اۋدان اكىمى ەرعالي ەگەمبەردى ءوزى باس بولىپ, تۇرعىنداردىڭ تالاپ تىلەكتەرىن تىڭدادى. الدىمەن «اشىق ەسىك» كۇنىن وتكىزۋدىڭ ماڭىزىنا توقتالعان اۋدان اكىمى اتالعان اۋداندا تۇرعىندارمەن كەزدەسۋ ۇزبەي وتكىزىلىپ كەلە جاتقانىن جەتكىزدى.
«مەن اقپان ايىنان بەرى ءار جۇما سايىن تۇرعىنداردى قابىلداپ كەلەمىن. اپتا سايىن جوق دەگەندە 20-30 ادامنىڭ ءوتىنىشىن ءوز قۇلاعىممەن ەستيمىن. ال ءبولىم مەڭگەرۋشىلەرى ءار بەيسەنبى سايىن تۇرعىنداردى قابىلدايدى. الەۋمەتتىك جەلى ارقىلى تۇسكەن شاعىمدار دا ۋاقىتىندا شەشىم تاۋىپ جاتىر. دەمەك, «اشىق ەسىك» كۇنى ءبىزدى حالىقپەن تىعىز بايلانىستىراتىن التىن كوپىرگە اينالدى. ءبىزدىڭ ەسىگىمىز قاشاندا سىزدەرگە اشىق, قاشان كەلسەڭىزدەر دە سۇراۋلى ماسەلەلەرىڭىزگە جاۋاپ الۋعا مۇمكىندىك بار», – دەدى اۋدان اكىمى شاراعا كەلگەن تۇرعىندارعا.
اۋدان اكىمىمەن «اشىق ەسىك» كۇنىندە كەزدەسىپ, ماسەلەسى ويداعىداي شەشىلىپ, قۋانىپ شىققان تۇرسىنعازى احمەتۇلى اۋدانداعى ءار سالا قىزمەتكەرلەرىنىڭ جۇمىسىنا ءدان ريزا ەكەنىن جەتكىزدى.
«بۇرىن اكىمگە كىرىپ دات ايتپاق تۇگىلى اكىمشىلىكتىڭ ەسىگىنەن ەنۋدىڭ ءوزى قيىن بولاتىن. ال قازىر بۇل توسقاۋىل جوق. قالا اكىمىنىڭ ءوزى باستاپ, اۋدان اكىمدەرى قوستاپ, تۇرعىنداردى قابىلداعالى دا كوپ ماسەلە شەشىمىن تاپتى. «اكىم بول, حالقىڭا جاقىن بول» دەگەن وسى», – دەيدى ول.
«اشىق ەسىك» كۇنىنە اكىمدىكتىڭ ءبىلىم, كولىك, تۇرعىن ءۇي, ىشكى ىستەر باسقارماسى ت.ب. ورىنداردىڭ وكىلدەرى قاتىستى. كەيبىر تۇرعىندار ايتقان ماسەلەلەرگە بايلانىستى اكىم جاۋاپتى مەكەمەلەردىڭ قىزمەتكەرلەرىنە تىكەلەي تاپسىرما بەرىپ, ماسەلەنى دەر كەزىندە شەشۋدى بۇيىردى.
سارىارقا اۋدانىندا 370 مىڭنان استام تۇرعىن بار. تۇرعىنداردىڭ شاعىمدارى مەن تالاپ-وتىنىشتەرىن ۋاقىتىندا شەشۋ ءۇشىن بۇل اۋدان قوعامداعى بەلسەندى تۇلعالاردان ۇيىمداسقان City manager-لەردى دە ىسكە قوسىپتى.
«ءبىز بەلسەندى تۇرعىن رەتىندە سارىارقا اۋدانىنىڭ اكىمدىگىمەن بىرگە جۇمىس ىستەپ كەلە جاتقانىمىزعا 3 جىلدان استى. جىل باسىنان بەرى وسى جەردە «City manager» رەتىندە 5 ادام جۇمىس ىستەپ جاتىرمىز. بەسەۋمىز وسى اۋداننىڭ بەس ءوڭىرىن ءبولىپ الىپ, ارقايسىمىز وزىمىزگە قاراستى اۋماقتا پايدا بولعان ماسەلەلەردى دەر كەزىندە سوعان قاتىستى مەكەمەلەرگە جەتكىزىپ, تۇيتكىلدى ءتۇيىننىڭ تەز شەشىلۋىنە تۇرتكى بولامىز», – دەدى City manager-ءدىڭ مۇشەسى سايراگۇل ابباسقىزى.
