كەشە استاناداعى قازمەديا ورتالىعىندا ايماقتىق بۇقارالىق اقپارات قۇرالدارى وكىلدەرىنىڭ فورۋمى ءوتىپ, وندا وتاندىق ماسس-مەديا ماسەلەلەرى جانە ولاردىڭ جاي-كۇيى مەن دامۋ كەلەشەگى تالقىلاندى. ماڭىزدى جيىنعا قر اقپارات جانە كوممۋنيكاتسيالار ءمينيسترى داۋرەن اباەۆ قاتىستى.
فورۋمنىڭ باسىندا داۋرەن اباەۆ ءسوز الىپ, مينيسترلىك مەملەكەت باسشىسىنىڭ تاپسىرماسىمەن ايماقتىق ماسس-مەديانى جاڭا دەڭگەيگە كوتەرۋ شارالارىن قولعا العاندىعىن باياندادى.
– بۇگىنگى فورۋمدا وسى سالاداعى ءتۇيىندى ماسەلەلەردى وزدەرىڭىزبەن بىرلەسە تالقىلاپ, ءوزارا تاجىريبە الماسۋدىڭ تاماشا مۇمكىندىگى بولماق. جالپى, مەملەكەتتىڭ اقپاراتتىق ساياساتىن جۇزەگە اسىرۋدا ايماقتىق مەديا ۇلكەن ءرول اتقاراتىندىعى ايان. بۇقارانىڭ وزەكتى ماسەلەلەرىن جەرگىلىكتى ءباسپاسوز بەن تەلەارنالار ءبىرىنشى بولىپ كوتەرەدى. ەلباسى ساياساتىن ناسيحاتتاۋ, بىرلىك پەن تۇراقتىلىقتى نىعايتۋ, ۇلتتىق مۇددەنى قورعاۋ, وڭىرلىك مەديا ۇدايى نازاردان تىس قالدىرمايتىن التىن ارقاۋ سانالادى. وعان قوسا, ولار جۋرناليستيكا سالاسىنا ساپالى كادر دايارلاۋ ۇستاحاناسى رەتىندە قىزمەت اتقارىپ وتىر. بۇگىنگى كۇنى ەلىمىزدە 3 مىڭعا جۋىق بۇقارالىق اقپارات قۇرالدارى تىركەلگەن بولسا, سونىڭ 80 پايىزىن وڭىرلىك مەديا قۇرايدى. وسىنىڭ ءوزى وڭىردەگى باق-تىڭ ىقپالدى كۇش ەكەنىن كورسەتەدى, – دەدى مينيستر.
سونىمەن بىرگە, داۋرەن اسكەربەكۇلى بۇگىنگى تاڭدا وڭىرلىك مەدياعا ايرىقشا كوزقاراس تالاپ ەتىپ وتىرعاندىعىن جەتكىزدى. ونىڭ بىردەن-ءبىر جولى – جاڭا تەحنولوگيالاردى قارقىندى دامىتۋعا مۇمكىندىك جاساۋ. ءمينيستردىڭ ايتۋىنشا, ەڭ جەدەل سايتتاردىڭ ءوزى اقپارات تاراتۋدا الەۋمەتتىك جەلىلەردىڭ جىلدامدىعىنا ىلەسە الماي وتىر. بۇگىندە كەز كەلگەن ادام قانداي دا ءبىر وقيعانى بولماسىن ءموبيلدى تەلەفون ارقىلى تاراتاتىن دەڭگەيگە جەتتى. وسىنداي جويقىن باسەكەدە ۇتىلماۋ ءۇشىن ايماقتىق مەديانىڭ الدىندا ءبىر عانا جول بار. ول – زامانعا ساي كۇردەلى وزگەرىستەر جاساۋ. «قازىرگى كۇننىڭ تالابى – اقپاراتتى جەدەل ءارى ساپالى تاراتۋ عانا ەمەس, تۇتىنۋشىنىڭ قىزىعۋشىلىعىن ءدال تاۋىپ, وقىرمانمەن تىكەلەي بايلانىس ورناتا ءبىلۋ. سونىمەن قاتار, ەلدىڭ مۇددەسىن, حالىقتىڭ مۇڭ-مۇقتاجى مەن وڭىردەگى باسقا دا وزەكتى ماسەلەلەردى تەرەڭ ساراپتاپ, مەملەكەتتىك ساياساتتىڭ باعىت-باعدارىن حالىققا ءتيىمدى تاسىلدەرمەن جەتكىزۋ» دەدى ول.
فورۋم بارىسىندا ءۇش سەسسيا بويىنشا تاقىرىپتار بەلگىلەنىپ, قىزۋ پىكىرتالاس ءوربىدى. ماسەلەن, «قازاقستاندىق مەديا – نارىقتاعى داعدارىس – مەنەدجمەنت» تاقىرىبىندا «استانا» تەلەارناسىنىڭ باس ديرەكتورى ءلاززات تانىسباي قازاقستاندىق جۋرناليستەردى الاڭداتىپ وتىرعان ماسەلەلەرگە كەڭىرەك توقتالدى. ول, ءبىرىنشى كەزەكتە, ەلىمىزدە اقپارات ماسەلەلەرى ءجونىندەگى جاڭا زاڭعا قاتىستى پروبلەمالاردى تالقىلاۋعا ءوز ارىپتەستەرىن بەلسەندى قاتىسۋعا شاقىردى. «جالپى, باق سالاسىنىڭ وكىلدەرى وسى زاڭنىڭ تالقىلانۋىنا اتسالىسۋىمىز كەرەك. ودان باس تارتۋعا بولمايدى. ويتكەنى ول – ءسىز بەن ءبىزدىڭ كۇندەلىكتى تىرشىلىگىمىز, ەرتەڭگى جۇمىسىمىزدىڭ ءساتتى بولۋىنا ىقپال جاسايدى. سونىمەن قاتار, تاعى ءبىر ماڭىزدى ماسەلە بار. ءبىز, جۋرناليستەر, كۇندەلىكتى جۇمىسىمىزدا ەكى ۇلكەن ۇعىمنىڭ اراسىندا تاڭداۋ جاساۋمەن ءجۇرمىز. يا نارىققا جۇمىس ىستەيمىز نەمەسە ۇلتتىق قۇندىلىقتاردى ساقتاۋعا قىزمەت ەتەمىز. وسى ءبىر تاڭداۋدا ءجۇرگەن ءبىز ءۇشىن دە قازىر ۇلكەن ماسەلەلەر تۇرعان سەكىلدى» دەدى ول. رەسەيلىك «نتۆ» تەلەارناسىنىڭ جاڭالىقتار باعدارلاماسىن جۇرگىزۋشى ليليا گيلدەەۆا وسى سالاداعى پايىمدى پىكىرىمەن ءبولىستى. ورتالىق كوممۋنيكاتسيالار قىزمەتىنىڭ باسشىسى ەۆگەني كوچەتوۆ تە اقپارات سالاسى تۋرالى سالماقتى ءسوز قوزعادى. سودان كەيىن ايماقتان كەلگەن جۋرناليستەر قر اقپارات جانە كوممۋنيكاتسيالار ءمينيسترى داۋرەن اباەۆقا وزدەرىن مازالاعان سۇراقتارىن قويدى. مينيستر دە ولارعا تياناقتى جاۋاپ بەرىپ وتىردى.
جيىندا وتاندىق باق وكىلدەرىنىڭ باسىن بىرىكتىرەتىن اليانس قۇرۋ تۋرالى دا ويلار ايتىلدى. قىسقاسى, فورۋمدا وتاندىق جۋرناليستەردى بەيتاراپ قالدىرمايتىن وزەكتى ماسەلەلەر ساراپقا سالىندى.
ازامات ەسەنجول
