ەلورداداعى بىرنەشە ءبىلىم بەرۋ مەكەمەلەرىندە جازعى مەكتەپ جۇمىسىن جالعاستىرىپ جاتىر. سولاردىڭ ءبىرى – №2 ونەر مەكتەبى. مۇنداعى ەرەكشەلىك – بالالار شىعارماشىلىعىن دامىتىپ, قابىلەتتەرىن شىڭدايدى. مەكتەپ جىل سايىن ماۋسىم ايىندا اشىق بولادى.
جازعى مەكتەپتىڭ ماقساتى – بالالاردىڭ بوس ۋاقىتىن ءتيىمدى وتكىزۋ ءارى ونەرگە باۋلۋ. مەكتەپ باسشىسى گۇلميرا جانگەلدىنىڭ ايتۋىنشا, قازىرگى تاڭدا ۇيىرمەلەرگە 100-گە جۋىق وقۋشى قاتىسىپ ءجۇر.
– بالالار جازعى مەكتەپكە قاتىسا وتىرىپ, بويىنداعى قابىلەتتەرىن دامىتادى. ءبىر ايدىڭ ىشىندە شىعارماشىلىققا ۇيرەنەدى. سول ارقىلى قابىلەتتەرىن اشۋعا مۇمكىندىك بار. ءبىر قىزىعى, مۇندا ونەر مەكتەبىندەگى وقۋشىلارىمىزدان بولەك باسقا دا ءبىلىم وشاقتارىنان بالالار قاتىسىپ ءجۇر, – دەدى گۇلميرا جانگەلدى.
جازعى مەكتەپكە بالالاردى قابىلداۋدىڭ ناقتى ەرەجەسى جوق. كەز كەلگەن بالا قاتىسا الادى.
– مۇندا ارنايى ىرىكتەۋ وتكىزىپ, ەمتيحان المايمىز. 7-15 جاستاعى بالالار قاتىسا الادى. ۇيىرمەلەر وتە كوپ. اتاپ ايتساق, «القيسسا» جانە «كۇي كەرۋەنى» (دومبىرا), «جەتىگەن سازى» (جەتىگەن), «جاستار جىرى» ء(داستۇرلى ءان), «كوڭىلدى نوتالار» (سولفەدجيو) «سيقىرلى قىلقالام» (سۋرەت), «عاجايىپ اۋەن» (قوبىز) , «ءان الەمى» (ۆوكال), «مۋزىكا الەمى» (فورتەپيانو), «ەركەناز» (بي) ۇيىرمەلەرى بار. بۇدان بولەك, ءوزىم جەتەكشىلىك ەتەتىن «اينالايىن» بالالار حورى دا جۇمىس ىستەيدى, – دەدى مەكتەپ باسشىسى.
جازعى مەكتەپكە بيىل قاتىسقان اسىلبەك جولامان قوبىز ۇيىرمەسىن تاڭداعان.
– مۇنداعى ۇيىرمە قاتتى ۇنايدى. سەبەبى جازعى مەكتەپكە قاتىسۋ ارقىلى جاڭا دوستار تاپتىم. بوس ۋاقىتىم كوپ بولعاسىن قوبىز اسپابىن ۇيرەنۋگە قىزىعۋشىلىعىم وياندى. قازىر تەز مەڭگەرىپ جاتىرمىن. بولاشاقتا دا وسى اسپاپتى جالعاستىرعىم كەلەدى, – دەدى اسىلبەك.
ال ونەر مەكتەبىنىڭ وقۋشىسى ەستاي 4 جىلدان بەرى مۋزىكامەن اينالىسادى. العاش رەت اناسى 8 جاسىندا الىپ كەلگەن ەكەن.
– ونەر مەكتەبىندە ءبىلىم العانىما 4 جىل بولدى. دومبىرانىڭ ءۇنىن بالا كەزدەن ەستىپ ءوستىم. كىشكەنتاي كەزىمدە اتام «بالبىراۋىن», «سارىارقا» كۇيلەرىن وينايتىن. 2 جاسىمدا ويىنشىق دومبىراممەن اتاممەن قوسىلىپ, جاياۋ مۇسانىڭ «اق سيسا» ءانىن ورىندايتىنبىز. ەرتىس ءوڭىرىنىڭ تانىمال ونەر قايراتكەرى, اقىن ەستاي بەركىمبايۇلى سياقتى دومبىراشى بولسىن دەپ اتىمدى ەستاي دەپ قويعان بولاتىن. قازىر ۇيىرمەدە دومبىرادان ساباق الىپ ءجۇرمىن. جازعى مەكتەپتە نۇرحان اعايمەن «بالبىراۋىن», «كوروعلى», «اداي» كۇيلەرىن ۇيرەندىم. ءابدىمومىن جەلدىباەۆتىڭ «ەركە سىلقىم» كۇيىن ورىنداعاندى جاقسى كورەمىن.
قوبىز اسپابى ۇيىرمەسىنىڭ مۇعالىمى جاڭىلسىن كۇمىسبەكوۆانىڭ ايتۋىنشا, مۇندا ساباقتار ءتۇرلى ءادىس بويىنشا وتەدى.
– جازعى مەكتەپكە قابىلەتىنە قاراي وقۋشىلاردى تاڭداپ الامىز. اسپاپتى ۇيرەنەمىن دەگەن وقۋشىنىڭ تالابىن كەسۋگە بولمايدى. سول ءۇشىن كەيدە ورتاشا قابىلەتتى وقۋشىلاردى دا قابىلداي بەرەمىز. مۇنداعى بالالاردىڭ جاسى ءارتۇرلى. بۇرىننان قاتىسىپ جۇرگەن وقۋشىلار دا بار. كۇنىنە وقۋشىلارمەن 3 ساعات جۇمىس ىستەيمىن. جەكە وقۋشىمەن ءبىر ساعات, ال توپپەن ەكى ساعات ساباق وتەمىز. ساباقتاردىڭ بارلىعى ويىن تۇرىندە, جەڭىل بولادى, – دەدى جاڭىلسىن كۇمىسبەكوۆا.
جازعى مەكتەپتە 10 مۇعالىم جۇمىس ىستەيدى. ءار ۇيىرمە بويىنشا 2 مۇعالىم بولىنگەن. ۇيىرمە ماۋسىم ايىنىڭ سوڭىنا دەيىن جۇمىس ىستەيدى. قاتىسقىسى كەلەتىن بالالار ءوتىنىش جازىپ, كەلۋگە بولادى.
ايزادا جايىققىزى
