استانا قالاسى بويىنشا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنىڭ باسشىسى تىلەگەن قاسكين «100 ناقتى قادام» ۇلت جوسپارىنىڭ ءبىرىنشى باعىتىن ىسكە اسىرۋ: كاسىبي مەملەكەتتىك اپپاراتتى قالىپتاستىرۋ» تاقىرىبىندا بريفينگ وتكىزدى.
جيىندا دەپارتامەنت باسشىسى ەلىمىزدەگى مەملەكەتتىك قىزمەت ىستەرى سالاسىندا جۇرگىزىلىپ جاتقان جاڭاشىل جۇمىستار جايىندا وي ءوربىتتى. ونىڭ ايتۋىنشا, مەملەكەتتىك قىزمەتتە ءوز ءىسىنىڭ كانىگى ماماندارى جۇمىس ىستەۋگە ءتيىس, ويتكەنى پرەزيدەنتتىڭ ساياساتىن حالىققا جەتكىزەتىن سولار جانە جۇرگىزىلەتىن رەفورمالاردىڭ تابىستى ىسكە اسۋى مەملەكەتتىك قىزمەتشىلەردىڭ ساپالى ءارى ءتيىمدى قىزمەتىنە بايلانىستى ەكەندىگىن سالماقتاپ ءوتتى.
– استانادا بارلىعى 69 مەملەكەتتىك ورگان جۇمىس ىستەيدى, ونىڭ 32-ءسى – جەرگىلىكتى اتقارۋشى, 37-ءسى – اۋماقتىق بولىمشە. قالادا مەملەكەتتىك قىزمەتتە جۇمىس ىستەيتىن 4000-عا تارتا ادام بار. ولاردىڭ باسىم بولىگى – جوعارى ءبىلىم العان, حالىقارالىق باعدارلامالاردىڭ تۇلەكتەرى. مەملەكەتتىك قىزمەتشىلەردىڭ 60 پايىزى – ايەلدەر. جالپى, مەملەكەتتىك قىزمەتشىلەردىڭ باسىم بولىگىن, ياعني 37 پايىزىن 29 جاسقا تولماعان جاستار قۇرايدى. مەملەكەتتىك قىزمەتتەگى ورتاشا قىزمەت ءوتىلى – 9 جىل, ال قىزمەتشىلەردىڭ ورتاشا جاسى 33-ءتى قۇرايدى. سونىمەن بىرگە, مەريتوكراتيا قاعيداسى بويىنشا جاڭا مانساپ مودەلى بار, ول اشىق بايقاۋدى ىرىكتەۋدى قامتاماسىز ەتۋگە, ءاربىر مەملەكەتتىك قىزمەتكەردىڭ تاجىريبەسى مەن جەتىستىگىن ىلگەرىلەتۋگە باعىتتالعان, – دەدى تىلەگەن قاسكين.
برينفيگ بارىسىندا اتالعان دەپارتامەنت قىزمەتىنىڭ نەگىزگى ماقساتتارىنىڭ ءبىرى – ازاماتتاردىڭ سەنىم دەڭگەيىن ارتتىرۋ ەكەندىگى دە ايتىلدى.