«قازاقستان» ورتالىق كونتسەرت زالىندا ر.باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنا قاراستى «استانا سازى» مەملەكەتتىك فولكلورلىق ءانسامبلىنىڭ «تاۋەلسىزدىككە ارناۋ» اتتى كونتسەرتى ءوتتى. كەش اتاۋى ايتىپ تۇرعانداي, تاۋەلسىزدىكتىڭ 30 جىلدىق مەرەيتويى اياسىندا ۇيىمداستىرىلدى.
اتالمىش ءانسامبلدىڭ كوركەمدىك جەتەكشىسى باۋىرجان اقتاەۆ – ۇلتتىق اسپاپتاردى ەركىن مەڭگەرگەن مۋلتينسترۋمەنتاليست مۋزىكانت. وسى كونتسەرت تىزگىنىن ۇستاعان ول سىبىزعى, شاڭقوبىز سياقتى اسپاپتاردا ويناپ, ونەرىن دە كورسەتتى. ونەر ۇجىمى قۇرامىندا دا تالانتتى ونەرپازدار جينالعان. ماسەلەن, تاياۋدا وتكەن تاتتىمبەت قازانعاپۇلى اتىنداعى حالىق اسپاپتارىندا ورىنداۋشىلاردىڭ ءVىىى رەسپۋبليكالىق بايقاۋىندا «استانا سازىنىڭ» ارتىستەرى جۇلدەلى ورىندارعا يە بولدى. اتاپ ايتقاندا, ارداق ەلەۋسىز (دومبىرا) باس جۇلدەنى, ايدا ابدۋعالي (پريما قوبىز) ەكىنشى ورىندى, گۇلنۇر راقىمجان (قىلقوبىز) ءۇشىنشى ورىندى الدى. ارداق ەلەۋسىز جاقىندا «دارىن» مەملەكەتتىك جاستار سىيلىعىنىڭ لاۋرەاتى دا اتاندى.
ال تاۋەلسىزدىك مەرەيتويىنا ارنالعان كونتسەرت بارىسىندا التايدان اتىراۋعا دەيىنگى كەڭ-بايتاق دالامىزدىڭ مۋزىكالىق مۇراسى اۋەلەدى. كورەرمەندەر سازسىرناي, شەرتەر, پريما قوبىز, قىلقوبىز, شاڭقوبىز, باس دومبىرا, ۇرمالى اسپاپتار ۇنىنە قۇلاق قۇرىشىن قاندىردى. كونە مەن جاڭانىڭ اراسىن جالعاعان انسامبل توعجان جاحين, القۋات قازاقباەۆ سىندى قازىرگى كومپوزيتورلاردىڭ ۇلتتىق بوياۋى قانىق شىعارمالارىن تارتۋ ەتتى. كەش قوناقتارى – قازاقستاننىڭ ەڭبەك سىڭىرگەن قايراتكەرى سۆەتلانا ايتباەۆا احمەت جۇبانوۆتىڭ «قارلىعاش» ءانىن, «قازاقكونتسەرت» ءسوليسى دىنيسلامبەك جايلاۋباەۆ يسا بايزاقوۆتىڭ «جەلدىرمەسىن» شىرقادى.
كەش سوڭىندا ر.باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ ديرەكتورى, بەلگىلى ءانشى, كومپوزيتور, قازاقستاننىڭ ەڭبەك سىڭىرگەن قايراتكەرى جەڭىس سەيدۋللاۇلى تاۋەلسىزدىكتىڭ قادىرى تۋرالى ايتىپ, تاماشا كەش سىيلاعان انسامبل مەن كورەرمەندەرگە العىس ءبىلدىردى. اقىن, قازاقستاننىڭ ەڭبەك سىڭىرگەن قايراتكەرى نادەجدا لۋشنيكوۆا, تانىمال ءانشى, كومپوزيتور قانات ايتباەۆ, تالانتتى تەاتر رەجيسسەرى, قازاقستاننىڭ ەڭبەك سىڭىرگەن قايراتكەرى اسحات ماەميروۆ, وسى كەشكە ەلىمىزدىڭ تۇكپىر-تۇكپىرىنەن كەلگەن كورەرمەندەر ىستىق ىقىلاستارىن جەتكىزدى.
