۇلتتىق مۋزەيى زاماناۋي ونەر ورتالىعىنىڭ جەتەكشىسى روزا ابەنوۆا.
كورمە كۋراتورى ايگەرىم قاپاردىڭ ايتۋىنشا, «Artcom» شىعارماشىلىق كوممۋنيكاتسيالىق پلاتفورماسىنىڭ باستاماسىمەن جۇزەگە اسىپ جاتقان اتالمىش جوبا ونەردى عىلىممەن ۇشتاستىرۋدى كوزدەيدى.
«قازىر, نەگىزىنەن, اقمولانىڭ استانا بوپ وزگەرگەن بەرگى جيىرما جىلدىق تاريحىن عانا ءسوز ەتەمىز. كەزىندە قازاقستانداعى تىڭ ولكەسىنىڭ ورتالىعى بولعان تسەلينوگراد كەزەڭىن ەسكە العىمىز دا كەلمەيدى. ونىمىز ءبىر جاعىنان دۇرىس تا, سەبەبى تىڭنىڭ ەلىمىزگە اكەلگەن زاردابى بەلگىلى. ماسەلەن, كوركەم ادەبيەتتە قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى ساكەن ءجۇنىسوۆتىڭ «جاپانداعى جالعىز ءۇي» پوۆەسى مەن كورنەكتى اقىن كەڭشىلىك مىرزابەكوۆتىڭ «بوز بيە نەمەسە تىڭ جىرتقان جىل» ولەڭى بۇل ناۋقاندى اشكەرەلەيدى. كورمەگە قويىلعان اسحات احمەدياروۆتىڭ «وراق پەن بالعا» تۋىندىسى ەرىكسىز كەڭەستىك كەزەڭدى ەسكە تۇسىرەدى ەكەن.
بۇل كورمەدەگە كارتينالارداعى وڭ جاعالاۋ – استانانىڭ كەشەگىسى, سول جاعالاۋ – بۇگىنگىسى جانە «ەكسپو-2017» كورمەسىنىڭ اۋماعى – بولاشاعى سەكىلدى ەلەس-تەيدى. كورمەنى ارالاپ جۇرگەندە ويلاندىراتىن كارتينالار ءبىراز كەزدەسەدى. ال ولاردى سالعان جاس سۋرەتشىلەر ەكەنىن ەسكەرسەك, ەلىمىزدە بەينەلەۋ ونەرىنىڭ بولاشاعى جايلى كەمەل ويلار كەلەدى.
امانعالي قالجان
