نۇر-سۇلتان قالاسىندا تۇڭعىش پرەزيدەنت كۇنىنە وراي اۋلا كلۋبتارى اراسىندا «اكە, انا جانە مەن» وتباسىلىق كوڭىلدى ستارتتار جارىسى ءوتتى.
حالىق اراسىندا بۇقارالىق سپورتتى ناسيحاتتاۋدى, وتباسىلىق قۇندىلىقتاردى قالىپتاستىرۋدى, سونىمەن قاتار اتا-انالار مەن بالالار اراسىنداعى قارىم-قاتىناستى ارتتىرۋدى ماقسات ەتكەن جارىسقا قاتىسۋشىلار 8 كەزەڭنەن تۇراتىن سپورتتىق سايىستاردا كۇش سىناستى. وتە تارتىستى ءارى قىزىقتى وتكەن جارىستاردىڭ ناتيجەسىندە «جاس بارىس» اۋلا كلۋبىنىڭ اتىنان سىنعا تۇسكەن ەرلان شاريپوۆتىڭ وتباسى جەڭىمپاز اتاندى. «ەسىل» اۋلا كلۋبىنىڭ نامىسىن قورعاعان رۇستەم اليمۋسينوۆتىڭ وتباسى ەكىنشى ورىنعا يە بولدى. ال ۇزدىك ۇشتىكتى «الان» اۋلا كلۋبىنىڭ وكىلى عازيز بەكبولاتوۆتىڭ وتباسى قورىتىندىلادى. جارىس جەڭىمپازدارى مەن جۇلدەگەرلەرىنە وسى جارىستىڭ ۇيىمداستىرۋشىسى «اstana Art Group» جشس جانە «استانا جاستارى» كمم اتىنان تاعايىندالعان كۋبوكتار, مەدالدار, ديپلومدار جانە باعالى سىيلىقتار تابىس ەتىلدى. سونىمەن قاتار وتباسىلىق جارىستاردا بەلسەندىلىك تانىتقان «شاعالا», «ۇركەر», «ارمانداستار», «سامعاۋ», «استانا», «جاس قانات» اۋلا كلۋبتارىنىڭ وتباسىلىق كوماندالارىنا, جارىستىڭ ەڭ جاس قاتىسۋشىسى «ۇركەر» كلۋبىنىڭ اتىنان سىنعا تۇسكەن 5 جاسار ءالباري يگەمبەرديەۆكە دەمەۋشىلەر اتىنان سىيلىقتار بەرىلدى.
– بۇگىن وتە قىزىقتى جارىستار ءوتتى. ەڭ باستىسى, ءبىز بالالارىمىزبەن بىرگە ويناپ, كوڭىل كوتەردىك. بۇل, ەڭ الدىمەن, دەنساۋلىقتى شىڭداۋعا پايدالى بولسا, ەكىنشىدەن, وتباسىلىق ىنتىماقتى ارتتىرادى. وسىنداي ماعىنالى دا قىزىقتى جارىستى ۇيىمداستىرۋشىلارعا العىس ايتامىن. اتا-انالاردى, بالالاردى, سونداي-اق بارشا قازاقستاندىقتاردى تۇڭعىش پرەزيدەنت كۇنىمەن قۇتتىقتايمىن! ەلىمىزدە اماندىق بولىپ, بالالارىمىز وسىنداي قىزىقتى ءارى پايدالى ءىس-شارالارعا قاتىسا بەرسىن, – دەيدى مەرەكەلىك جارىستا مەرەيى ۇستەم بولعان ەرلان ءشارىپوۆ.
بايان اسىلبەكوۆا
