ەلوردادا قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا, باس پروكۋراتۋرا جانە ىشكى ىستەر مينيسترلىگى وكىلدەرىمەن بىرلەسكەن توپ مۇشەلەرى «ايەلدەرگە قاتىستى زورلىق-زومبىلىقسىز 16 كۇن» اكتسياسى اياسىندا استانا اكىمدىگىنە قاراستى «زورلىق-زومبىلىق نەمەسە زورلىق-زومبىلىق قاۋىپى سالدارىنان قيىن جاعدايعا تاپ بولعان ادامدارعا ارنالعان داعدارىس ورتالىعى باسپاناسى» مەكەمەسىنىڭ جۇمىسىمەن تانىستى.
كەزدەسۋ بارىسىندا ۇلتتىق كوميسسيا توراعاسىنىڭ ورىنباسارى ەلەنا تاراسەنكو تاۋەلسىزدىك العان جىلدارداعى جەتىستىككە قىسقاشا توقتالىپ ءوتىپ, ەلىمىزدەگى ايەلدەرگە جاسالىپ وتىرعان قامقورلىق جايىندا سالماقتى ءسوز قوزعادى.
ودان كەيىن داعدارىس ورتالىعىنىڭ ديرەكتورى عاليا حامەتقىزى اتالعان مەكەمەنىڭ بۇگىنگى اتقارىپ وتىرعان جۇمىسى تۋرالى باياندادى.
– نەگىزىنەن, ورتالىق 50 ورىنعا شاقتالعان. ءدال قازىرگى تاڭدا 9 ايەل, 20 بالا تۇرىپ جاتىر. ورتالىققا قيىن جاعدايعا تاپ بولعان 18 بەن 58 جاس ارالىعىنداعى ازاماتشالاردى قابىلدايدى. الدىمەن ول كىسىلەردى مەديتسينالىق تەكسەرۋدەن وتكىزەمىز. سودان سوڭ وسىندا التى ايعا دەيىن تۇرۋعا مۇمكىندىك بەرىلەدى. ولارمەن پسيحولوگتار جۇمىس ىستەيدى. دەگەنمەن ءبىزدىڭ ماقساتىمىز – زورلىق-زومبىلىققا ۇشىراعان ازاماتشالاردى وتباسىنا قايتارىپ, وتاعاسىمەن قايتا تابىستىرۋ. بۇگىنگە دەيىن بىزگە كەلگەندەردىڭ 90 پايىزى وتباسىلارىنا ورالدى. اسىرەسە, بىزگە وڭتۇستىك ولكەدەن ەلورداعا كەلگەن 18-30 جاس ارالىعىنداعى كەلىنشەكتەر كوبىرەك حابارلاسادى. ولارعا زاڭگەرلەر قۇقىقتىق جاعىنان كەڭەس بەرەدى. الداعى تاڭدا ورتالىقتىڭ اۋقىمىن كەڭەيتۋ ويدا بار. ماسەلەن, رەسپۋبليكالىق دەڭگەيدە تاۋلىك بويى قىزمەت كورسەتەتىن «سەنىم تەلەفونىن» قويساق دەيمىز. ورتالىققا حابارلاسقان ازاماتشالارعا تولىق كەڭەس بەرىپ, قولدان كەلگەنشە كومەكتەسكىمىز كەلەدى. كوبىنەسە ايەلدەر وسىنداي ورتالىق بار ەكەنىن بىلمەيدى. سوندىقتان اقپاراتتىق شارالارعا باسا نازار اۋدارىپ وتىرمىز, – دەدى ورتالىق ديرەكتورى.
ايتا كەتەيىك, بۇگىنگى كۇنى ەلىمىزدىڭ بارلىق وڭىرلەرىندە 28 داعدارىس ورتالىعى جۇمىس ىستەيدى. ونىڭ ىشىندەگى 17 ورتالىقتا ازاماتشالار پانالايتىن باسپانا بار. ولاردىڭ بارلىعى دا قيىن جاعدايعا تاپ بولعان ايەلدەرگە مەديتسينالىق, قۇقىقتىق جاعىنان قولداۋ كورسەتىپ وتىر.
شارا سوڭىندا ۇلتتىق كوميسسيا توراعاسىنىڭ ورىنباسارى ەلەنا تاراسەنكو جينالعان ماماندارعا وتباسى مەن قوعامدىق تۇرمىستىق زورلىق-زومبىلىقتىڭ الدىن الۋعا باعىتتالعان جانە قۇقىق بۇزۋشىلارعا قاتىستى قۇقىقتىق جاۋاپكەرشىلىكتى ءتۇسىندىرۋ جۇمىستارىن ءجىتى ناسيحاتتاۋ كەرەكتىگىن باسا ايتتى.
ازامات ەسەنجول
