ەلورداداعى «قازاقستان» ورتالىق كونتسەرت زالىندا قر مادەنيەت جانە سپورت مينيسترلىگىنىڭ ۇيىمداستىرۋىمەن قازاقستاننىڭ حالىق جازۋشىسى, كورنەكتى اقىن مۇحتار شاحانوۆتىڭ «عۇمىرداريا» اتتى سازدى ءان مەن جىرعا تولى تاماشا كەشى ءوتتى.
جۋىردا رەسەيدىڭ ءبىرىنشى ارناسىنان وتكەن عاسىردىڭ الپىسىنشى جىلدارى ورىس ادەبيەتىنە داۋىلدى كۇندەرى تولقىندارى اساۋ اتتاي تۋلاعان تەڭىزدەي بۋىرقانىپ كەلگەن, ءىرى بۋىننىڭ وكىلى, دارىندى اقىن روبەرت روجدەستۆەنسكيدىڭ 85 جىلدىعىنا ارنالعان «ەحو ليۋبۆي» دەگەن كونتسەرت بەرىلدى. ءبىر ساعاتتان استام ۋاقىتقا سوزىلعان كەشتە قالامگەردىڭ ولەڭدەرىنە جازىلعان شىعارمالار ورىندالدى. باسى ارتىق ءبىر ماداق ءسوز بولعان جوق, كورەرمەندەر اقىننىڭ جىرلارىمەن تىنىستاپ, ەرەكشە سەزىمگە بولەندى. كونتسەرتتى ءوزىم دە قىزىعىپ كوردىم. مۇنى نەگە ايتىپ وتىرمىن؟ سەنبى كۇنگى ەلوردادا وتكەن مۇحتار اعامىزدىڭ كەشى دە ءدال وسىنداي دەڭگەيدە ءوتتى. كەش شىمىلدىعى شاعىن بەينە روليكپەن اشىلدى. وندا حالىق جازۋشىسىنىڭ تۋعان جەرى مەن شىعارما-
شىلىعى تۋرالى ايتقان اۋزى
دۋالى تۇلعالاردىڭ ىزگى لەبىزدەرى كورسەتىلدى. اقىننىڭ جۇرتشىلىق ءسۇيىپ تىڭدايتىن اندەرى شىرقالدى. ولاردى تامارا اسار, الىشەر كاريموۆ, تورەعالي ءتورالى سەكىلدى بەلگىلى انشىلەر جۇرەككە جەتكىزىپ, تامىلجىتىپ ورىندادى. قالامگەردىڭ شىعارماشىلىعىن قادىر تۇتاتىن جاستار اقىن ولەڭدەرىن وقىدى. اسىرەسە, كەشتىڭ شىرايىن كىرگىزگەن, اقىننىڭ نەمەرەسى نۇرمۇحاممەد راۋانۇلى شاحانوۆ بولدى, ول كوپشىلىككە اتاسىنىڭ تاماشا تۋىندىسىن وقىپ بەردى. جۇدىرىقتاي بالانىڭ تۋرا اتاسى سەكىلدى ەكى قولدى سەرمەپ, جالىنداپ وقىعان ولەڭى جۇرتشىلىقتى ءدۇر ەتكىزدى. كەشتىڭ سوڭىندا مۇحتار شاحانوۆتىڭ ءوزى ەل الدىنا شىقتى. حالىق اقىن ساحناعا كوتەرىلگەنشە ورىندارىنان تىك تۇرىپ, قۇرمەت كورسەتتى. قالامگەر سوڭعى ءبىر ايدا 18 ولەڭ جازعان ەكەن, سودان ءالى سۋىپ ۇلگەرمەگەن جاڭا ولەڭدەرىن وقىپ, جينالعاندارعا العىسىن ءبىلدىردى.
ايتپاقشى, بيىل ارداقتى ازامات جەتپىس بەس جاستىڭ تورىنە
كوتەرىلدى.
اۋىلىنداعى ورتا مەكتەپتى بىتىرگەننەن كەيىن تراكتوردىڭ تىركەۋشىسى بولعان بوزبالا, كەيىن ءوزىنىڭ دارىنىمەن جالپاق ەلگە تانىلدى. مۇحتار شاحانوۆ – قازاق پوەزياسىنا ءاپ دەگەننەن-اق, ەشكىمگە ۇقسامايتىن ءوز ورنەگىمەن كەلگەن اقىن. ونىڭ العاشقى جىرلارىنان باستاپ, كىتاپتارىن وقىرماندار قولدان تۇسىرمەدى, باللادالارى مەن پوەمالارى الەمنىڭ 20-دان استام تىلىنە اۋدارىلدى. ەل اراسىنا كەڭ تاراعان تاماشا اندەردىڭ دە اۆتورى اتاندى. اقىننىڭ تاعى ءبىرى قىرى – قايراتكەرلىگى. تالاي ەلدىك ىستەردىڭ باستاماشىسى بولدى, ونى كوزى قاراقتى قاۋىم جاقسى بىلەدى دەپ ويلايمىز.
قىسقاسى, باس قالادا وتكەن كورنەكتى قالامگەردىڭ «عۇمىرداريا» دەپ اتاعان كەشى ارناسى تار وزەندەردەي ءتۇبى تارتىلمايتىن, ۇلى سىر سەكىلدى جىردارياعا اينالعانىن كورىپ, كوڭىلىمىز ءوسىپ قايتتى.
ازامات ەسەنجول
