ۋاقىت وتكەن سايىن استانا تۇرعىندارىنىڭ سانى ارتىپ جاتىر. سەنبەسەڭىز, تاڭعى ساعات سەگىزدەردە ورتالىق كوشەلەرمەن ءجۇرىپ كورىڭىزشى. باعدارشامنىڭ جاسىل ءتۇسىن توسىپ تۇرعان جۇرگىنشىلەر قۇددى ءبىر امەريكانىڭ داۋنتاۋنىن ەسكە تۇسىرەدى. ىعى-جىعى ادام, ءبارى جۇمىسباستى. بۇل قۇبىلىس كولىگى بار كىسىلەرگە قيىندىق كەلتىرۋدە. اۆتوتۇراقتان بوس ورىن تابۋ قيىن. جۇمىسىڭىز مينيسترلىكتەر ءۇيى مەن سونىڭ جانىنداعى ءزاۋلىم عيماراتتاردا بولسا, تىپتەن تاۋسىلارىڭىز انىق. ويتكەنى, ءسىز سياقتى قانشاما جاننىڭ تەمىر تۇلپارى – سول تۇراققا ۇمىتكەر. بۇل پروبلەمانى ۋاقىتشا بولسا دا شەشۋدىڭ جولى – ۆەلوسيپەدكە اۋىسۋ دەر ەدىك. ءارى اۋانى لاستامايسىز. بەرەكەسى كەتكەن بەنزين جىرىنا دا باسىڭىز اۋىرمايتىن بولادى.
سالاۋاتتى ءومىر سالتىن ۇستانعان جاقسى, ارينە. دەگەنمەن, وسىعان بەت بۇرعان ازاماتتاردىڭ الدىنان كەس-كەستەي شىعاتىن بىرنەشە كەدەرگىنى بايقادىق. اۋەلگىسى – ۆەلوجولدىڭ ازدىعى. ۆەلوجول دەپ اسپەتتەپ وتىرعانىمىزدىڭ ءوزى – قاق ورتاسىنان اق جولاقپەن بولىنگەن تروتۋار. ۆەلوسيپەدتىڭ سۋرەتى سالىنعانىنا قاراماستان, جاياۋ جۇرگىنشىلەر ول جولمەن جايباراقات جۇرە بەرەدى. ءبىر جاعىنان ولاردى دا تۇسىنۋگە بولادى. ۆەلوجولدىڭ شەتىن جيەكتەپ, ءتۇسىن تۇستەپ قويماعان سوڭ, نەنىڭ قانداي جول ەكەنى ءبىر كورگەن كوزگە شىنىمەن بايقالمايدى.
سوڭعى كەزدەرى ءبىراز جەردە «استانا بايكتىڭ» بەكەتتەرى سالىنا باستادى. جوبانىڭ ديرەكتورى الماگۇل قاسىموۆامەن سويلەسكەنىمىزدە, قىزمەتتەرىنىڭ ءمانجايىن بىلايشا ءتۇسىندىردى: «ءبىزدىڭ ۆەلوسيپەدتى ەكى تاسىلمەن جالعا الساڭىز بولادى. ءبىرىنشىسى – كارتوچكا ارقىلى. ول ءۇشىن جەرگىلىكتى بولىمگە جەكە كۋالىگىڭىز بەن تۇرعىلىقتى جەرىڭىزدەن انىقتاما الىپ بارساڭىز جەتكىلىكتى. كارتوچكانىڭ باعاسى – التى جارىم مىڭ تەڭگە. ونىڭ بەس مىڭى – ۆەلوماۋسىمعا الىناتىن ابونەمەنت, ءبىر مىڭى – كەپىلدىك جارناسى, ال قالعان بەس ءجۇز تەڭگە – مينيمالدى تاريف قۇنى. ال ەكىنشى ءادىس – سمس. بۇل ءادىس قالامىزعا سىرتتان كەلگەن قوناقتار ءۇشىن ءتيىمدى. سەبەبى, ولاردا مەكەنجاي انىقتاماسى جوق. اۋەلى ءبىزدىڭ سايتقا تىركەلەدى. سوندا ءوزىنىڭ بانكتىك كارتوچكاسىنىڭ ءنومىرىن جازىپ, ونلاين تۇردە ءوتىنىش بىلدىرەدى. ءبىر ەستە ساقتايتىن نارسە – كارتوچكادا وتىز جەتى مىڭ تەڭگەدەن كوپ اقشا بولۋى ءتيىس. بۇل سومانى پروتسەسس كەزىندە ۋاقىتشا بۇعاتتايمىز. كەيىن ۆەلوسيپەدتى ۋاقىتىلى تابىستاعاندا, كەرى قايتارامىز».
ۆەلوشەيرينگ جۇيەسىنىڭ ءبىزدىڭ ەلدە دە دامىپ جاتقانى – قۋانتارلىق جايت. ايتكەنمەن, ءالى دە بولسا جەتىلدىرەتىن جاقتارى كوپ سەكىلدى. بىرىنشىدەن, كارتوچكانى راسىمدەيتىن نۇكتە استانا بويىنشا ەكەۋ-اق. سول جاعالاۋ تۇرعىندارى «مەGA» ساۋدا ورتالىعىنداعى, وڭ جاعالاۋ تۇرعىندارى «استانا مولل» ساۋدا ورتالىعىنداعى جالعا بەرۋ بولىمدەرىنە بارادى. ءسىز قالانىڭ مۇلدە باسقا تۇكپىرىندە تۇرساڭىز, كەرەكتى بولىمگە جەتۋ ءۇشىن اجەپتاۋىر اۋرەلەنۋگە تۋرا كەلەدى. دامىعان ەلدەردە ءار ۆەلوبەكەتتىڭ تۇبىندەگى تەرمينالدىڭ كومەگىمەن-اق كارتوچكانى الا بەرەسىز. ەكىنشىدەن, ۆەلوابونەمەنتتىڭ تولەمى وتە ىڭعايسىز. ەكى-ءۇش كۇن عانا پايدالانعان كارتوچكاڭىزدى اپارىپ بەرسەڭىز, سىزگە تەك تاريف قۇنىنان قالعان اقشاڭىزدى قايتارىپ بەرەدى. ياعني, كارتوچكالار ۇزاق جانە قىسقا مەرزىمگە لايىقتالىپ جاسالماعان. مۇنىڭ ورنىنا ءبىر كۇندىك, ءبىر اپتالىق, ءبىر ايلىق نەمەسە ءبىر ماۋسىمدىق كەزەڭدەرگە سايكەستەندىرىلگەن ابونەمەنتتەر شىعارۋعا بولادى. ۇشىنشىدەن, كارتوچكا الۋعا قاجەتتى قۇجاتتار كەز كەلگەن ۋاقىتتا قالتادان تابىلمايدى. مەكەنجاي انىقتاماسىن الۋ ءۇشىن حالىققا قىزمەت كورسەتۋ ورتالىعىن جاعالايسىز. وندا دا بۇل – تەك ەلوردا تۇرعىندارى ءۇشىن. تىركەلگەن جەرىڭىز باسقا قالادا بولىپ, مۇندا جۇمىس بابىمەن نە وقىپ جۇرسەڭىز, تاعى دا ءتيىستى ورىننان قاعاز سۇراتادى. جاعدايدى بۇلايشا قيىنداتپاي-اق جەكە كۋالىكتى عانا تالاپ ەتسە جەتكىلىكتى ەمەس پە؟! تورتىنشىدەن, كومپانيا وكىلدەرى سمس ارقىلى راسىمدەۋدە بانكتىك كارتوچكاڭىزدا وتە ۇلكەن سومانىڭ بولۋىن مىندەتتەيدى. مەيلى, ۆەلوجۇرىس اياقتالعان سوڭ, قايتارىپ بەرەدى دەلىك. بىراق كەز كەلگەن شاقتا كارتوچكادا وتىز جەتى مىڭ تەڭگە بولا بەرمەيتىنىن دە ەسكەرۋ كەرەك شىعار.
دامىعان ەل دەگەننەن شىعادى. بۇل كۇندەرى ءبىراز مەملەكەتتىڭ جۇرتشىلىعى قوس دوڭعالاققا قونجيعان. بىزگە ۇلگى بولۋعا تۇرارلىق ىستەرىن دە ايتا كەتەيىك. ماسەلەن, نورۆەگيانىڭ ترونحەيم اتتى شاپ-شاعىن قالاسىندا ۆەلوسيپەدتەرگە ارنالعان ءليفتى بار. جەرگىلىكتى تۇرعىندار مەن قوناقتارعا سول ليفتىمەن برۋباككەن تاۋىنا تەمىر تۇلپارىمەن بىرگە كوتەرىلۋگە رۇقسات. جاڭا زەلانديانىڭ وڭتۇستىگىندەگى كرايستچەرچ كەنتى – ۆەلوكينوتەاترىمەن تانىمال. پەدالدى توقتاۋسىز اينالدىرسا, ودان پايدا بولعان ەلەكتر قۋاتىنىڭ كومەگىمەن فيلم كورۋگە بولادى. مالميولىك ۆەلوجولدارعا كادىمگى كوشەلەردىكى سەكىلدى اتتار بەرىلىپتى. بوگوتادا جىلىنا ءبىر رەت اۆتوكولىك قوزعالىسىن توقتاتىپ, ۆەلوسيپەد كۇنىن اتاپ وتەدى. ال لوندوندىقتار قالاداعى قوعامدىق ۆەلوسيپەدتەردى نەلىكتەن «Boris bike» اتاپ كەتكەنىن بىلەسىزدەر مە؟ مەرلەرى بوريس دجونسون اركەز وسى كولىك ءتۇرىن قولدانادى ەكەن. «جاقسىدان ۇيرەن» دەيدى عوي قازاق مۇندايدا.
بوتاگوز ماراتقىزى
