ەلورداداعى وقۋشىلار سارايىندا استاناداعى №1 ونەر مەكتەبىنە 35 جىل تولۋىنا وراي «تاريح وتكەلدەرى» اتتى شىعارماشىلىق كونتسەرت ءوتتى. ايتۋلى شارادا مۋزىكالىق مەكتەپتە ءتالىم الىپ جاتقان وقۋشىلار ءوز ونەرلەرىن پاش ەتتى. بالالاردى قولداپ, ولاردىڭ ونەرلەرىن تاماشالاۋعا اتا-انالار, سونداي-اق ءبىلىم باسقارماسىنان وكىلدەر جانە وزگە دە ونەر مەكتەپتەرىنىڭ باسشىلارى قاتىستى.
ەلباسى ن.ءا.نازارباەۆ «بولاشاققا باعدار» رۋحاني جاڭعىرۋ» اتتى ماقالاسىندا «ۇلتتىق سالت-داستۇرلەرىمىز, ءتىلىمىز بەن مۋزىكامىز, ادەبيەتىمىز, جورالعىلارىمىز, ءبىر سوزبەن ايتقاندا, ۇلتتىق رۋحىمىز بويىمىزدا ماڭگى قالۋعا ءتيىس. ابايدىڭ دانالىعى, اۋەزوۆتىڭ عۇلامالىعى, جامبىلدىڭ جىرلارى مەن قۇرمانعازىنىڭ كۇيلەرى, عاسىرلار قويناۋىنان جەتكەن بابالار ءۇنى – بۇلار ءبىزدىڭ رۋحاني مادەنيەتىمىزدىڭ ءبىر پاراعى» دەپ ۇلتتىق مادەنيەتىمىزدى ساقتاماي ەشقانداي جاڭارۋ بولمايتىنىن ايتقان بولاتىن.
وقۋشىلار سارايىنىڭ كونتسەرت زالى كورەرمەنگە لىق تولدى. ساحنا شىمىلدىعىن اشقان وركەستر ەلامان ماكەنوۆتىڭ جەتەكشىلىگىمەن نۇرعيسا تىلەنديەۆتىڭ «القيسسا» كۇيىن ءبىر توپ وقۋشى ءوز ناقىشىندا ورىنداپ, وسىندا جينالعان ونەرسۇيەر قاۋىمدى تەبىرەنتتى.
بيىل كورەرمەندەرگە ونەر مەكتەبى جاڭا نومىرلەرىن دە الا كەلىپتى. بۇل, البەتتە, 12-13 قىز-جىگىتتەن قۇرالعان ءداستۇرلى ءاننىڭ شەرۋى. ولار ءبىر مەزەتتە وركەستردىڭ جەتەكشىلىگىمەن قوبىز, بايان, دومبىرا سىندى اسپاپتاردا ويناپ, جۇرتشىلىقتىڭ جىلى لەبىزىنە بولەندى.
شارادا جاس تالانتتار ءوز ونەرلەرىن ورتاعا سالىپ, قوناقتاردىڭ ىستىق ىقىلاسىنا يە بولدى.
كەش بارىسىندا مۋزىكا مەكتەبىنىڭ باسشىسى فارحاد سابيەۆ ءسوز الىپ, جاس تالانتتاردىڭ بولاشاقتا ەلدىڭ تانىمال ونەر مايتالماندارى بولۋىن تىلەدى.
مەرەكەلىك كونتسەرت سوڭى ءداستۇر بويىنشا ونەر مەكتەبىنىڭ ءانۇرانىن ورىنداۋىمەن قورىتىندىلاندى.
شاكىرت تاربيەلەۋ, ونىڭ جەتىستىككە جەتۋى, بيىكتەردەن كورىنۋى تىكەلەي ۇستازعا بايلانىستى ەكەنى بارىمىزگە بەلگىلى. وسى رەتتە اتالمىش مۋزىكا مەكتەبىندە 10 جىلدان بەرى قىزمەت ەتەتىن لياززات مۇحانبەتوۆانىڭ دا قوسقان ۇلەسى زور. زەينەت جاسىنا جەتسە دە, وسى قارا شاڭىراقتا ءالى دە ديرەكتوردىڭ وقۋ ءىسى جونىندەگى ورىنباسارى قىزمەتىن ابىرويمەن اتقارىپ ءجۇر. سونداي-اق مۋزىكا مەكتەبىندە 12 جىلدان بەرى جاس بۇلدىرشىندەردى دومبىرامەن ءان سالۋ داستۇرىنە ۇيرەتىپ جۇرگەن عازيزا كۇلدىباەۆانىڭ دا قوسقان ۇلەسى ۇشان-تەڭىز.
بۇگىنگى كەشتە دە ونەرگە ءومىرىن ارناعان عازيزا كۇلدىباەۆانىڭ ونەرپازدارى ءداستۇرلى ءان شەرۋىنە قاتىسىپ, حالىق ءانى «جاس ەكپىندى» دۇركىرەتە شىرقادى.
ءار ساباعىن جۇيەلى جوسپارلاپ, شاكىرتتەرىنە قازاق حالقىنىڭ سالت-ءداستۇرىن, مادەنيەتىن, قازاقتىڭ ءداستۇرلى مۋزىكاسىن بويىنا ءسىڭىرىپ, ۇلتىمىزدىڭ بولاشاق ۇرپاقتارىن تاربيەلەۋگە ءوز ۇلەسىن قوسىپ ءجۇر. قازىر جاسى الپىستى القىمداعان زەينەتكەر-ۇستازدىڭ شاكىرتتەرى ءتۇرلى كونكۋرستارعا قاتىسىپ, جۇلدەلى ورىندارعا يە بولۋدا. ۇستاز «ءبىز قالالىق, رەسپۋبليكالىق بايقاۋلارعا قاتىسىپ جۇرگەن شاكىرتتەرىمىزبەن دە ماقتانا الامىز» دەيدى. سونداي-اق وسىنداي شاكىرتتەردى ونەر الامانىنا قوسۋداعى زەينەتكەر-ۇستازدىڭ قاجىرلى ەڭبەگى دە ءتۇرلى العىس حاتتار جانە ارنايى ديپلومدارمەن باعالانعان. ماسەلەن, بيىل «ۇلتتىق دومبىرا كۇنى» مەرەكەسىنىڭ وتۋىنە اتسالىسقانى ءۇشىن مادەنيەت جانە سپورت باسقارماسىنىڭ باسشىسى بولات ماجاعۇلوۆتىڭ العىس حاتىمەن ماراپاتتالدى.
«ۇستازدىڭ ەڭبەگىنىڭ جانعانى – شاكىرتىنىڭ وزعانى» دەمەكشى, جاس ورەندەردى ونەرگە باۋلىپ جۇرگەن ۇستازدار قاۋىمىنا الداعى ۋاقىتتا شىعارماشىلىق تابىستار تىلەيمىز.
سابينا كاكىمجان
